تقرير ممتاز وحيادي ولكن سعرها اعتقد يجيب الافضل
رقم العضوية : 2504
تاريخ التسجيل : 08Oct2007
المشاركات : 1,704
النوع : ذكر
الاقامة : gesr el swis
السيارة: la yogad
السيارة[2]: la yogad
الحالة :
السلام عليكم ..
في الموضوع ده هحاول اوصف انطباعاتي عن العربية بداية من شرائها و حتي 3000 كم .. هتكلم عن الشكل الخارجي و الصالون و أداء السيارة و الوكيل ...
للفائدة حطيت نسخة من الموضوع علي صفحة سوبارو و نسخة هنا علي المنتدي
معظم ملاحظاتي هتكون علي خلفية اني كنت سايق قبلها النترا .. و اللي هكتبه هيكون بناء علي خبرتي المتواضعة في القيادة و انطباعات ليس لها اي خلفية ميكانيكية او هندسية .. مجرد خواطر واحد بيسوق ...
*الاكس في و التوسان و السبورتاج كانوا علي قايمة اختياري قبل الشراء .. و لاسباب كتير اهمها اادفع الكلي فضلت الاكس في .. و لله الحمد مبسوط باختياري و مقتنع بيه تماما .
* مش كل اللي عايز أقوله افتكرته و انا بكتب .. و بالتالي حضرتك لو قرأت البوست تاني كمان يومين ممكن تلاقي نقاط تانية نسيت اكتبها سابقا .. يعني الموضوع ان شاء الله يكون متجدد
* نقطة بسيطة لازم اوضحها في الأول و لازم حضرتك تاخد بالك منها خصوصا لو مقبل علي الشراء.. العربية زي أي عربية فيها نقاط قوة و نقاط ضعف .. بل بالعكس .. ممكن بلفة بسيطة علي صفحات السيارات الاعلي تلاقي عربياتهم فيها مشاكل كبيرة لكنهم مبسوطين بعربياتهم و فرحانين بيها مادام الأمور مش واقفة .. خليك دايما موضوعي في اختيارك للعربية و حط كافة نقاط القوة و الضعف في بالك و متخليش كلمة توديك و تجيبك
** الشكل الخارجي ..
-------
* من الحاجات اللي شدتني للعربية ..شكلها لا هو غرقان في الانسيابية فبيقلب تنفيخات و انحنائات.. و لا هيا مربعة و زوايا قائمة .. هيا بين البينين فيها نفحة هجومية محببة ..
* شغل الفيبر الاسود مخلي الشكل الخرجي للعربية كويس جدا .. و مخلي كل الوانها لايقة عليها جدا .. " الروف ريلز و سبويلر السقف الكبير و باكيتة الاكصدام الخلفي " من الحاجات اللي بتقلب شكل العربية راسا علي عقب و بتديها شكل رياضي ظرف جدا .
* عربيتي اول فئة .. معنديش روف ريلز .. نويت اركبها في التوكيل لقيتها بــ 4400 بس بيفكوا بطانة السقف من الداخل و بيخرموا فتحتين للتثبيت غير نقاط التثبيت الموجودة بالفعل .. الموضوع ده خلاني اتردد شوية في تركيبهم .
* العربية شكلها احسن كتير من غير تركيب الدلايات ..بس للاسف الدلايات بتحوش كمية تراب و طينة رهيبة بتتجمع علي اسفل الابواب الامامية و اسفل جوانب الاكصدام الخلفي .
* زاوية الرؤية في البربريز الامامي جيدة جدا سواء للأمام او الاجناب .. في الالنترا كانت الاجناب لما اكون داخل ملف من النقاط المعدومة نظرا لزاوية ميل البربريز .. و كنت لازم اطلع راسي قدام او ورا او اتشقلب عشان القوائم لامامية كانت بتمنع الرؤية بشكل كبير .
