الموضوع: عربية في حدود 70000

السلام عليكم ورحمة الله وبركاته
كل عام وأنتم بخير جميعا

أنا متابع المنتدى من فترة بسيطة لأني قبل كدة مكنتش مهتم خالص بالعربيات
لكن بصراحة من أول ما بدأت أفكر وأدور على عربية لاحظت إن المنتدى هنا كنز كبير ومليان أساتذة وخبرات بجد

أنا طبعا محتار جدا ومعلش استحملوني شوية في الرغي إللي جاي ده وأنا جاي طمعان في مساعدتكم


أولا دي أول عربية ليا
ثانيا المبلغ إللي بنتكلم فيه من 70 لحد 73 بالكتير أوي
ممكن يقل شوية يكون أفضل عشان لو العربية محتاجة مصاريف بسيطة ده غير التراخيص والتسجيل والذي منه


خبرتي في العربيات زي خبرة الشيف الشربيني في البلاي ستيشن بالظبط
يادوب على قد المعرفة النظري كدة من التدوير والبحث على النت لكن الناحية العملية معدومة تماما الحمد لله
مفهمش في الميكانيكا ولا أعرف ميكانيكية ومعرفش شكل قطع الغيار حتى


مش فارق معايا العربية يكون شكلها شبابي أوي
المهم تكون اعتماديتها عالية وأعطالها قليلة عشان مش عاوز اتمرمط واتبهدل بيها كل شوية وأنا أصلا ظروف شغلي ووقتي ضيق جدا وصعب آخد أجازات
يعني يا دوب الصيانة العادية من تغيير زيوت وتيل وسيور وفلاتر والكلام ده


متهيقلي المبلغ إللي معايا يشتري حاجة من دول:

- نيسان صني موديلات لحد 2007 مثلا حسب الحالة
- هيونداي أكسنت موديلات لحد 2008 (نيو أكسنت)
- رينو لوجان موديلات لحد 2010
- فيرنا
- نوبيرا
- أفيو
- أوبترا أقدم شوية من الأفيو
- أسترا 2004
- بروتون جين 2
- بيجو 406 موديل 2003 أو أعلى
وفي اختيارات تانية كتير فولكس و فيات وأي حاجة تانية حضراتكم شايفينها

الحقيقة كلهم كوم والبيجو كوم تاني
وهي عجباني جدا رغم إنها أقدمهم بس طبعا خايف منها أوي أوي. خصوصا توافر قطع الغيار وسعرها وكمان الموتور 2000 سي سي محدش عارف لو طبقوا موضوع الدعم بتاع البنزين البلد المجنونة دي ممكن يحصل فيها أي حاجة في أي لحظة
وكمان الموديل القديم بيقلل فرصة إن الواحد يلاقي حاجة حالتها فعلا كويسة وبسعر كويس وبيفرق في سعر اعادة البيع

أنا حتى مش لاقي أي مقارنات بين البيجو وبين الباقي لأن واضح إنها فئة مختلفة تماما بس أنا شايف سعرها جميل أوي بالنسبة لإمكانياتها وكمالياتها.


التفضيل للأوتوماتيك لكن مش ضروري
التكييف أساسي
عوامل الأمان يا ريت abs على الأقل
وأكيد الموديل الأحدث أفضل
وتوافر قطع الغيار مهم لكن برضو حرام أدفع 80000 في عربية فيرنا مثلا عشان قطع غيارها رخيصة
يعني أنا شايف إن العربيات الكوري مبالغ في سعرها شويتين بسبب النقطة دي (تقريبا إللي هتوفره في قطع الغيار بتدفعه زيادة فوق تمن العربية)


كل المعلومات إللي فوق دي وارد تكون غلط بس ده على قد خبرتي المتواضعة
يا ريت حضراتكم تنصحوني وتفتحوا عنيا على الخيارات المتاحة لو في حاجة تانية غير اللي انا قولتهم
ويا ريت طبعا تصححولي لو في معلومة غلط عندي والاسعار برضو كلها من على النت ممكن تكون غلط او مبالغ فيها شوية


اخر معلومة
انا لسة هتعلم سواقة والفلوس لسة في جزء مش جاهز يعني غالبا الشراء فعلا هيتم بعد شهرين او تلاتة على الاقل. وانا حاليا في مرحلة دراسة وبحث



مستني ترشيحات من حضراتكم ويا ريت اللي ينصحني بحاجة يحدد موديل السنة وسعة المحرك ونوع الفتيس وخلافه ومتوسط السعر الحالة الممتازة او الجيدة جدا ولكم جزيل الشكر مقدما



تعديل 1:
الاستخدام سفر مرة اسبوعيا مسافة اجمالي حوالي 180 كم رايح جاي
والشغل من الجيزة للقرية الذكية
الباقي مشاوير بسيطة داخل المدينة
انا الحمد لله متجوز ومخلف يعني بلاش العربيات الضيقة والصغيرة اوي