الموضوع: العربية مش بتعدي 150 كم / الساعة !!

جرب تفضل على الرابع وما تنقلش... وخليك دايس .. المفروض تلاقي الـrpm بيعلى معاك.. وهيجيب معاك لحد الخط الأحمر.

ولما توصل لأول الخط الأحمر.. شوف ساعتها العربية ماشية على كام.

عموما.. النوبيرا آخرها 185 كم/س.. وفيه مواقع بتقول إنها 175 كم/س...


...

المشاركة الأصلية كتبت بواسطة م أحمد

دا اللينك بتاع الزميل : http://www.nilemotors.net/nile/48488...post3876058900

و بالنسبة لموضوع ال over drive كقاعدة عامة متفقين ان الترس الاكبر عزمه اكبر و سرعته اقل و العكس الترس الاصغر عزمه اصغر سرعته اكبر...يعنى حضرتك شايف فى موضوعنا دا ان ياخد العزم الاكبر من الغيار الرابع علشان يوصله للسرعة اللى عايزها...بس دا مش مانع للغيار الخامس خالص ان يبقى محدد بسرعة او علشان اعدى ال 150 لازم آخدهم من الرابع فقط...يعنى لو الموتور قوى ممكن ياخد الخامس من سرعة 60 مثلا بس هيبقى فيه تحميل على الموتور و الكلاتش

المسألة كلها يا بشمهندس هي علاقة عزم الموتور الناتج على دوران معين مقابل المقاومة اللي بتواجهها العربية..

في أغلب الأحوال.. الترس الأخير بيكون مصمم لتخفيض الدوران بدون الحصول على تسارع عالي أو حتى زيادة في السرعة عن حد معين.. لإن الموتور في الحالة دي مش هيقدر يزود السرعة عن الحد ده.


والمعلومة المؤكدة إن أي ترس نسبة تخفيضه أقل من 1 تبقى أوفردرايف.. وكل ما كانت أقل من الـ1 بكتير كل ما كانت قدرة الغيار على التسارع أقل.. وكمان السرعة اللي هيقف عندها فبل السرعة القصوى هتكون بدري.

دي نسب تخفيض فتيس النوبيرا:

الأول 3.55
التاني 2.05
الثالث 1.35
الرابع 0.97
الخامس 0.76
المارشيدير 3.33
الكورونا 4.18
وده مقاس الكاوتش 185/65r14
والخط الأحمر يبدأ من حوالي 6300 rpm

كده تقدر تحسب السرعة القصوى لكل غيار (نظريا).


وده مخطط السرعات .. عندي ملف إكسيل عامله من زمان بيحسبها.. تدخلله البيانات اللي فوق دي يطلعلك الرسمة دي.




نظريا.. الترس الأخير ممكن يخلي الدايو نوبيرا توصل لحد 223 كم/س... وده طبعا مش هيحصل.. وأقصى سرعة ممكن يوصلها الترس الخامس هي اللي هيوصلها الترس الرابع ومش هيزود عن كده.. ده باعتبار إن النقل حصل لما الدوران على الترس الرابع وصل للخط الأحمر.. والمتوقع كمان إن السرعة تقل (حتى لو كان الموتور مش مقفول).

والمؤكد كمان إن قدرة الترس الخامس على التسارع تختلف على حسب قدرة وكفاءة الموتور نفسه زي ما حضرتك ذكرت.



بالنسبة لموضوع قفل السرعة.. فمعلوماتي إن القفل ده اختياري وقامت بيه مرسيدس وبي إم دبليو بحيث إن سرعات سياراتها القوية ما تزيدش عن 250 كم/س.. وده "بالاتفاق" مع السلطات الألمانية...

المسألة اختيارية .. وحتى لو بقت إجبارية.. فاحنا بنتكلم على عربية موديل 1999... قبل ما الموضوع يبقى إجباري (ده لو كان حصل).


خلي بالك إن احنا بنتكلم على حوالي 25 كيلو فرق عن السرعة القصوى (150 قصاد 175).. يعني كون إن الخامس يقف عند الـ150 ده طبيعي جدا.


...