*ابعاد العربية الخلفية واضحة عند الركن " انا بعتمد علي المرايات في الركن " .. لما تكون بتركن بالليل و راجع للخلف النور الاصفر بيكون منور طرف الفوانيس الخلفية " في الفوانيس الشفافة 2016 " و بيوريك كويس جدا اخر نقطة في العربية "
*الجنوط .. من مواطن الجمال في العربية سواء الموجود في العربية لحد 2015 او الموجود في 2016 " و انا بفضل القديم " .. خلي بالك من نظافته و متحاولش لما تركن تلزق في الرصيف للاخر عشان ميتجرحش . ..الكاوتش بالنسبة لي ادائه اقل من توقعي .. صوته عالي و تجارب الناس معاه في البلالين كتير ..
-----------------------------------------
** الصالون
------
* بالنسبة لي " شخص طويل " مساحة الصالون جيدة جدا في الامام و الخلف للارجل و الاكتاف و الرأس ..
* وضعية الجلوس ممتازة في العربية " اقرب الي وضعية جلوس السيدان من الاس يو في " و اريح من كل العربيات الاس يو في اللي ركبيتها و خاصة علي السفر الطويل او خلال القيادة المستمرة في الأماكن المزدحمة
* شكل الطابلوة بسيط " و البعض يعتبره فقير " .. خاماته كويسه .. و اتخيل ان اللي مخلي شكله مقبول هو الكاسيت .. و لو كان نازل عليها كاسيت عادي بدون شاشة كبيرة هيكون شكلها سئ ...
* ينقصها غطاء لمساحات التخزين الي تحت الكاسيت و مكان حامل الاكواب ..
* مساحة الشنطة سيئة .. و كانت بالنسبة لي احد نقاط الضعف في السيارة عند الشراء كوني انسان بيعتمد علي الشنطة الي حد كبير .غضيت ااطرف عن الموضوع ده مقابل طي الكنبة الخلفية و اللي بيدي مساحة مضاعفة بتلاضافة لبعض المميزات الاخري الاساسية في العربية
* يفضل حضرتك تجيب كسوة للشنطة " الدواسة المجسمة " اذا كنت بتستخدم الشنطة باستمرار .. هتلاقيها في التوكيل اعتقد بــ 700 او اكتر شوية .. و في محلات الاكسسوار من 220 - 250 ... انا جبتها من بره ..بتاعة التوكيل خاماتها أحسن و مقاسها أدق .. بس التاية بتأدي الغرض مبتقولش لأ .
* شكل الفرش الاصلي في لفئة الاولي و التانية .. شكله و خاماته كويسه جدا ..لو هتعمل كسوة حاول تخلي اللي يعملهالك يعملها زي الفرش الاصلي بالظبط .. الموضع هياخد وقت اكبر و تكلفة اعلي بس يستاهل .
----------------------------------
الأداء
------
* بداية انا سواقتي من النوع السلس المتوسط .. لا بشد و بحرق و ادوس علي الدواسة للاخر و احاول اطلع من العربية اللي محدش طلعه منها قبل كده .. و لا انا هادي جدا و بحسس علي العربية .. و بالتالي حكمي علي العربية هيكون من خلال استخدامي الطبيعي للسيارة و الغرض الطبيعي اللي انا منتظره منها ..
* أجمل حاجة وانت بتشغل العربية دي الحركة اللي بتعملها العدادات مع اول تكة للمفتاح .. الموضوع ده عاجبني جدا :) :)
* طلعة العربية تقيلة بالنسبة لواحد سايق النترا و قبلها النترا و قبلها نيو اكسنت .. اعتقد اللي راكبين الماني ممكن يكون الموضوع متقارب ... الدوسة التدريجية علي الدواسة بتجيب نتيجة كويسة جدا و بتلاقي العربية بتلقط سرعة بسرعة . العربية هتبتدي تحس انها ابتدت تبقي عفية معاك عند 50-60 و هتسحب كويس لحد 120-130 بعدها ممكن السحب يقل شوية
* لما تشغل التكييف الموضوع بيختلف كالتالي :
1 - العربية تقلها بيزيد و مش هتبتدي تلقط سرعة معاك غير لما تلاقي الار بي ام عند 2 الي 2.3 تقريبا و بعدين هتلاقيها بقت كويسة .
