الموضوع: مطلوب مشاوره ومساعده عاجله

مشكلة الجيرة مشكلة ازلية في ظل غياب قوانين شفافة وواضحة وقوة تنفيذ
انا ساكن في الدور الاول واشترطت علي مالك العقار ان اللي يشتري الارضي ميبنيش ولا يقفل المساحة الخلفية
وطبعا كان كلام عيال باع لواحد صاحبه والمصيبة ان صاحبه ده زميلي في الشغل وكان شغال معايا من فتره طويله زي مراسل او سكرتير وكاجوال يعني باليومية وكان الكل بيعامله كويس لحد ما في يوم المدير العام قلب عليه ونقله ادارة تانية وكان بيعيط بالدموع علشان الادارة التانية مفيهاش سهر وبدلات وكنت بطمنه ان رزق ربنا واسع واذا به يصادف واحدة في الادارة الجديدة زي ما يكون ربنا بعتها مخصوص علشان يتعين علي ايدها لانها جت اعارة من شركة تانية ٨شهور ومعجبهاش الوضع ومشيت
المهم الشخص ده بنظام شبع بعد جوع نسي العيش والملح ونسي كم التعاطف اللي تعاطفناه معاه وبدأ يدور ازاي يأذيني يعني استغل اني في مصيف وبني حائط ودخل بيه تحت بلكونتي بحيث مبقاش ينفع احط اسهم حديد لمنع النط لانه دخل عشرة سنتس جوة البلكونه وجه في حته تانية بني حوائط دولاب تحت الشباك مع انه عنده فوق الاربعين متر حوائط بعيد عن شبابيكي اضطريت اقفل البلكونه حديد بالفين وربع
اذا به بعد سنه يستغل سفري للمصيف ويقفل المساحة الخلفيه كلها بحديد مربع يعني قفص ويرفع مستواه لنص بلاطة السقف تقريبا مع انه لما جبته امام مديريني ومديرونه السابقين اقسم انه هيأمني وهيعمل سور فكده القفص اللي عمله خلي اي حد يتفسح عليه ويفتح اي شباك بتاعي بسهوله اضطريت اعمل افتكاسات واختراعات علشان اعمل حديد للشبابيك وفي نفس الوقت يتفتح علشان المنشر وطبعا قوة التأمين مش ١٠٠٪‏ وكلفني الف ونص كمان وكل ده وبقاله تلات سنين بيشطب ويهد ويعيد ودوشة مستمرة وعمال وقرف وبقاله ييجي ست شهور بيجيب ولاده ومراته ويقضي اليوم ويروح بالليل وطبعا بيئة لا توصف واصوات وكلام مينفعش خالص
الكل بيقولي بيع واشتري في حته تانيه لانك مش هتستحمل
من شهر كده لقيت ولاده وعيال قرايبهم طالعين فوق الحديد وماشيين قدام شبابيكي ولا استئذان ولا احم ولا اي ذوق وبيدهنوا الحديد (السقف بتاع القفص) ورغي وغنا وهبل وقلة ذوق واخر الليل الساعة واحدة وهما ماشيين لقيتهم داهنين تحت احد شبابيكي كام روله سوده كانهم عاملين فاتورة للون وقفت ساعة ونص نايم علي قفصي الصدري وبطني علي حافة الشباك بحاول اطولها وانضفها وتاني يوم بسأل الولد انت عملت كده ليه قاليه اللون طرطش مني فقلت افرده وبعدين ادهنها مع الفرنده
طب يا ابني دي لون تاني خالص ولازم تدهن العمارة كلها
طبعها فضلت اعملها بسلك مواعين شيلت اللون الجديد والقديم
ودلوقتي وسائل الغلاسه متمثلة في الدوشة الرهيبة وتعمد الركن مكاني وترك باب العمارة مفتوح طالما هم موجودون وعن القطط والحشرات حدث ولا حرج
والافظع ركب كشافات ليدات في القفص نورها بيدخل من الشيش ويضرب في السقف عندي ولا كأني منور نور الغرفة عندي وانا مبعرفش انام في النور ولو ركبت بلاك اوت مش هيدخل نسمة هوا
فعلا مخنوق وبقي مجرد صوته او رؤيه عربيته بتخليني هرجع ومش عارف اعمل ايه ومفيش معايا سيولة اشتري حاجه متشطبة وجاهزة وفي نفس الوقت خايف ادفع مقدم لحد يطلع نصاب ومش قادر علي دوشة التشطيب والعمال وقرفهم
ومفيش ضمان لجيران جدد او حد يعمل برج اتصالات يعيشني في رعب السرطان انا وابني

المنظومة كلها فاسدة ومش لاقي حلول