الموضوع: محتاج حد بيفهم في الفتيس الوتوماتيك سيريون

المشاركة الأصلية كتبت بواسطة elwakeel

رجالة المنتدي:

السلام عليكم اولا

انا بقالي اسبوع كده ملاحظ حاجة ربنا يستر و تكون بسيطة
معايا سيريون 2008 اوتوماتيك 1300. بقالي شويه الفتيس بيهبل معايا و مش مظبوط

الاعراض:

اول ما بدور الصبح و اتحرك بيها تمشي كويس و بعدين تنتش لما الفتيس يغير من التاني للتالت. لو وقفت في اشارة أو هديت عشان زحمة و طلعت بيها تاني بتطلع علي التالت مش بتنزل بالنقلة

و لو وقفت خالص و اتحركت تفضل نفس الغيار

لو وقفت و جبت علي البي و بطلت و دورت تاني تظبط و تطلع اول تاني تالت طبيعي مع النتشه

يعني باختصار لو بتنقل لفوق اول تاني تالت شغاله و بتنتش من التاني للتالت
و لو بتنزل لتحت مش بتنزل مع التهدية و التوقف, ساعات بتنزل و بحس بنفس النتشه و هيا نازلة التاني

غيرت زيت الفتيس و الفلتر من شهر و مكانش في مشكلة, و جبت mobil ATF320

لما بتطلع علي التالت و بعمل كيك داون ولا كأني عملت حاجه

رجاء بلاش سيد الفراش, روحتله قبل كده و قاللي ورايا عربيات و شغل و فضل راكنني جنبه ساعتين و بعدين قاللي مش هالحق اشتغلك فيها النهاردة و يا تسيبها و تمشي يا تاخدها و تجيلي يوم تاني مع العلم اني وصلت عنده الساعه 11 الصبح


ياريت حد متخصص فتيس اوتوماتيك يكون بيفهم و بيتقي الله في شغله و مش مفتري

و متشكرين مقدما لمساعداتكم الغالية

لتصليح الفتيس الاوتوماتيك

للاستعلام
م / محمد السيد 01006994170
م / احمد مصطفى 01002305059
وكن حذر فى تعاملك ولا تثق تمام الثقة فى اى احد

كنت هنصح حضرتك بسيد الفراش
هما فعلا ليهم مواقف غريبه فيهم ناس إتمه جدا وغاليين سنتين بس للأمانه معجونين في الدايهاتسو
رأيي كلمهم ورتب معاهم قبل ماتروح ولو عايز معايا رقم الاسطى محمد عبدالجليل ذوق جدا وبيقدر وشاطر وهيقولك تعالى يبقى هيكون جد في الميعاد

المشاركة الأصلية كتبت بواسطة رامي مصطفى

كنت هنصح حضرتك بسيد الفراش
هما فعلا ليهم مواقف غريبه فيهم ناس إتمه جدا وغاليين سنتين بس للأمانه معجونين في الدايهاتسو
رأيي كلمهم ورتب معاهم قبل ماتروح ولو عايز معايا رقم الاسطى محمد عبدالجليل ذوق جدا وبيقدر وشاطر وهيقولك تعالى يبقى هيكون جد في الميعاد

ياريت تديني نمرة الاسطي محمد, انا فاكر اني رحت مرة و هوا اللي اشتغللي فيها و كان متعاون و بياخد و يدي معاك في الكلام, بس فعلا هما غاليين. كنت عايز اغير تيش ميزان قاللي 150 جنيه!

المشاركة الأصلية كتبت بواسطة elwakeel

ياريت تديني نمرة الاسطي محمد, انا فاكر اني رحت مرة و هوا اللي اشتغللي فيها و كان متعاون و بياخد و يدي معاك في الكلام, بس فعلا هما غاليين. كنت عايز اغير تيش ميزان قاللي 150 جنيه!

