الموضوع: نيسان سنترا تجميع مصري ولا ياريس 1500 cc

العربيتين دول محتار مابينهم أوي صراحة

السنترا عجباني في كل حاجه إلا 3 حاجات:

- قلقان من التقفيل المصري، هل لعب في حاجه ولا أول دفعه هاتكون كويسه، ولما تنتشر يبدأ اللعب.
- قطع الغيار رغم توافرها على حد علمي بس غاليه حبتين، والتوكيل مودرن موتورز ربما هو اللي هاشتري منه وهو اللي هاصين عنده لأن فيه واحد منه في محافظتي، فامش عارف صراحة فيه ناس كتير بتشكي منه بس بتواريخ قديمه، فهل هو اتحسن ولا أبعد عن السكه دي.
- شكلها جميل بس لي تعلقات على شكلها، ودي مسأله ذوق يعني ممكن أتغاضى عنها لو الرأي العام يرجحلي النيسان.



مميزاتها من وجهة نظري، من خلال قراءة ورؤية مرئيات كتير:

- فخمة أوي ومريحة وإمكانيات عاليه والطابلوه معمول على مزاجي هو والعدادات والدريكسيون والكونسول والأماكن التخزينية والشنطة والكراسي الخلفية اللي ممكن طيها، هي عمليه جدا جدا.
- وزنها حلو (1218 كجم) بيوحي بإن عضمها ناشف إلى حد ما وعاليه على الأرض وفي نفس الوقت ركابها بيقولو ثابته أوي.
- الفتيس بيقولوا حكاية لأنه CVT بمعنى التنقل الصامت ولا تحس بالانتقال والـ RPM بيزيد والنقلات شغاله وانت مش حاسس، بس كان نفسي يكون تيب ترونيك كمان.
- تسارع العربية قوي وموتور وحوض تمام، بس بيقال استهلاك البنزين من 9 إلى 10 لتر لكل 100 كم، مش عارف ده صح ولا لأ لأن العربيه كل ماتشوف أو تقرأ حاجه رسميه يقولك موفره في البنزين.
- فيه فيديو لملاك سنترا إيجيب، بيقولو إن مودرن موتورز منزله كاسيت تاتش نوعه كاسكا ونافيجاشن، فهل ده موجود فعلا في اللي بتتقفل في مصر ولا كاسيت سي دي باناسونيك
هذا ما أتذكره بالنسبة للنيسان...


بالنسبة للياريس:

عجباني جدا برده ولكن فيه حاجات:

- تهوية الموتور في الحوض مفتوحه على الجنب الشمال داخل الحوض وفوق يعني لو بتضف العربيه أو ميه دخلت أو رش أو مطر أي حاجه من دي وصلت للفتحه دي هاتوصل للموتور من أيسر الطرق.
- كتير من التعليقات وجدتها عن إن العربية بتحك في المطبات بسهولة، يعني واحد واخد المطب بسرعه أو محمل أو الكاوتش هواه مش مظبوط هاتحك هاتحك في مطبات بلدنا المحروسة.
- بيقال من واحد صديق لي ويفهم كويس وبيروح معارض كتير ومتابع السيارات كويس، بيقول إن العربية الاكصدام متربط زي ماتقول على خط واحد بحيث أقل خبطه تزعل الدنيا اللي قدام دي كلها.
- مافيهاش أوبش كتير، تصل إلى حد الفقر في الأوبشن.
- يقال إن فتحات التكييف اليمين والشمال ضيقه ومابتخرجش تهويه كويس رغم إن التكييف فريزر بالإجماع.
- مش محمله زي النيسان في الوزن.
- مش عاليه زي النيسان.
- مافيش عداد حرارة .
- مش بقوة موتور نيسان اللي صراحه غبي أوي 118 حصان تحس بيهم (فيديو الراجل محمل 4 ومشغل تكييف والعربيه ماشاء الله ثور).

مميزات الياريس بالنسبة لي:

- موفره في البنزين بالإجماع وسحبها مش بطال، بل كويس وتكيف تلاجه.
- شكلها جميل جدا أحسن من شكل النيسان بالنسبة لي.
- اعتمادية جدا كعادة تويوتا، وتقفيل تايلاندي.
- شنطه واسعه برده.
- وزنها مش خفيف ولا تقيل، أقل من المتوسط (1070-1095 كجم). الوزن ده حاجه مهمه بالنسبة لي لأن ماحبش العربيه اللي تركن عليها كوعك يعلم فيها.

فما قولكم دام فضلكم ؟؟؟
وآسف على الإطالة، ومنتظر ردودكم
بدوووووووون تحيز.

المعلومات دي قابله للتصحيح، بس يكون من مصدر موثوق وليس بوجهة نظر فقط فضلا ...