المشاركة الأصلية كتبت بواسطة م أحمد

إزاى يا باشا السرعة مش هتزيد ...معاك ان السرعة هتقل لما ينقل على الخامس ..... بس سرعة لفات الموتور مش سرعة العربية...و سرعة العربية اكيد هتزيد بمرور الوقت لان عزم الموتور نقلته لنقطة جديدة اقل من اقصى عزم

و لو شفت المنحنى و بفرض انك ماشى على سرعة 110 على الرابع و لفات الموتور 4000 rpm و نقلت على الخامس فى اللحظة دى....ال rpm هيقل ل 3100 تقريبا بنفس السرعة ...يعنى لسا معايا عزم فى الموتور لسرعات اعلى بكتير

إلا لو تقصد ان الترس الخامس (الأوفردرايف) هيخفض من ناحية الموتور فقط و هيحافظ على السرعة زى الغيار اللى قبله من ناحية الفتيس ، بس بصراحة ما اعرفش ازاى ميكانيكيا الكلام دا ينفع و لا لأ ؟

طيب خلينا نتكلم واحدة واحدة :)

أنا ما قولتش خالص إن الغيار الخامس مش هيزود السرعة عن الرابع في كل الأحوال... إنما أنا قلت إن له حد أقصى مش هيقدر يزود عنه...

بمعنى إن الخامس هيزود السرعة زي ما حضرتك قلت وبمعدل تسارع أبطأ.. ولكن فيه نقطة معينة لما يوصلها مش هيقدر يزود عنها.. حتى لو ما كانش لسه ما وصلش لآخر مدى دورانه (الخط الأحمر).


اسمحلي اقتبس من كلام حضرتك اللي رديت بيه في موضوع http://www.nilemotors.net/Nile/47905...post3876034675

المشاركة الأصلية كتبت بواسطة م أحمد

الله ينور يا باشا
و إسمح لى بإضافة صغيرة أوى لما ذكر و هى العلاقة العكسية بين العزوم و السرعات...كل ما السرعة تعلى العزم يقل والعكس...لنفس الطاقة المتولدة من الموتور....علشان كدة بنطلع العربية على الترس الاول صاحب اقل سرعة و نطلع المطالع على الغيار الاقل...و عملية النقل للغيار الاعلى فى جميع انواع الفتايس لا تتم الا بعد وصول السيارة لسرعة و عزم مناسب للترس الاعلى تكفى لاكمال السير بدون توقف الموتور...و دا السبب ان العربية مش غيار رابع و خلاص :) تطلع بيه و تنزل بيه

يعنى التروس كما انها مختلفة فى السرعات فهى مختلفة فى العزوم (القوة بتحرك..و العزم بيدور)

وكلام حضرتك ده هو بالضبط التفسير لكلامي اللي عايز أقوله... ونقدر نختصره بالرسمتين دول:




خلينا نتكلم بشكل هندسي أكتر شوية:

موتور النوبيرا هو نفسه أحد مواتير أوبل.. والمعلومات اللي قدرت أجيبها إن قدرته القصوى 78 كيلووات (106 حصان) عند 5800 د.د... وعزمه الأقصى 145 نيوتن/م عند 3800 د.د

ده مخطط القدرة-العزم بتاعه




طبعا حضرتك واخد بالك إن العزم بيبدأ يقل بوضوح بعد الـ3800 RPM...

حط الرسم ده جنب مخطط سرعات الجيربوكس



هتلاقي إن أقصى عزم بيكون عند سرعة 105 تقريبا على الرابع... أو عند 135 تقريبا على الخامس

كل ما تزود سرعتك العزم بيقل... وتخيل إنك لما توصل دوران الموتور لمستوى 5000 RPM بيبقى فيه نفس مستوى العزم اللي بيطلع عند دوران 2500 RPM تقريبا.


فاللي بيحصل فعليا إن العزم - وانت ماشي عالخامس (أو أي غيار أوفردرايف) - هيبقى قليل جدا في مواجهة وزن العربية ومقاومة الهوا اللي بتزيد بشكل كبير جدا كل ما تزود سرعتك... لحد ما تيجي لحظة التعادل اللي الموتور مش هيكون فيه عزم كافي لزيادة السرعة أكتر من كده.

لو عشقت الغيار الرابع (أو الغيار اللي نسبة تخفيضه 1:1) العزم ده هيزيد.. ويقدر يوصل العربية لحد نهاية مدى دورانه (بداية الخط الأحمر).

لو أقدر أجيب أرقام فعلية للمقارنة كنت جبتها والله..

بس للأسف.. مش عارف أجيب مراجع للمعلومة دي دلوقتي.. وكل اللي قدرت أوصلله على النت مجرد مناقشات في منتديات (هدور تاني لحد ما أجيب مصدر يعتمد عليه)... بس أنا متأكد من المعلومة لإني قريتها من زمان (وأكتر من مرة) في مجلة سبورأوتو وبالذات في تجارب السيارات اللي كانوا بيعملوها... والتجربة العملية بتثبت المعلومة كل يوم.


...