مشكلتهم انهم غاليين شويتين بس للأمانه شطار وفاصل مع الاسطى محمد هو محترم ومتعاون. رقمه
٠١٠٠٦٦٤٥٤٠٣
بالتوفيق وطمنا حضرتك عملت ايه

الحمد لله علي كل شئ. انا حليت المشكلة بتاعة الفتيس و عرفت سببها

حبيت اشاركو بتجربتي عشان تعم الفايده

لما كان بينتش و مش بيطلع مظبوط روحت لمتخصص فتيس في صقر قريش

الراجل حل الفتيس و قاللي في باندين اتحرقو و تروس كلتشات اتسللخت و محتاجه تتغير مع البانداتو غير معاهم مصفاة الزيت, قاللي احسنلك تجيب فتيس استيراد عشان تريح نفسك من وجع الدماغ

جاب فتيس استيراد و ركب و جرب, تمام بس في نتشه مع التالتو الغيارات مأخرة شويه
قاللي ده عيب كهربا روح شوف بورده الكنترول عند محمد عسكر في الحرفيين

رحت و كشفت مافيش مشكلة

رجعتله و الحاله بتسووؤ و الفتيس بقي يأخر اكتر و بينتش اكتر

شكينا في الفتيس الجديد فكه و راح جاب غيره من الحرفيين

نفس الحكاية بالظبط

و العربية عنده بقالها 4 ايام

رحت قلتله انت سوحتني و مش عارف تمسك المشكلة و العربية قاعده عندك و انا متسوح, شوفلي حل! قاللي سيهالي يوم انا لازم اكتشف لغز العربية دي انا شفت كتير و معداش عليه العيب ده

تاني يوم كلمني قاللي تعالي خد فلوسك و روح عند الميكانيكي اللي انت عايزه و لما تحل الفتيس ابقي هاتهولي

كلمت المهندس سيد الفراش و شرحتله, قاللي تيجي الصبح بدري علي 10 عشان نشتغلك فيها من اول اليوم

رحت في المعاد
حل الفتيس و جاب فتيس من عنده و بعدين و هوا شغال قاللي الرادياتير مكتوم و هوا ده اللي حرقلك الفتيس الاولاني و كمان سبب مشاكل الفتيس الجديد

الفكرة ان زيت الفتيس الاوتو ليه وظيفتين: تزييت اجزاء الفتيس و تبريد الفتيس, عشان كده في مكابس دورها تكبس الزيت في مسار مخصوص ماشي في الرادياتير عشان يتبرد, المسار ده حصل فيه سدد جزئي خلي ضغط الزيت الخارج من الرادياتير ضعيف مش بيقدر يشغل الفتيس غير انه مش متبرد كويس و ده بيسخن اجزاء الفتيس و يحرقها بعد شويه, و ده بيفسر ليه الفتيس الجديد حالته سائت مع الوقت

جاب رادياتير استيراد ركب ركب خلص في 3 ساعات

بسم الله طلعنا نجرب اخر حلاوة

سحب تمام و النقله ماتحسش بيها اصلا و مفيش نتشه ولا لخبطة

رجعنا حاسبت و مشيت كل ده في 5 ساعات منهم ساعة صلاة الجمعه عشان كان يوم جمعه



نصيحه روح للفاهم حتي لو غالي عشان متتسوحش زي ما حصللي

التكاليف:
فتيس استيراد 3500 + مصنعية تركيب 500
رادياتير + مرروحه 450
تغيير راس كوبلن استيراد (بالمرة ما هيا كانت بتشتكي) 200

زيوت علي مدار الرحلة 420 جنيه تقريبا (كل فتيس بيركب بياخد زيت جديد)


الحمد لله

الف مبروك لحضرتك
ومشاركتي اللي قبل دي ع طول قلت لحضرتك على سيد الفراش هما غاليين شويه بس فاهميين
حصل خير والف مبروك وليا لفه ما تطنشنيش.هههه

المشاركة الأصلية كتبت بواسطة رامي مصطفى

الف مبروك لحضرتك
ومشاركتي اللي قبل دي ع طول قلت لحضرتك على سيد الفراش هما غاليين شويه بس فاهميين
حصل خير والف مبروك وليا لفه ما تطنشنيش.هههه

الله يبارك فيك يا فندم, العربية و صاحب العربية تحت امرك متشكر علي المساعدة :)

الف مبروك يا باشا بس الفتيس غالي جدا... هي عربيتك موديل كام؟