السلام عليكم و رحمه الله و بركاته
اخواتي الاعضاء في المنتدي الجميل اللي بيجمع كل المشاكل و بنستفيد منه كلنا

انا معايا عربيه هونداي الينترا 2007 كنت شاريها مستعمله و كانت حالتها ممتازه و فوق الممتازه لانها كانت مع واحده و محافظه عليها
و كانت سواقتها بالنسبه لي متعه
و لما بدء الدبرياش يعلي نصحوني اهل الخبره انه طقم الدبرياش محتاج يتغير و لاني مش عايز العب في العربيه بره اخترت اني اعملها في التوكيل
اتصلت بصيانه غبور عشان اخد موعد بس لقيت انه عندهم حجوزات كتير و نصحني الاخ اللي في الصيانه اني اروح لاحد المراكز المعتمده منهم .. و هما مركزين اثنين بس .... واحد في القصر العيني و واحد في زهراء المعادي
و لقيت انه الاقرب اني اروح للقصر العيني ...
روحت و قابلني المهندس محمد و هو راجل كبير و مهذب و قالي استريح و احنا حنقوم باللازم
المهم بعد ما تم التغيير و اخدت العربيه اجربها لقيت انه الغيار الاول في مشكله و قعد الصنايعي اللي هناك يحاول و ما عرفش يوصل لحاجه و قالي جرب و شوف و لو في حاجه هاتها .. استلمت العربيه كويسه و دواسه الدبرياش ناعمه و واطيه و زي الفل
و بعد ما خرجت من عندهم العربيه كان سحبها حلو جدا بس في رعشه في الطلعه و الغيار الاول في مشكله لازم العربيه تقف خالص عشان الاولاني يعشق
رجعتلهم تاني و قابلني واحد اسمه المهندس علي (و ده استاذ في انه يطلعلك العربيه ممتازه و ما فيهاش حاجه )... و فضل يغير و يظبط و بصراحه غدل الغيار الاول و غير البوجيهات و سحب الهوا من زيت الباكم و قالي الدبرياج حيرفع معاك شويه بس اخدت العربيه سحبها اقل و دواسه الدبرياش عاليه جدا ...
مشيت بيها شويه و قولت حتطبع بس للاسف الموضوع بدء يزداد سوء
اتصلت بيه و قالي هاتها نشوف فيها ايه ولو محتاجه طقم نغيرلها الطعم
و لما روحت جرب العربيه علي الواقف و قالي الطقم زي الفل ما فيهوش حاجه
كشف عليها بالجهاز و لقي ان الموتور مش مظبوط و قال اننا حنشوف الموتور و فضل يغير في البوبينات و البوجيهات و لما فك البوجيهات لقاها مرطبه و فيها صدي و قال لازم نعرف العيب منين .. و للعلم انه غير البوبيتات بطقم جديد و قاس العربيه بالجهاز و لقاها برضو مش كويسه( ال rpm مش مظبوط ) لحد ما قرر ان البوبينات في واحده منهم بايظه و مع اني كنت داخل بالعربيه كويسه بشتكي من الدبرياش خرجت العربيه متلته معرفش ازاي ... و نسينا موضوع الرطوبه اللي في البوجيهات و مسك في البوبينه ...
قولتله طيب الدواسه عاليه في الدبرياش و قال انها ما فيهاش رجلاش بالرغم من ان الدواسه كانت زي الفل اما غيروا الطقم اول مره
المهم في الاخر انا عايز اقول ان الصنايعيه اللي في المركز اللي المفروض انه تابع للتوكيل زيهم زي بره و يمكن بره احسن بكتير ... و المهندسين هناك مش المهم عنده انه يفهم ايه المشكله اد ما هو عايز يوضح انه ما فيش فيها عيب طالما انت حتعمل الحاجه في الضمان و مش حيستفيد بفلوس

و بصراحه حبيت اقولكم تجربتي مع المركز ده و انصح بقيه الاعضاء بانهم يتعاملو معاه في حدود الصيانات العاديه و بس
لكن في اساسيات العربيه يستحسن يعملوها بره لانهم مش فاهمين كويس
و انا ما كنتش راضي بالمره عن زياراتي ليهم بخصوص تغيير طقم الدبرياش و الي الان الدبرياش عالي و حياكل الاسطوانه الي المفروض انها ليسه جديده و للاسف ما عندهمش حل
تحياتي ... و تمنياتي لكم بالتوفيق