نوع السيارة: كيا بيكانتو
موديل :2005
عداد كيلومتر: 52000كم

المشكلة: ثقل رهيب بدواسة الدبرياج....الدواسة بقت أشبة بدواسة الفرامل...مع الفارق انك لازم تدوس للأخر عشان الدبرياج يفصل و تعرف تنقل...لكن الفرامل انت بتلمسها عشان العربية تقف!
أول ما جبت العربية ماكنش ظاهر قوي الموضوع ده...بس بدأ يشد يشد لحد ما بطن رجلي الشمال مبقاش ينفع أمشي عليه طبيعي زي الناس من كتر الألم...و لحد دلوقتي مازلت موجوع !!!

أكتر حاجة خلتني أُسرع في قرار التغيير هو ان واحد صاحبي جاب بيكانتو زيرو..أو ما جربتها و جربت الدبرياج...كنت مستعد أجيب شوية بنزين و أدلوقهم علي الدواسة عندي و أولع فيها...بس إكتشف ان كده هاولع في العربية كلها

توكيل ولا بره؟

اما كنت في التوكيل أخر مره...سألت علي تكلفة تغيير الطقم...طبعا نزل علي الخبر كالصاعقة....1200 جنيه...بدون ضريبة...يعني حوالي 1300...شامل المصنعيات و قطع الغيار و الضريبة....

طلعت نمرة محل الجندي بتاع قطع الغيار اللي في شارع دمشق و كلمته...عندك طقم دبرياج بيكانتو؟
موجود يا باشا...بكام يا عم ؟؟
350 جنيه!!! كوري بس مش أصلي...و السللك ب 40 جنيه

طبعا سعر زي الفل...و دي أكتر حاجة خلتني أقول ملعون أبو التوكيل

روحت علي المحل يوم الجمعة اللي فاتت باليل و قلتله عايزهم ...جاهملي لاقيتهم ماركة Valeo...بس بشراكة مع شركة تانية كوري اسمها PHC....و دي متخصصة في القطع الغيار الكوري...
و دي صور الحاجات:

الإسطوانة:






الديسك:





البلية:






الكابل:




يجي بقي السؤال الأهم من ده كله....هاتغير الحاجات دي فيييين يا نادر؟؟؟؟؟؟؟؟

أو حاجة عملتها سألت الراجل اللي قاعد في الجندي...قام قالي في ورشة احنا بنتعامل معاها و أي شغل في الكيا أو الكوري بنبعته على هناك علطول...

الورشة اسمها : مركز الأصدقاء
المكان: خلف قصر القبة....34 شارع عبد الرحمن نصر- الزيتون
كيفية الذهاب: هاتنزل من كوبري القبة...تاخد يمين...و تمشي في الشارع اللي بين سور القصر و سور المترو...لحد أخره...و تاخد يمين في يمين بعد شارع ترعة الجبل....هتلاقي شارع طويييييل و نظييف(لسه متسفلت)...الورشة بقي في أخر الشارع ده علي اليمين

التليفونات:
0100209293
22843866

(يفضل الحجز قبل الذهاب)

وصلت السبت صباحا الساعة 11:30 كده...بعد ما توهت توهان محترم...أول ما وصلت قابلت الأسطي ياسر...و قلتله تعالي جرب العربية قبل مانشتغل فيها عشان فيها صوت في العفشة...أخدها جربها و قالي مافيش حاجة...الصوت ده بتاع المساعدين و طبيعي عشان العربية ماشية كتير...ابقي اعمل حسابك تغيرهم كمان 20000--30000كيلو كده...قلتله ماشي...

رجعنا علي الورشة...و قالي استني بس نخلص العريتين البرايد دول و تخش مكان واحدة منهم...استنيت و شربت الشاي و أكلت المولتو...و قاعد بتفرج...

هما 3 أصدقاء...و فعلا ما شاء الله عليهم..أصدقاء بجد...ماتحسش انهم صنايعية..لأ...زي ميكونوا اخوات مفيش واحد فيهم رخم ولا بيصتنصح

بأمانة بدون مبالغة انا مش مصدق السرعة اللي هما فيها دي...عفشة عربية برايد كاملة اتفكت واتغيرت قدامي في نص ساعة...و الرايد التانية...صيانة كاملة للموتور اتعملت في ساعة (سيور-تاكيهات-فلاتر-ظبط كاربراتير-تغيير زيت-بوجيهات)...

عندهم معدات حديثة...مثلا العفشة بتتفك بالدريل (حاجة زي الشنيور بس قوته أعلي)...موجود عندهم كومبريسور ضغط هواء و جاز و زيت...الخ الخ...يعني ماتحسش انك في ورشة عادية

ده أسطي ياسر اللي بيتكلم في التليفون:):





جه دور عربيتي...و بدأنا فيها شغل الساعة 1:30...

العربية طلعت صعبة جدا جدا...موضوع الحوض الصغير ده طلع مشكلة فعلا...بس مافيش حاجة بتصعب علي الصنايعية...في ظرف ساعة زمن كان فاكك كل حاجة في وش الموتور عشان يعرف يوصل للمسامير بتاعة الفتيس...:







نزل زيت الفتيس كله...و هايتغير بجديد طبعا...و بعده خرج المغلوب علي أمره الفتيس....
إتشال الإسطوانة و الديسك القدام و ركب مكانهم الجديد... و البلية نفس الكلام...بس الأول فك الأكس بتاعها و نظفة و صنفره كيس لأنه كان خشن و مش نضيف...و اتركب تاني بعد التشحيم طبعا...

حاجة بسطتني...كنت بابص علي البلية الأصلية القديمة...لاقيت مكتوب عليها PHC...اللي هي نفس اللي مكتوبة علي الجديد

مرحلة التركيب ما أخدتش ساعة زمن...و كانت العربية زي ما كانت بالظبط....الشغل خلص الساعة 4:30...يعني 3 ساعات شغل فقط!!!
أعتقد مافيش أسرع من كده...

جربت العربية ...طبعا اختلاف شاسع...من كتر ما هو ناعم العربية بطلت من كذا مره..كأني لسه بتعلم سواقة

وقت الحساب:

أامرني يا باشا...حسابك كام؟
120 جنيه مصنعية
40 جنيه زيت فتيس

طلعت الفلوس و اديتهالوا من غير أي نقاش...كفاية الشغل النضيف و صعوبة العربية...و أصلا انا كنت متوقع انها تكسر حاجز ال 200

يبقي كده مجموع ما صرف:

350 طقم الدبرياج
40 سلك
40 زيت فتيس
120 مصنعية
--------------------
550 المجموع

حد قارن بين السعر ده و سعر التوكيل؟
فرق أكتر من النص يا عالم....حرام ولا حلال ده؟؟؟؟!

من الأن...........................لا توكيل بعد اليوم

صيانة ال60000 قربت عندي...و هاعملها عندهم ان شاء الله
---------------------------------------------------

أي استفسار انا تحت امركم:)