2- صوت تكة " لقطة " الكومبريسور عالي .. فيه ناس ممكن تقلق منه و تفتكره عيب او مشكلة ..لا ده العادي
3 - صوت الكومبيسور نفسه عالي و هو شغال .. و ده موضوع منرفزني شخصيا مشوفتوش في الكوري و متوقعتش اشوفه في الياباني .. الصوت بيعلي مع زيادة السرعة و ارتفاع الار بي ام .. و صوته الي حد ما مبيكونش سلس صوته بيكون عامل زي ما يكون صوت خشونة او زي ما يكون فيه بلية .. عملت بوست قبل كده بالموضوع ده و الناس قالتلي عادي .. قارنت مع احد الاصدقاء اللي مستلم تقريبا في وقت مقارب مني و لقيت نفس الصوت .. و بحاول اتعايش معاه . :(
4 - التبريد .. شخصيا شايف ان التبريد كويس جدا ..انا اتعاملت معاها ف الايام الحارة اللي فاتت و كنت بظبط الحرارة علي 24 و الهوا علي شرطتين او تلاتة بالكتير و برجع تاني لشرطتين .. تبريدها كويس جدا .
5 - استهلاك البنزين عالي مع التكييف .. مقيستوش بس بيبان من مؤشر البنزين و هو بيجري ناحية الشمال قصاد عيني .. اعتقد ممكن الاستهلاك يكون بيزيد بنسبة 20-25 %
* الثبات .. جبت بالعربية لحد 160 للتجربة فقط .. سواقتي في الطبيعي علي الطرق المفتوحة 120 - 130 .. ناورت بيها و خدت بيها غرز علي 130 ..في جميع الاحوال النتيجة كويسة جدا .. اتخيل الامبريزا هتكون افضل من كده .
* سحب العربية فوق الــ 120-130 ضعيف الي حد ما مع التكييف .. لحد 140 بتاخد شوية وقت .. و من بعد 140 الموضوع بيكون اصعب شوية عشان تجيب سرعة اعلي خصوصا لو الهوا مش معاك او الطريق طالع نازل و الاسوأ لو طالع بس . وزن العربية التقيل مع الفتيس ليهم دور كبير في الموضوع ده ..برضه اتخيل ان الامبريزا هتكون افضل في النقطة دي .
* الطارة و الباور .. كانوا مفاجأة غير سارة بالنسبة لي بعد حوالي 8-9 سنوات من الباور الكهربا ... دلوقتي بقي افضل او يمكن انا اللي اتعودت عليه . ..بيكون تقيل في الركن و الأماكن الضيقة .. لكنه بيكون عامل ثقة ممتاز علي السرعات العالية
* ارتفاع العربية .. من اهم الحاجات اللي خليتني حابب العربية دي .. خصوصا بعد الالنترا ..انا شخص مطبات البلد كلها علمت عليه .. الحمد لله الموضوع ده مبقتش اقلق منه زي الأول ..
* سقت العربيةاوف رود في مكان صحراوي لفترة بسيطة .. كان مكان بسيط مش محتاج مهارات خاصة بس مكنتش اقدر اقربله بعربية تانية قبل كده .. و كانت هايلة .
*فيه صوت شخلله بسيطة جدا بيتسمع من الكاوتش اللي قدام و انت بتدوس او بتسيب فرامل علي السرعة البسيطة جدا او عند بداية الحركة بالعربية .. مش كل الاذان ممكن تسمعه لكني بركز مع الحاجات دي كويس .. مش مأثر في أداء العربية في حاجة .. العربية دخلت التوكيل و طلعت 3 مرات و كل مرة يقولوا بسيطة محتاجة تشحيم بس .. و تدخل و تطلع زي ما هيا ..
