عربيتى 504 محتار ابيع ولا اشد

**mido452** · 07-03-2016 11:58 PM

العربيه موديل 78 gl فابريكا جوه
لسه شاريها اتعلمت عليها سواقه بس بقيت غاويها
كنت عاوز اشد واصرف عشان عفشتها تعبت وعاوزه كوبلن وخبطتها فالرفارف الاماميه ردتها بس عاوزه تتغير عشان شكل العربيه مبقاش مظبوط
وكده كده كنت هشدبالمره عشان هتدخل فحص شهر 8 وهنقل ملكيه
بس بعد مشافها واحد وقلب فيها قالى بلاش واخلص منها وهات واحده مشدوده عشان دى هتكلفك اوى ومتستهلش عشان مغيره دواسات امامى وكرتيرات ورا ورشه شنطه وشويه بنط لحام فى قوايم البيبان
بس الماتور تمام وفى السحب والجرى بعشقها
الحل أيه ؟
ولو هشد هتكلفنى كام
ولو ابيع اخرها كام

**Colin Chapman** · 08-03-2016 01:42 AM

**ali ashraf** · 08-03-2016 04:25 AM

ال 504 من العربيات الشديدة و اللى بيبان فيها التجديد و مادام الموتور سحبه كويس و انت سقتها و مريحاك , خسارة تبيعها و اللى تعرفه احسن من اللى متعرفوش , يمكن اقولك بعها لو هتجيب عربية على الزيرو انما مستعمل بمستعمل خليك فى اللى جربته , ثم ان حضرتك بتقول انك اخذت على العربية و اتعلقت بها طب اجى بعد كده ابيعها , خلى البيع ان شاء الله على عربية زيرو و بالتوفيق ان شاء الله

**م أحمد** · 08-03-2016 05:50 AM

هل تعلم ان سعر موتورها حاليا وصل 17 الف جنيه
و هل تعلم شدها بوية و سمكرة من 2500 ل 3000 ج و لو دخلت الصالون زود كمان الف
لو الكورونا سليمة كمان يبقى اغلى حاجات عندك فى العربية مظبوطين

**عقرب عجوز** · 08-03-2016 06:11 AM

الي تعرفه احسن مالي متعرفوش خلي البيع لو هتجيب زيرو او كسر الزيرو متحطش نفسك في رسك ممكن يخليك تلبس في عربية تقرفك شد وعيش دة الأسد الفرنسااااوي يا باشا

**pepo2011** · 08-03-2016 10:17 AM

لو معندكش شغل في الماتور يبقي شدها طبعا
لكن لو هاتصرف يبقي بيع واخلص منها
سمكرة ودوكو الاتنين 4000 بوية الماني او ايطالي خصوصا لو اللون ميتاليك
لو محتاج تظبيط كهربا يعني لمبات او فوانيس او محتاج شغل سروجي او عفشة كل ده بمصاريف تاني
انت اللي تقدر تحكم لوحدك

**mido452** · 08-03-2016 10:18 AM

شكرا لأراء حضراتكم ونا شايف مجتمعين على الشد

حيث كده انا اشتريتها من شهرين ب21 الف وكنت فرحان وحاسس ان السعر لقطه بس لما عرفت الرقم الى هشدها بيه من غير ماحط تكييف وفتيس اوتو مع كلام الشخص الى عابها وطلع القطط الفطسانه فيها قولت يوم مابيع هخسر كتير اوى كده مش هتلم انا لو بيعت وكسبت فيها ووقعت واحده سعرها مرتاح ومظبوطه شويه عنها مش هتغرمنى شد وممكن احط الكماليات الى عاوزها فيها علطول

فياريت اعرف ممكن توصل معايا كام وتستاهل ولا
هى كده عاوزه سمكره ودهان وتغيير رفارف وممكن صدر بالمره واكيد ممكن تتغير حجات فى الكهربا لان منظر السلوك الملحمه واضح والعدادات فى حجات مش شغاله والكورونا بترشح وعفشتها نشفه فى المطبات وبترزع مع اقل مطب لازم اسايس اوى وعاوزه 2 كوبلن
نيجى للفرش اكيد هشد نضافه لان فى مقطع فى الارضيه

**pepo2011** · 08-03-2016 10:50 AM

لا كده انت بتتكلم يمكن في 10000
بيع افضل
وزي ماتجيب كفاية العطلة عند الصنايعي

**م أحمد** · 08-03-2016 10:53 AM

المشاركة الأصلية كتبت بواسطة mido452

والكورونا بترشح

دا مش عيب....العيب انها تعمل ورة و تبقى مفوتة...و خلى بالك ان الكورونا السليمة من الحاجات الشحيحة جدا يمكن اكتر من الموتور

و لازم العربية تتشحم كل فترة و عفشتها لو مظبوطة هتعجبك اوى

**ali ashraf** · 08-03-2016 12:08 PM

متزعلش منى بس انت مستعجل شوية , العربية حضرتك بتقول لسه شاريها و اتعلمت عليها و انك غاويها , ممكن تبيعها و تقع فى عربية تخليك تكره اليوم اللى اتعلمت فيه السواقه . من الواضح ان دى اول مرة تشترى عربية علشان كده متستعجلش انت لسه بتتعلم مش بس السواقة و انما موضوع العربيات بصورة عامة التعامل مع الحرفيين , شراء قطع الغيار , الخ , ثانيا مفيش داعى تصلح كل حاجة مرة واحدة و تصعبها على نفسك , اعمل الحاجات المهمة فقط و بعد كدة نقنق فيها بمعنى لو فاضى و معاك قرشين اتسلى فى العربية شوية و خلى ايدك فيها منه تتعلم ومنه هتلقيها ما شاء الله بقت عروسة و شوية شوية.