الموضوع: مية قربة الريداتير بتنقص باستمرار (فيرنا )

المشاركة الأصلية كتبت بواسطة wael6

السلام عليكم ورحمة الله
فيرنا اوتو 2013 103 الف كم
مية قربة الريداتير بتنقص كل يومين وبزودها
اثناء سير السيارة مية القربة بتزيد وعند ما السيارة تقف تبرد المياه بتنقص
والريداتير مش بينقص هو واقف على قيمة الزور بس
انا كنت شاكك فى غطاء الريداتير غيرته مرتين بغطا اصلي
سالت بتاع الريداتيرات
قالى ده طبيعي ان السكس بلف بتاع الغطاء بيودي ويجيب من القربة خلال التشغيل
بس مش عارف ليه انا مش مقتنع ؟
واخيرا حطيت كرتونه تحت العربية وهى بارده لقيت ترشيح بسيط من المياهمن تحت الفتيس والريداتير
مع اعلم انى غسلت دورة المياه وغيرت المياه وبعد اسبوعين لقيت صدا فى القربة مع انها اتخلعت بره واتغسلت
اسف جدا للاطالة
وشكرا جزيلا

بص يا فندم حضرتك انا تقريبا كانت عندي نفس المشكله
اولا حضرتك عندك ترموستات الكوعه و لا شايله زى معظم الناس ما بتعمل
لو عند حضرتك ترموستات الكوعه اتمني تتاكد انه شغال و دا عن طريق انك توقف العربيه و تشغل الماتور و تسيبها تسخن و تمسك الخرطوم اللي طالع من اللماتور لو حسيت انه مره واحده بيسخن مره واحده و يبتدي الخرطوم يبرد كده يبقي تمام الترموستات شغال لو مش اشتغل و دا متوقع ف الجو البرد يا فندم يبقي تراقب الهوا اللي بيطلع لما المروحه تشتغل لو الهوا سخن يبقي المفروض الترموستات يشتغل لو الهوا بارد يبقي تفصل فيشه المروحه دقيقه او اتنين عشان تسيب المايه تسخن جوا الماتور و تخلي الترموستا يفتح كل ده احنا بنتاكد من شغل الترموستات لو شغال يبقي حضرتك تكمل معايا قرايه لو مش شغال يبقي حضرتك هاتغيره و تكمل قرايه بردو هههههههههههه
نيجي بقي للراديتير افتحه و العربيه سخنه و سيبه شويه لو لقيته بيطلع هوا كتبير يبقي تفتح غطا الهوا و تحط بؤق سعادتك مكان الغطا و تشيل الخرطوم اللي طالع من القربه للراديتير و تنفخ هتلاقي مايه طالعه مكان الخرطوم يبقي كده تمام و لو مش طلعت مايه يبقي تسلكه باي حاجه رفيعه و كده يبقي تمام اخر حاجه بقي حضرتك تجيب ازازه المايه بعد ده كله و تقف جنب الراديتير و تتفرج هتلاقي المايه بتنقص من الراديتير و تزيد تاني يبقي كده تمام كله زي الفل سعادتك
حضرتك بس الاول تقدر تفيدني و انا اتابع معاك يا تري فيه ترموستات للكوعه و لا مفصول يا فندم
اتمني تتقبل مروري يا فندم و ممكن حضرتك اقولك علي طريقه تنضف الدوره كلها و كمان تغير الترموستات او تحله و تجربه برا العربيه و دى التجربه التمام بعيد عن الاحساس بالخرطوم
اتمني تتقبل مرورى و تصححلي لو غلطت ف حاجه

حضرتك الصدا ف القربه بعد ما اتنضفت يبقي شغاله تمام و كده هي اخدت الصدا من الدوره يبقي توصيلتها تمام اوي
يبقي تقدر حضرتك تفيدني بس ف وجود الترموستات او عدمه

شكرا لحضراتكم جميعا
هو الترموستات الاصلي بتاعها مغيرتوش
كان من حوالى سنتين الكوعة اتخرمت وغيرتها والميكانيكي قالى الترموستات سليم
باذن الله هختبر عمل الترومستات
انا لقيت الكاوتشه اللى بداخل غطا القربة مقفعة وغيرتها
هل ممكن تكون بتسرب ولالا ؟

انا غيرت غطا الريداتير بغطا اصلى

متابع حضرتكم
وشكرا جزيلا

حضرتك تقصد ايه بغطا الهوا هل غطا الريدايتر ؟

الريداتير الحمد لله مبينقصش خالص ؟

لا مفيش ميه ع الفتيس مع العلم انى حاطط ميه خضرا
وشكرا