الموضوع: BMW x1, Wrangler, Ford Kuga or Toyota Fortuner كلهم نفس الفئة السعرية و مبدخلش صحراء

- الاكس وان والفورد الكوجا دول فئة والفورتشنر والجيب فئة تانية
- الفورد الكوجا والاكس وان راحة وأوبشنات
- الفورتشنر أوسع واحدة فى القعدة وفى الشنطة وأعتقد المقاس الكبير الـ ٤٠٠٠ سى سى ممكن يتزودله كراسى صف تالت وتبقى ٧ راكب
- الاسعار فى الـ ٤ متقاربة
- مصاريف الرخصة فى الجيب والفورتشنر الـ ٤٠٠٠ سى سى عالية وكمان استهلاك البنزين بتاعهم عالى
- فيه فورتشنر ٢٧٠٠ سى سى ودى اعتقد مصاريف الرخصة اقل من الـ ٤٠٠٠ سى سى وكمان استهلاك البنزين اقل
- القوة والمتانة فى الجيب والفورتشنر اعلى .
- الاكس وان ماثبتتش رجليها فى مصر وانتشارها اقل
- الكوجا لسه جديدة فى السوق بس بتحقق انتشار بس لسه بعد سنة كمان او اكترنقدر نقيمها ونشوفها اثبتت نفسها فى مصر ولا لأ
- موضوع الاتزان حايكون احسن فى الاكس وان لانها اوطى ويليها الكوجا . والجيب والتويوتا عربيات عالية وزيها زى اى عربية عالية مش بتاعة سرعات كبيرة وغورز كل اللى بيسوق العربيات العالية عارف موضوع الاتزان وملتزم بموضوع السرعات.
- الرانجلر هى اكتر واحدة فيهم ليها كماليات وتقدر تغير شكلها تماماً كمان اسعار قطع الغيار وانتشارها كويس - وليها دماغ لوحدها ولازم تكون غاويها وطالما دخلتها فى مقارنة مع عربية تانية يبقى ماتعملش حسابها لأنها غير مريحة بالمرة.
- الجيب والتويوتا فيه ملاك كتير بتفهم فيهم وبتساعد أى حد عنده مشكلة سواء وقفت حد فى الشارع وسألته أو عن طريق المنتديات المصرية والاجنبية والفيس بوك - وده بيدى تقل ليهم فى السوق والتوكيلات بتعمل حسابهم كويس قوى يعنى تعتبر عندك عزوة :)
ده اللى اقدر افيدك بيه وربنا يوفقك للإختيار السليم

المشاركة الأصلية كتبت بواسطة mohamed desoky

السلام عليكم ورحمة الله وبركاته اخيرا الباشمهندس احمد خبير الدفع الرباعى ظهر استازنا كلنا كل عام وانتى واسرتك الكريمه بخير وعيد سعيد بازن الله ؟مفيش كلام تانى بعدكلام المهندس احمد ؟ربنا يبارك فيه :y_hi_3[1]:

كل عام وانتم بخير ياباشا وعيد سعيد عليك وعلى الاسرة الكريمة

المشاركة الأصلية كتبت بواسطة beeronasr

متشكر جدا لحضرتك. من الكلام دة و مع عدم دخولى الصحراء ينحصر الاختيار بين الكوجا و البى ام . الكوجا السبورت ب 400 و البى ام ب 400. يا ترى مين أحسن؟ و انا شايف ان سعر الكوجا عالى شوية عليها بعد الزيادات الاخيرة و كفة البى ام ارجح بس فى ناس خوفتنى اوى من اسعار صيانة و قطع غيار البى ام.
رأى حضرتك مين احسن؟

هو لو انا اللى باشترى حافكر فى التويوتا الفورتشنر ال ٢٧٠٠ لانها ماسكة العصاية من النص يعنى واسعة وفى نفس الوقت المتانة والاعتمادية والانتشار - يعنى لو عملت جدول تقييم حاتحط كل المتطلبات بتاعتك تحت بعض والعربيات الاربعة جنب بعض وحاتحط درجه واحدة او صفر جنب كل مطلب بتحققه اى عربية فيهم وتجمع وتشوف الناتج الاجمالى واللى تجيب درجه اعلى حاتختارها واقترح على حضرتك بنود التقييم تكون :
- الراحة - الاوبشنات - الانتشار - القوة والمتانة - الاتزان - سعر اعادة البيع - الوسع الداخلى - المصاريف الجارية ( فى الاكس وان والكوجا والتويوتا ال ٢٧٠٠ حاتكون متقاربة جدا ) - اسعار قطع الغيار - التوكيل كويس ولا متعب - مرحلة مابعد الضمان ( فيه مراكز صيانة غير التوكيل بتشغل فيها ولا حاتفضل طول عمرك فى التوكيل ) - الاعتمادية ( ودى عن طريق البحث فى المنتديات الاجنبية اللى بتتكلم عن كل عربية فيهم علشان تعرف العيوب اللى دايما الناس بتشتكى منها ) - الراحة النفسية ( يعنى تتفرج على كل عربية فيهم وتقعد جواها فى كرسى السواق والكرسى اللى جنبه والكنبة الخلفية وتفتح الشنطة وتشوف مساحتها وتبص من الزجاج الجانبى والخلفى والامامى ٣٦٠ درجه حواليك والمرايات وانت قاعد على كرسى السائق علشان تعرف اكتر واحدة فيهم فيها نقط ميته معدومة الرؤيا والموضوع ده ليس له علاقة بحجم العربية ) وربنا يوفقك للاختيار السليم