* بشكل عام .. اداء العربية .. السحب .. التسارع .. التكييف .. الفرامل .. العفشة .. استهلاك البنزين .. صوت المحرك ..... كله بقي افضل بعد الـ3000 الاولي .. و اتوقع ان شاء الله انه هيكون افضل كمان بعد الــ 5000 ... و ده لكل ملاك العربية الجدد عشان ميقلقوش .
------------------------------------
التوكيل
-----
*شخصيا .. شايفه انه ممكن يكون من نقاط الضعف للعربية اذا استمر بنفس المستوي ..سمعت من كذا حد جوه التوكيل انه بدأ يضخ استثمارت لسوبارو و هيفتح مراكز تانية و يوسع و يدرب كوادر و حاجات زي كده .. بس مشوفتش أي حاجة علي ارض الواقع حتي الان ..اتمني ان يصدقوا و يبصوا لقدام شوية .
* مفهوم الاحترافية .. تحس انه مفهوم مفقود عند ابو غالي من اول مهندس الاستقبال لافراد الامن لعمال الصيانة ..
* مهندس الاستقبال و هو بيسمع منك مشاكل العربية اللي مفروض انه يكتبها بطريقة مفهومة لمهندس الورشة ... مهندس الاستقبال ده بيقدر بكل كفائة يوصلك انك انت بيتهيألك و انه هيكتب حاجة تانية خالص غير اللي انت بتقوله عليها ..
* الناس محترمين هناك لكنهم شغالين بسماتهم الشخصية مش بقواعد أداء و عمل .
* موضوع استراحة العملاء ده علامة استفهام بالنسبة لي .. كل لما اسأل يشاوروا علي المبني المعدني اللي بيتعمل و يقولولي اهوه شغالين فيه ... و عمري ما شفتهم شغالين فيه .. هل ممكن يكونوا بيشتغلوا فيه بالليل و بيلحقوا يشيلوا الشغل تاني الصبح قبل ما اروحلهم !!!؟؟ الله اعلم .
*** الخلاصة ..
الشكل الخارجي
9/10
الصالون
8.5/10
الأداء
7.5-8/10
الوكيل
6.5/10
**** تحياتي للجميع .. كل عام و انتم بخير
رقم العضوية : 6201
تاريخ التسجيل : 22Feb2008
المشاركات : 12,866
النوع : ذكر
الاقامة : cairo
السيارة: nissan sunny ex 2008
السيارة[2]: Sonata 2013
دراجة بخارية: لا
الحالة :
تقرير ممتاز وحيادي ولكن سعرها اعتقد يجيب الافضل
م/ احمـد عـزت
رقم العضوية : 71514
تاريخ التسجيل : 25May2010
المشاركات : 26,773
النوع : ذكر
الاقامة : EgYpT-ⵍⵎⵖⵔⵉⴱ-
السيارة: -- -- all FiaT ---
السيارة[2]: ToYoTa CorOllA ---
دراجة بخارية: - - - - - - -
الحالة :
تقرير ممتاز
اتمني التوكيل يقدر العربيات دي فعلا
ويستثمر اسم سوبارو احلي الياباني
رقم العضوية : 63884
تاريخ التسجيل : 02Mar2010
المشاركات : 2,270
النوع : ذكر
الاقامة : cairo
السيارة: بارك الله فيما رزق
السيارة[2]: نيسان تيدا بلس 2010
دراجة بخارية: no
الحالة :
تقرير ممتاز وحيادي
*اللهم اصلح احوال مصر واصرف عنها الفتن*
رقم العضوية : 105306
تاريخ التسجيل : 25Jun2011
المشاركات : 3,844
النوع : ذكر
الاقامة : اسكندراني بره مصر
السيارة: Not Yet
السيارة[2]: KIA CERATO EX 2014
الحالة :
تقرير شامل وموضوعي جدا.. أحييك عليه
ليا ملحوظتين..
