يا اهل الخبرة فتيس النترا

**mohammed adel** · 17-01-2016 11:02 PM

انا اشتريت النترا 2008 اوتوماتيك ماشية 130000 كم العربية بتمشى للامام كويسة جدا و احيان بحس بضعف بسيط مع المشي الكتير لكن مش ملحوظ بس المشكلة ان لما اجيب الفتيس على ال R وارجع للخلف العربية بتبقى ضعبيفة فى الرجوع الكلام ده لو ( على ارض مستوية انما على ارض عالية حاجة بسيطة جدا العربية مابترجعش نهائى للخلف كأنها على حرف ال N ) وال rpm بيعلى جداااا فى كلا الحالتين - الميكانيكى قاللى ان المشكلة فى ( الباند المسئول عن الرجوع للخلف ) بس انا قلتله غير زيت الفتيس والفلتر و فعلا غيرهم بس بدون فائدة وهو بأمانة من الاول قاللى ان التغيير مش هيجيب نتيجة وده اللى حصل و بعد كدة اتصلت بمهندس تانى قاللى لازم تغير الفتيس .... مش عارف اعمل ايه !! وماقدرش ارجع العربية لصاحبها - و ربنا هو اعلم ايه الظروف العملية مش ناقصة و ربنا اعلم بحالة الواحد بسبب الموضوع ده ياريت تنصحونى اروح لمين و ايه تفاصيل المشكلة
جزاكم الله خيرااااااااااااا جميعا

**tameem2010** · 17-01-2016 11:41 PM

الفتيس فيه مشكلة طبعا
امشي بيه لحد ما يجيب اخره وهو مش هيجيب اخره دلوقتي لسه ادامه وقت
بعد كده الفتيس كله بيترمي وبيجي واحد استيراد لان الفتيس الاوتوماتيك محدش يعرف يعمل فيه حاجة
وعموما الفتيس حتى لو مانويل وهتصلحه يبقى بترمي فلوسك في الارض وبدون جدوى
امشي بيه كده لحد ما ربنا يسهل وربنا يعوض عليك لان فتيس الالنترا مش رخيص ومش هيقل عن 5000 جنيه

**pepo2011** · 18-01-2016 08:18 AM

فعلا فتيس باظ
وتمنه من 4500 ل 6000

خليك علي ده لحد مايمووووت خالص

**mohammed adel** · 18-01-2016 09:46 AM

المشكلة فى الرجوع للخلف !! ده انا خايف اروح بيها اى مكان اتزنق وماعرفش ارجع لورا

**pepo2011** · 18-01-2016 10:32 AM

شوف حد بتاع فتيسات اوتوماتيك الاول يبص عليه واسال واحد واتنين عشان تتاكد ممكن يكون بلف او حساس وتبقي بسيطة

**SHERIF N** · 18-01-2016 02:44 PM

المشاركة الأصلية كتبت بواسطة mohammed adel

المشكلة فى الرجوع للخلف !! ده انا خايف اروح بيها اى مكان اتزنق وماعرفش ارجع لورا

بص يا باشا ممكن تكون حاجه بسيطه وممكن فعلا يكون الفتيس بايظ فعلا
انتا لازم تروح لواحد متخصص وبيفهم
انا عن نفسى مجرب ورشه المهندس هانى ميخائيل
دة مهندس فى غبور وبصراحه بيفهم بجد وما بيلفش ويدور خليه يكشف على العربيه وهيقولك المفيد وهو مش غالى
انتا ممكن تبعتله على الجروب دة هو فاتح صافحه بتاعته
واسمه speed service center

**drhope3003** · 18-01-2016 03:34 PM

ممكن يكون عيب قاتل و ممكن يكون عيب تافه زى بلف او فيه مشكلة للوك بتاع التورك كونفيرتر و ممكن تبقى بريك او باند و ربنا يستر

**mohammed adel** · 18-01-2016 05:44 PM

طيب انا النهاردة لاحظت ان الموتور فيه رجة ( بيهتز) و كمان العربية بتاكل بنزين -- هل ده ليه علاقة و لا ايه الموضوع ؟؟ الواحد محتار ياريت حد يكون حصل معاه نفس المشكلة او عنده خبرة يفيدنا افضل من التشتت اللى الواحد فيه

**mohammed adel** · 18-01-2016 05:48 PM

المشاركة الأصلية كتبت بواسطة drhope3003

ممكن يكون عيب قاتل و ممكن يكون عيب تافه زى بلف او فيه مشكلة للوك بتاع التورك كونفيرتر و ممكن تبقى بريك او باند و ربنا يستر

فيه ميكانيكى قاللى انه عيب ( باند المرشالير) طيب لو كلامه صح هل الباند بيتباع لوحدة و سعره كام ؟؟

**tameem2010** · 19-01-2016 12:17 AM

هزة الموتور ديه ممكن تكون قواعد موتور او قواعد فتيس ديه بسيطة
وممكن يكون الحرق مش منتظم نتيجة تلف بوجيهات او رشاشات مخنوقة (بس ده بيظهر بتنتيش على السرعات )
رجة الموتور مش مشكلة