الموضوع: تحذير من شركة 2b وشركة فاهم

السلام عليكم،
بما إننا بنحاول ما نديش فرصة لأي واحد يستغلنا، فحبيت أحكي تجربتي مع الشركتين دول واحذركم من التعامل معاهم،
القصة بدأت يوم 25 أكتوبر 2014 لما لقيت إعلان عن موبايل iphone 6plus عاملاه شركة 2b واشتريت منهم الموبايل. من حوالي شهر بدأت تظهر مشكلة فيه إن صوت المتصل مش بسمعه، يادوب وش وزن كدا، المهم دورت على الفاتورة مش لقيتها، وهنا بدأت المأساة، روحت شركة 2b وقولتله كذا كذا، قالي انا اسف لازم الفاتورة، قولتله حضرتك عندك الأصل والموبايل معايا والسريال بتاعه متسجل عندك أكيد واسمي وموبايلي وبياناتي عندك، المهم مش راضي خالص، يقوله لأ، إما الفاتورة وإما مش هاينفع نشوف الموبايل أو أستلمه منك. قعدت أحاول معاه واتحملت أسلوبه الغلس، وفي الاخر قالي اتصل بالرقم المختصر بتاع الشركة، اتصلت بيهم فعلا ورد عليا واحد وحكيت له المشكلة، قالي انا اسف، بس ممكن نطلعلك فاتورة في خلال أسبوعين!!!!! طبعا انا ما رضيتش وأصريت إن فيه أصل الفاتورة عندهم وكله متسجل على الكمبيوتر، مافيش حد بيعتمد على اليدوي دلوقتي، المهم رخمت معاه لحد ما اتصلت بيا واحدة اسمها مدام هبه، واتكلمت معايا بكل ذوق، وأخدت اسمي وأثناء ما بكلمها قالت لي حضرتك الموبايل الضمان بتاعه خلص؟؟؟؟؟ ودي المأساة التانية، قولتلها حضرتك لسا باقي شهر، قالت لأ الموبايل ضمانه 11 شهر، قولتلها حضرتك يبقى كدا خدعتوني عشان قولتوا سنة، قالت لي ما هو سنة الكمبيوتر والموبايل 11 شهر، قولتلها لأ الكلام دا مش مظبوط، اللي أعرفه ان السنة 12 شهر مش 11، وقعدت تتكلم معايا أكتر من نص ساعة، وفي الآخر قالت لي طيب اديني الأخ اللي عندك، كلمته، وبعدها بدقيقتين بالظبط لقيت الأخ دا جايب الفاتورة وجاي (سبحان الله من شوية كان أسبوعين). المهم قالي حضرتك هاتاخد الفاتورة وتروح لمقر الصيانة في مصر الجديدة، شركة أسمها فاهم. وهنا المأساة الكبرى. روحت وقولتلهم كذا كذا، اتكلموا بكل ذوق واحترام، وقالوا لي في خلال أسبوعين هانرد على حضرتك، ولو مشكلة سوفت وير هانعملها هنا، ولو هارد وير في الغالب الموبايل بيتبدل طالما في الضمان، قولتلهم ماشي بس اللي أعرفه ان الاي فون لو فيه مشكلة بيتبدل مش بيتصلح. بعد حوالي أسبوع بعتلهم ملاحظة على موقعهم اني عايز أبدل التليفون لو ثبت ان فيه عيب، لقيت واحد بيتصل منهم بيقولي الرأي هايكون للوكيل، قولتله حضرتك ياريت التليفون مش يتفتح إلا لما تقولي هاتعملوا ايه وأقولك اه أو لأ. بعدها بحوالي 3 أيام لقيتهم بيتصلوا بيقولوا الموبايل بتاعك اتصلح وكانت السماعة الداخلية بايظة(بيحطوني اما الأمر الواقع). طبعا انا اتذهلت، دا انا لسا بكلمكم من شوية وبقولكم ما تعملوش حاجة غير لما تقولوا. المهم روحت ليهم وقابلني مندوب هناك لأنهم خلاص كانوا ماشيين وأخدت منه التليفون وقولتله الكلام دا مش هاينفع واتفقت اني هاتصل بيهم تاني يوم، وكلمتهم فعلا وقولتلهم ان فيه حالات متشابهة كتير للموبايل بتاعي وبدلوه، الأخ اللي بيكلمني قالي هانكلمك بعد نص ساعة، ومافيش حد اتصل أبدا، وكل ما اتصل الاقي رسالة مسجلة. المهم النهاردة اتصلت بيهم تاني وبعد مناقشات ومداولات قولتله خلاص اديني اسم الوكيل وعنوانه وانا اروح واتفاهم معاه، الأخ اتلجلج في الكلام وقالي الوكيل شركة وان، بحثت عنها في النت وانا بكلمه ما لقيتش حد بالاسم دا، قولتله ممكن تليفونهم وعنوانهم، قالي طيب عشر دقايق وهانتصل بيك، انتظرت ساعة ونص واتصلت تاني، قالي احنا آسفين السيستم واقع، هانكلم حضرتك أول ما السيستم يرجع، قولتله انت متأكد من اسم الموكيل، قالي هو اسمه فور لينك وهانديك عنوانه دلوقتي، قعدت منتظر ساعة ونص كاملين تاني ما فيش حد اتصل، اتصلت بيهم تاني رد عليا بني آدم اقل ما يقال انه مش متربي، بيتكلم بأسلوب غرضه الاستفزاز، ويقولي احمد ربنا اننا صلحنا الموبايل وكان فيه خدوش وانت ماضي على كدا، قولتله انا ما مضيتش على حاجة، وقولتله انا كل اللي عايزه اسم الوكيل، قالي آسف مش بنطلع بيانات الوكلاء لحد (بمنتهى قلة الأدب) طبعا انا مذبهل، هو رقم الوكيل اللي المفروض يكون معروف لكل مصر بقى سر حربي ولا ايه، وبعد استفزاز كتير ما قدرتش أتحمل أعصابي وقفلت معاه. اللي استنتجته انهم مش بيتعاملوا مع وكيل ولا نيلة، دول شوية هواة وبيضحكوا على الناس.
انا آسف للإطالة بس أقسم بالله دا اللي حصل معايا. وحسبي الله ونعم الوكيل في كل نصاب.