الموضوع: افضل سيارة ب 40000 جنيه وعناوين المعارض

السلام عليكم ورحمة الله وبركاته

اولا انا حابب اشكر كل الاعضاء والادارة على هذا المنتدى الرائع بمعنى الكلمه
ثانيا كنت عايز مساعدتكم فى الاتى
نويت بأمر الله اشترى عربيه وانا معلوماتى عن العربيات قليلة جدا والميزانيه اخرها 45000 جنيه
حطيط شوية قواعد امشى عليها حسب خبرتى فى العربيات عشان العربيه ماتتعبنيش
تبقى موديل 2005 او اعلى وياحبذا لو كانت ماشية اقل من 100000 كيلو
فقعدت ادور على احسن العربيات ولقيت الاتى
هيونداى اكسنت 2005-2006
شاهين 2005-2007
دايو لانوس 2 2009-2010
سوزوكى ماروتى 2012-2014 (ممكن تبقى ب 35000 او 40000)
سوزوكى التو 2005-2008

انا شاب فى بداية حياتى وعايزها تخدمنى فى مشاوير جوه القاهرة (ساكن عند العبور وشغلى فى مدينة نصر واهلى فى شبرا فهاتبقى على اد المشاوير دى) ومش مهم عندى اوى الشكل او الكماليات اد مامهم انها ماتقرفنيش وكل شوية اروح بيها للميكانيكى

عايز رايكم اختار انه واحده منهم والاسباب وياريت لو تبقى عن تجربه

وسؤال تانى مهم جدا
انا هاشتريها ان شاء الله تبع البنك - والبنك عايز معرض يتعامل معاه مش اشخاص وشغل المعارض ناس كتير قلقتنى منه
كلمت اكتر من معرض مشهود لهم بس كلهم بيتعاملوا فى الحجات المستعمله العاليه
فياريت لو حد يعرف معرض كويس والاقى عنده اى حاجه من العربيات دى يبقى جزاه الله خييير

بجدد شكرى للمنتدى الجميل دة ومستنى ردودكم ياشباب

شكرا ياشباب على الردود
انا قدامي دلوقتى كيا سيفيا موديل 2000 اتوماتيك على 45000 جنيه
انا لسه هاخلى الميكانيكى يبص عليها واعرف حالتها بالتفاصيل بس لو حالتها كويسه اتوكل على ربنا واشتريها ولا فيه مشاكل معروفه للسيفيا ؟
ارجو الافادة ياشباب