تجديد المياه لبطارية سائلة

**maka** · 20-01-2016 04:59 PM

عاوز اجدد مياه لبطارية سائلة , احط حامض قد ايه و مياه قد ايه . والحامض يكون بتركيز كام .؟

**م/أحمد عبد الفتاح** · 20-01-2016 05:53 PM

ممكن توديها لبتاع البطاريات وهو يقوم بالمهمة دى الا لو انت عاوز تعمل الموضوع ده بنفسك يبقى لازم يكون عندك تونجر شحن صغير ومقياس كثافة بطاريات ( هيدروميتر) والطريقة كالاتى :
- حاتفضى السائل القديم من البطارية وتقفل الغطيان بتاعتها كويس .
- حاتغسلها من برة بمية سخنة من الحنفية عليها شوية بيكربونات صوديوم وليفة مواعين من السفنج اللى بيتباعوا دول وتتاكد انك نضفت الصوابع كمان كويس وبعدين تشطفها بمية من الحنفية عادية وتنشفها .
- حاتغسلها من جوة علشان بيبقى عليها ملح مترسب على الخلايا وده عن طريق انك تملاها ميه مقطرة للعلامة وبعدين تحطها على الشحن ليلة وبعدين تفضيها .
- تملى البطارية بالسائل الجديد لغاية العلامة بكثافة من ١.٢٥ الى ١.٢٩ وده بتعرفه عن طريق الهيدروميتر وبتشتريه من عند بتاع البطاريات لو لاقيته زايد شوية فى الكثافة زود عليه شوية مية مقطرة لغاية الكثافة ماتتظبط معاك - وبعدين تحطها على الشحن ليلة .
تشحم الصوابع بشوية فازلين وتغسل القاعدة بتاعة البطارية اللى فى العربية هى والقواطيش برضه بمية سخنة وبيكربونات.
- تركب البطارية فى العربية وتعمل مشوار سالك مافيهوش توقف كتير يعنى طريق طوالى حلو نص ساعة كده .

**م/أحمد عبد الفتاح** · 22-01-2016 01:14 PM

المشاركة الأصلية كتبت بواسطة maka

اشكرك شكرا جزيلا باشمهندس احمد على الشرح الوافى . والحمد لله معى هيدروميتر وتونجر

هحتاج كام لتر من السائل الجديد ( المياه الحامية ) لبطارية 55 باذن الله ؟؟

ازاى اقدر اكون السائل بالتركيز ده ؟؟ انا حاليا معى لتر الا ربع حامض كبريتيك بتركيز 30% ولترين مياه مقطرة-خايف ابدء الكمية متكفيش-

هل اصب زجاجة الحامض فى وعاء خارجى وازود عليها مياه مقطرة لحد ما توصل للكثافة دى ام ماذا ؟؟

شخص كريم نصحنى انى احط بيكربوناتو فى عيون البطارية على السائل القديم. هل ده صح ؟ وهل ليه اضرار؟

خالص تحياتى

بصراحة معرفش الكمية اللازمة لبطارية ٥٥ امبير بس ممكن لما تفضى السائل القديم منها تعرف انت حاتعوز قد ايه . بالنسبة للحامض اللى عندك حتجرب كمية من الحامض حوالى ٢٥ سم مكعب مع مثلا ٢٥ سم مكعب مياه مقطرة بواسطة سرنجة وبعدين تقيس كثافتهم بالهيدروميتر وتشوف هل تزود ميه مقطرة تانى ولا لا لغاية ماتعرف النسبة بتاعة الخلط النهائية - والخلط بتاع الحامض مع المية المقطرة انك تحط المية المقطرة فى وعاء وبعدين تصب عليها الحامض مش العكس . بس اعتقد انك حتحتاج ميه مقطرة زيادة عن كده علشان غسيل البطارية من الداخل - وماتحطش كربونات داخل البطارية لانها حاتبوظها