أول واحدة.. الxv تعتبر من فئة الكروس أوفر أكتر من كونها suv حقيقية.. ويمكن ده اللي مخليك حاسس بإنها مريحة .. ﻹن طبيعة فئة الكروس أوفر إنها تعتبر خليط من الsuv على الهاتشباك على بعض خصائص الmpv...
تاني حاجة.. موضوع الباور ده كنت بحس بنفس الإحساس ده لما كنت بأجر هيونداي إيلانترا تبع الشغل (من حوالي 6 سنوات) وبعدين أنزل أركب عربيتي التويوتا كريسيدا أيامها.. إحساس بالإحباط طبعا.. بس بتأقلم عليه خلال 3-4 أيام.
بالتوفيق.. وربنا يعينك على التوكيل
...
Trust me, I'm an Engineerلا تُعْطِنِي سَمَكَةً... بَلْ عَلِّمْنِي كَيْفَ أَصْطادُ
مَثَلٌ صينِيّ
Ahmed Nabil Al-Bora'ie
أعشق السيارات.. أحب اليابانية، الكورية... ولا أفضل الأوروبية
رقم العضوية : 188798
تاريخ التسجيل : 10Jun2016
المشاركات : 23
النوع : ذكر
الاقامة : cairo
السيارة: kia
السيارة[2]: lancer
الحالة :
رقم العضوية : 105866
تاريخ التسجيل : 30Jun2011
المشاركات : 1,546
النوع : ذكر
الاقامة : Cairo
السيارة: I have not had it yet
السيارة[2]: Suzuki Maruti
الحالة :
الله يفتح عليك . . . تقرير يثرى العقل بالعلم
بوركت مصر فلا أرانى بالغآ حق المديح و إن جهدت سبيلى
يا مــصــر يرعــاك الله كــما يرعى تنزيله مـن عابــث و دخيل
رقم العضوية : 45794
تاريخ التسجيل : 30Aug2009
المشاركات : 568
النوع : ذكر
الاقامة : alexandria
السيارة: opel vectra
السيارة[2]: Seat Cordoba 6K ALM 1.6 75HP
دراجة بخارية: no
الحالة :
التقرير محايد ومنطقي ووصف سلس للسياره ونتمني ان يتحسن توكيلها ممكن حضرتك تقولنا السعر كام
seat cordoba 6k 1.6 ALM 75HP
رقم العضوية : 2504
تاريخ التسجيل : 08Oct2007
المشاركات : 1,704
النوع : ذكر
الاقامة : gesr el swis
السيارة: la yogad
السيارة[2]: la yogad
الحالة :
رقم العضوية : 105866
تاريخ التسجيل : 30Jun2011
المشاركات : 1,546
النوع : ذكر
الاقامة : Cairo
السيارة: I have not had it yet
السيارة[2]: Suzuki Maruti
الحالة :
بسم الله الرحمن الرحيم
الزملاء المحترمين
كل سيارات سوبارو . . . سيارات الأحلام حقآ
و لكننى أتمنى الآتى من شركة سوبارو
1 - تعديل التابلوه الذى لا يشعر قائد السياره بأن السياره تستحق ثمنها (تابلوه فقير و شكله قديم منذ سنوات)
2 - تعديل المحرك ليصبح أكثر توفير للوقود
3 - زيادة حجم خزان الوقود لتستطيع السياره قطع مسافه طويله على الصحراوى دون الحاجه للتوقف للتزود للوقود
4 - الضغط على الوكيل المصرى إنشاء مراكز خدمه و صيانه خارج القاهره و الإسكندريه
السلام عليكم ورحمة الله وبركاته
بوركت مصر فلا أرانى بالغآ حق المديح و إن جهدت سبيلى
يا مــصــر يرعــاك الله كــما يرعى تنزيله مـن عابــث و دخيل
المفضلات