للاسف الفيات الجديد خذلنى

**mohamedmmm2** · 16-11-2015 01:23 PM

انا معايا جراند بونتو 2007.. العربيه ركوبه جميله و شياكه وثبات وفرامل ممتازه واوبشن لذيذ وكل حاجه
نيجى بقى لقطع الغيار والخوابير.. بجد انا حسيت ان الطبيعى الفين وتلاته دة اللى هو عادى حسيت انى بصرف مرتبى على العربيه.. حصل مشكله فى العربيه وهى ما شاء الله لما بتفتح بتبقى بلاعه فلوس.. شريط ايرباج فجاء لواحدة قالولى اتقطع رحت جبته ب 1250 بخلاف التركيب.. عقل فتيس معرفش ايه اللى جراله دة كمان بس الميكانيكى قالى دى مشكله دارجه فيها ب 6000 بخلاف المصنعيات.. دة غير البلاوي التانيه اللى فى النص
بجد مش كدة كانى راكب بى ام حديث اساسا.. قطع غيار مبالغ فيها و اللى بيشتغلوا فيها اساسا مش فاهمين و بتبقى مضطر تروحلهم عشان مفيش غيرهم وقطع الغيار الاستيراد الناس محتكراهم فى السلام.. هو الاسكندرانى واى حد غيره مجرد توابع واسعار هبل.. ويا سواد ليلك لو الكنترول ضرب هاتدفعلك 10000 كدة ملاكى بس على طقم دوارة وميكانيكى واحتمال قطمه دركسيون
على فكرة انا كان معايا سيينا 2001 وكانت زى الفل وعادى زى اى عربيه فى الصيانات وقطع الغيار موجودة والدنيا حلوه حتى الاستيراد فى الوكاله موجوده والسلام وغيرهم ومش بقول ان الفيات وحش.. بس الجديد دة بجد عن تجربه اركب 128 ولا انى اعذب نفسى فى جراند بونتو ولا لينيا ولا برافو
مع العلم العربيه ماشيه 87000 كيلو وفابريكه كلها ومعايا بولو 2009 ماشيه 173000 والله عمرها ما خذلتنى مش بصرف عليها غير استخدامى الطبيعى زى التيل الكبالن الطنابير السير.. الطبيعى يعنى وقطع غيارها ماليه البلد واسعارها ممتازه
ياريت اللى يرد يفكر قبل ما يتكلم واللى عربيته جديده ياخد باله انها جديده لسه

**mif** · 16-11-2015 03:20 PM

دا عيب الاوروبي يا تركبه زيرو يا متفكرش فيه اصلا
و فعلا برضه الاوروبي القديم ثمنينات و تسعينات عمره اطول بكتير من الحديث

**borio1704** · 16-11-2015 10:39 PM

المشاكل والأعطال اللي حضرتك بتتكلم عليها دي هي المقياس اللي بيسموه "اعتمادية".. يعني قد إيه تقدر تعتمد على العربية وما تعطلش منك..

والفيات تتربع على عرش السيارات الفاشلة في الاعتمادية على مستوى العالم بدون منازع... والأسوأ من كده.. إنك شاري عربية إيطالي.. يعني سعر عالي لمجرد إنك شاري عربية أوروبية ممكن تلاقي عليها توقيع واحد من المصممين المشهورين في العالم... يعني بدفع تمن حاجة لمجرد الفشخرة الكدابة

في رأيي.. أي منتج صيني أحسن بكتيييييير من المنتجات الإيطالية ( كلها.. مش العربيات بس ).. ﻹني بشتري الصيني وعارف إن عمره قليل ومشاكله كتير وفي المقابل ما بدفعش كتير زي الإيطالي

...

**marko polo** · 17-11-2015 07:46 AM

اية المشكلة اللى حصلت عندك علشان تغير عقل الفتيس وجبتو منين وغيرتوة عند مين

**mohamedmmm2** · 17-11-2015 12:31 PM

سيدى الفاضل صدقنى مش دى المشكله ان عقل الفتيس باظ... المشكله فى الاسعار اللى بسمعها والناس اللى بتصلحها.. عندك مثلا صابر اللى فى مدينه نصر ده بجد مجرد مؤدى ليس الا.. ولا بيفهم اى حاجه والناس معرفش ازاى بتقول عليه جامد ولا شاطر.. بص انا كان معايا سيينا وكنت بشترى حاجتها نسبيا غاليا وقتها بس فى المعقول واى حد شاطر ممكن يشتغل فيها عادى مش معضله.. بس دى علمتنى الادب بجد.. وحتى لو العربيه جديده.. افرض عملت حادثه لاقدر الله.. تقريبا هاتصرف نص تمن العربيه على شويه حاجات غير الموتور والسمكره

**mohamedmmm2** · 17-11-2015 12:38 PM

وللعلم انا بفكر اجيب لنفسى فيات ماريا لو لقيت حاله نضيفه وسعر معقول.. انا مش بكره الفيات بالعكس.. انا بتكلم على الجديد بس لان فعلا التوكيل زباله وقطع الغيار صعبه جدا ومحدش بيفهم فيهم اساسا وبتضطر تروح لميكانيكيه غصب عنك عشان مفيش غيرهم.. بس القديم زيه زى غيره

**تامر.محمد** · 18-11-2015 10:24 AM

حضرتك مش واخد بالك ان مستوى اسعار قطع غيار التسعينات حاجة و الالفينات حاجة تانية خالص

عربيات التسعينات في العالم كله مش هاتتكرر لأنها كانت بسيطة اوي و قطع غيارها كانت رخيصة اوي

في المقابل كل عربيات الالفينات بلا استثناء تقريبا تكنولوجيا اكتر و قطع غيار اغلى كتير حتى جوة نفس الماركة