الموضوع: تنصحونى بأيه...الفيات سينا ولا الفيات تمبرا ؟

عايز أشترى عربية ومحتار بين الفيات سينا والفيات تمبرا وعايز حد يرجح لى واحدة على التانية ودى المعلومات اللى جمعتها عن العربيتين وياريت لو فى حاجة عايزة تصحيح
1- الموديل: الأحدث لصالح السينا رغم أن فى تمبرا لغاية سنة 2000 و 2001 لكن من تقفيل شركة النصر والكل بينصح بالإبتعاد عنها علشان كدة أى عربية تمبرا كويسة لازم يكون موديلها ما بين 1990 و 1996 أما السينا فيمكن ايجاد منها موديل 2002 او 2004
2- السعر وإعادة البيع: السينا أغلى حاجة بسيطة عن التمبرا يعنى ممكن الفرق لا يتجاوز الخمس ألاف جنية أما إعادة البيع فهى فى صالح التمبرا وليس السينا
3- الصالون: صالون التمبرا أوسع بالإضافة الى أن التابلوه الديجيتال موجود فيها ودا بيخليها مميزة عن السينا
4- الشكل الأحدث: فى صالح السينا لأن كبوت التمبرا فيه كتير من الشاهين
5- قوة الموتور: لصالح التمبرا رغم أن الاتنين متوفر منهم الـ 1600 سى سى والـ 1400 سى سى لكن مشكلة السينا 1600 أن حوضها ضيق وبصعوبة تلاقى صنايعى يعرف يشتغل فيها علشان كدة الكل بينصح بالسينا الـ 1400 وطبعا مع تشغيل التكييف هيأثر جامد على سحب العربية أما التمبرا فالكل بينصح فيها بالـ 1600 سواء كاربراتير أو أنجيكشن والأتنين متوفرين
6- قطع الغيار: أعتقد أن الاتنين سعرهم قريب من بعض يعنى ممكن حاجة تكون أغلى فى التمبرا لكن أرخص فى السينا والعكس وأعتقد توافرهم واحد وان كان البعض بيقول أن توافر قطع غيار التمبرا أكتر (ياريت حد يأكد المعلومة دى أو ينفيها) لكن زى ما قولنا أن المشكلة فى أن حوض السينا ضيق ومش أى صنايعى يعرف يشتغل فيها
7- العفشة: عفشة السينا أنعم من التمبرا
8- الصاج: الكل بيشكر فى صاج التمبرا وبيقول أن سمكه 1.6 ميلى وده بيديها قوة ومتانة أما عن صاج السينا فأنا لم أعرف هل هو بنفس السمك أم لا
9- الإرتفاع عن الأرض: التمبرا واطية خصوصا من قدام يعنى هنلمع بيها المطبات فى الشوارع على عكس السينا اللى أعلى منها لكن العيب ده بيتحول لميزة فى السرعات العالية حيث يعطى إنخفاض العربية ثبات أكتر وبسؤالى لأكتر من شخص عنده عربية تمبرا أكد أنه وصل بها لسرعة 160 كم و 170 كم فى الساعة بدون أى مشاكل خصوصا وأن التمبرا بينزل منها تربو خارج مصر ودا مستحيل يكون موجود فى أى عربية الا اذا كان ثباتها ممتاز فى السرعات العالية

المشاركة الأصلية كتبت بواسطة rotanamasoud

ربنا يباركلك ويرزقك
الاسعار بتختلف عشان الحاله بس الكلام من30-35 بما يرضى الله طبعا فى اقل وفى اعلى بس ده المتوسط
والعربيات دى السليم والحاله والمواصفات بتكون ملهاش حل بصراحه اللى معايا كانت بتاعت ظابط فكان بيختار بمزاج ربنا يوقعك فى حاجه مشابهها وبيسموها المانى

انا عارف فعلا انهم بيسموها ألمانى رغم أنها ايطالى لكن بيقولوا أنها مواصفات خاصة...طيب وهل قطع غيارها هى نفسها العادية ولا هتعب على ما ألاقيها ومعلش هتقل عليك فى الأسئلة هل التمبرا بتسخن زى كتير من الفيات ولا هيسهل التخلص من المشكلة دى اذا ظبت الرادياتير أو ركبت مروحة ستة ريشة