ايه رايكم في سبرانزا m12

**Sharkeyboy** · 12-05-2016 09:45 PM

السلام عليكم ورحمه الله وبركاته

يا ريت يا شباب تفيدوني برايكم في اسبرانزا m12
معروض عليا اسبرانزا m12 موديل ٢٠١٢ ماشيه ٤٩٠٠٠ كيلو ، وكل الصيانات في التوكيل بالفواتير

هو مهندس معايا فالشغل وهو اللي شاريها مالزيرو .
هو عارضها ب ٦٠ الف ، هل دا سعر كويس ؟ والرخصه لاخر ٢٠١٧

يا ريت اللي يقول رايه يكون جربها او يعرف حد جربها لان رايكو هيتوقف عليه قراري لشراء السياره . شكرا ليكو

**hemaa_82** · 17-05-2016 11:16 AM

بص يا سيدي الفاضل ...

الام 12 هيه هيه الام 11 بس بدل ما الشنطة سيدان معموله هاتش باك

الاختلافات ....
الام 12 مخرجين للشكمان
الام 12 الانوار الخلفي ليدات
الام 12 لمبة المارشيدير يمين فقط تقريبا "ناحية واحدة يعني

مزايا العربيتين عامة ....
شكل "دي ازواق"
متانه ...صاج ما شاء الله
ثبات "بجيب ال 200 و براحتك مفيش اي احساس بتعويم او خفيه حتي مع المناورات
فرامل فوق الوصف ما شاء الله
قطع غيار منتشرة و مش غاليه "جوز مساعدين بضمان 625 ...اكصدام امامي فبر فاضي ب 300.. تيل من 60 وانت طالع .. فتيس كامل استيراد 600 - 700 .. كاتينة ببليها 600 .. كبالن خارجي ب 160 الفردة .. داخلي من 150 ل 300 الفردة .. جلب من 60 وانت طالع ل 100 الواحدة .. مسامير ميزان 200 ال جوز ..خراطيم ميه ب 25 الكبيرة ... بوجيهات من 60 وانت طالع .. طقم دبرياج من 700 لحد 1000

الحاجات الغريبة ....حلو او وحش

بتاخد 5 لتر زيت ... "كتير مش حلو"
استهلاك البنزين علي السريع تحفة ..من 6.5 ل 7.5 لكل 100 كيلو .... سافرت اسكندرية ب 15 لتر ..."حلو "
انما جوة البلد مش هتقل عن 12 ل 13 لتر لكل 100 كيلو ....."وحش"
العربية مع الدوارة بتدي اشارة في العدادات لو لاقدر الله المية في القربة قليلة حتي لو لسة مدور و مسخنتش"حلو"
دواسة البنزين كهربا" وحش في احساس التقل في بداية السير لو مش متعود " و " وحش في حالة التعليق ...بتترجلش و تتظبط" بس " حلو انها متهربش منك لو بتتعلم سواقة بمعني ان العربية مبتنطش في الطلعات"
العربية كبيرة حجما بس الصالون مش عملاق حجمه عادي مش اكبر من اللي زيها "حلو في الامان في الخبطات لاقدر الله بس وحش للقعدة "
في فرش قماش او جلد ....لازم تكسي القماش لان عندي الفرش سليم بس ربنا يخلي الاولاد بهدلو الفرش و لونه اسود ...عايز اغسل الفرش ان شاء الله

**hemaa_82** · 17-05-2016 11:20 AM

من الاخر .... لو حاولت اغير العربية مش هلاقي مميزاتها باقل من ضعف السعر و بالعكس هلاقي عيوب اكتر ....

و لو حالا معايا ال60 و مستغني عنهم كنت هشتري العربية بدالك لانها غالبا فاميه خلفي و لسة في ضمانها لحد 2017 :)

**hemaa_82** · 17-05-2016 11:21 AM

السعر انت و شطارتك بس لو وصلت ل 56 57 تبقي كسبان تماما .... بس مع الغلو المبالغ فيه لكل العربيات 60 مش كتير عليها لو حالتها كويسة ....

**Mohamed Desoky** · 17-05-2016 04:16 PM

السلام عليكم ورحمة الله وبركاته اولا شركة شيرى شركة محترمه وسياراتها حلوه طالمه مش مهمل المهم حضرتك بتقول ان العربيه مع زميل ليك وهو المالك من الزيرو يعنى انتى عارفها واكيد ركبتها معه حتى لومره العربيه كده فيها امان من المالك الاصلى والراجل محافظ عليها وكل الصيانه فى التوكيل فاضل ايه علشان توافق هتنزل من المبلغ كام الف او الفين ملهمشى اى لزمه طالمه مطمئن من صاحبها توكل على الله 60 الف يجيبه ايه اليومين دول سيزوكى ماروتى لعبه زى التوك توك هتركب ايه موديل عالى انا عندى شيرى الحمد لله زى الفل وحلمى انى اجيب تيجو لانى واثق فى شركة شيرى توكل على الله العربيه حلوه جدا