الموضوع: جهاز لا بد منه فى سيارتك عزيزى الرينوهاوى

خلال زيارتى الأخيرة للصين، لقيت الجهاز ده و صممت اشتريه



الجهاز عبارة عن باور بانك بقدرة 8600Ah و له مخرجين شحن....واحد 2.1 امبير و التانى 1 امبير و معاه كشاف و معاه جميع انواع الوصلات الممكنة لشحن اى نوع جهاز ممكن من اول الموبايل للتابلت للأيباد لأى جهاز تتخيله و تقدر تشحن الباور بانك ده بأدابتور او من ولاعة السيارة......لغاية كده عادى جداً و موجود فى كذا حته

الجديد بقه ان ذات نفس الجهاز ده يقدر يقوم عربيتك الصبح لو البطارية نامت!!!!!!!
ايون يقدر يقوم العربية عن طريق بطارية 12 فولت خاصة موجوده فيه و كمان معاه الكابلات التمساح اللى بتمسك فى البطارية.....يعنى لا محتاج بطارية تانية تقومك و لا محتاج توقف عربية و لا محتاج كبلات و لا محتاج تخاف تانى تكون فى مشوار بعيد و لا يوم اجازة و البطارية تنام منك..كل اللى عليك تعمله توصل الكابلات مكانها فى الجهاز و تمسك الأطراف الأخرى فى أطراف البطارية....ثم تشغل الباور بانك و بعدين تدور العربية و تنطلق

طبعاً بما ان عربيتنا اتوماتيك و مينفعش نزقها فانا بنصح كل واحد يخلى جهاز زى كده من اى ماركه معاه فى عربيته و يعيش مرتاح

تحياتى

المشاركة الأصلية كتبت بواسطة م أحمد

القدرة بتاعت الجهاز ممكن 8000 mAH مش AH

فى نوعيات من الجهاز دا فعلا بتتشغل على شاحن العربية فقط بدون حاجة لمشابك و تضطر تفح الكبوت...زى الوصلة السوداء اللى فى المنتصف...هو ممكن يسند مع البطارية انما يقوم المارش لوحده استحالة

كلامك مظبوط و اسف على السهو....هو فعلاً 8600 mAh

فيه نوع بيتباع بيشحن بطارية العربية من ولاعة العربية بدون ما تفتح الكابوت بس ده لازم تقعد مستنى ربع ساعة على الأقل علشان تأثيره يبان و مش هو ده اللى انا اشتريته

اللى بتكلم عليه لازم توصيله على قواطيش البطارية بمشابك و بيدور الموتور حتى مع عدم وجود البطارية من أساسه لأنه بيطلع خرج ١٢ فولت/٣٥٠ أمبير لحظى كافى لإدارة المارش و نفس خرج بطارية العربية....و ده اللى أنا جربته بنفسى مش بقول كلام من دماغى...و فيه زميل اشتراه من سنه و جربه اكتر من مره و برده شغال....ده غير مئات الريفيوهات على مواقع الشراء العالمية امازون و ايباى و خلافه من مستخدمين قوموا بيه عربيات 4X4...ده غير مواقع الكترونيات متخصصة جربت اكتر من موديل و برده انطباعهم ايجابى جداً

ده ريفيو واحد فقط للمعلومة مش اكتر:

Review: Anker’s Jump Starter Portable Charger brings cars and iPhones back to life in emergencies | 9to5Mac

حضرتك بتقول إستحالة يقوم مارش: ياترى فيه سبب علمى او تحربة عملية تخليك تأكد إستحالة الموضوع؟

تحياتى