الموضوع: سكودا a7 والمكيف

اليوم توكيل غمرة قال لى بعد الكشف انة العربية بها تسريب داخلى ولازم تغير سربنتينة المكيف الداخلية طيب عرفت ازاى قال حطيناها على الجهاز اخوانى انا مرعوب على فك التابلوة يا ترى اصدق كلامهم واغير وهل يرجع التابلوة زى الاول. ارجو من عنده خبرة يفيدنى لوجة اللة وكم ساعة يستغرق هذا الامر

هاقول لحضرتك المعلومات الفنية دي للمساعدة والافاده ولان كلنا اخوه هنا في هذا المنتدى العزيز على قلبي واعذرني للاطاله عليك وانصحك تتفرج على الفيدوهات اللي عندك في الأخر
بالنسبة للتوكيل وكشفه بالجهاز فهو اعتمد على طريقة الفاكيوم وانا شرحها في بقية كلامي وبالنسبه للطابلوه هايفك الطابلوه عادي جدا ومافيش قلق هايرجع زي الاول حضرتك انت استلمه صح وراجع عليه قبل ماتمشي ونبه عليهم قبل الشغل انهم ملزمين بتغيير اي حاجه تبوز منهم غير كدا هم بيبقوا عارفين كل مسمار وعندهم المعدات والمنوالات الخاصة بالورش للصيانه
حتت انهم عرفوا منين انها التلاجه فغالبا ( لان طريقة الكشف بالصبغة والاشعة فوق البنفسجية او بالليزر زي مابيسموها ومتعارف عليه ماحدش بيستخدمها غير كدا في جهاز الكتروني ليك دكتكور بيصدر نغمات واصوات عند وجود تسريب الطريقتين مافيش حد او انا ماشفتش وماعرفش حد بيستخدمهم وخليني اتكلم عن نفسي من خلال خبرتي في السوق سواء مراكز صيانه او مراكز خدمة او حتى توكيلات زي غبور على سبيل المثال مع ان كل دول عندهم الامكانيات بس الفنيين بيقلبوا الشغل غالبا ويعتمدوا على الخبرة والعيوب الشائعة والقصة دي انا قلتها لحضرتك سابقا )
اللي بيتم كبس النظام هوا او بيعمل فاكيوم ( الفاكيوم بيفرغ النظام من الهواء فقط وينتظر ويراقب العدادات او في التوكيلات والمراكز الكبيره اللي بتستخدم محطة خدمة شحن التكييف بالكومبيوتر الجهاز بيبقى في الاوبشن دا انه يدي الفني انذار او الارم ان التكييف بيسرب بس مش اكتر من كدا فيمنعه انه يشحن على الفاضي توفيرا للفريون كمان بيبقى فيه خاصية شفط الفريون او استرجاع وتغيير الزيت من غير فك اي جزء ) ويراقب الضغط على العدادات ويسيبه نص ساعه لو الضغط نزل او الفاكيوم ارتفع يبقى كدا في تسريب وبيكشف خلال الفترة دي ولما يكبس هوا بس عن طربق المياه والصابون والفقاقيع مع ملاحظة ان الطريقة دي بتنفع فقط مع التسريبات الكبيره زي الخراطيم والوصلات اللي مابتبقاش مربوطه كويسه او فيها تنفيس بسيط بسبب اولسيه ضارب ومابتجبش غير منطقة حوض الموتور اللي فيها الكباس والسربنتينه الخارجية والوصلات والخراطيم والمواسير وطالما الفني مالقاش تسريبات في دول يبقى التسريب في التلاجه لانها الجزء اللي فاضل(كاتخمين لان هي الحاجه الوحيده اللي ماكشفش عليها ) بس عشان تتأكد اكتر انها هي ولا لا المفروض انها (التلاجه)
تتعزل يعني لو حضرتك عايز تعمل الحوار دا برا زيادة تأكيد قبل تصلح ويرجع العيب في حاجه تانيه استخدم احد الطريقتين
١- اعزل التلاجه يعني الوصلات الداخله ليها تتطبب( الطبب دي هاتشتري وصلات او تخرطها او فيه فنيين زي ( أحمد حنفي في المعادي والمهندس حارث في فيصل محطة المطبعة ومركز كوول اير في الحرفيين انا ماتعاملتش معاهم بشكل شخصي لكن سمعتهم في الشغل كويسه جدا بيبقوا عاملين حسابهم في الحوارات دي ) وتضغط باقي النظام هوا لغاية 300psiوننتظر لمدة ساعة على الاقل ( بأكد عليك من غير التلاجه لانها ممكن ماتستحملش الرقم دا ولو استحملته ممكن كبسها يطق مع ضغط الفريون لما تتشحن لانها في الظروف الطبيعية مابتشتغلش عند الرقم دا) وخلال الفتره دي يكشف على الكباس والخراطيم والسربنتينه الخارجية بالماية والصابون كويس ويتراقب الضغط لو الدنيا تمام التلاجه وتتاكد اكتر بعد فكها من خلال انك بتكبسها لوحدها برا ( مثلا الضغط يبقى ١٠٠:١٥٠psi مايزدش عن كدا ) وبتعملها طبب خاصة او الفني الشاطر واللي عنده عده ومعدات وفاهم بيجهز الكلام دا عنده ويستني ساعة وكمان يغطسها في مياه وبيبان او بيكون واضح اول مابتطلع بقع الزيت وتراكم الغبار عليها زي الطينه ودا بيبقى مسربة بشكل قاطع.
الطريقة دي بتاخد وقت وممكن العربية تبات في التوكيل لو الفني بوز حاجه ولا في قطع غيار ناقصة في المخزن وبعتوا يجيبوها المهم روحلهم بدري من اول اليوم وربنا يكرمك وتطلع اخر اليوم و مهم كمان تسألهم ضمان التكييف دلوقتي قد ايه بعد التصليح؟؟؟؟
٢-الطريقة التانية بشحن فريون بالصبغة وتستخدم التكييف لغاية ما الفريون يفضى وبعدين نكشف بالكشاف والنظاره الخاصة ومهم جدا ان خرطوم صرف التكييف ييقى نظيف وسالك لانه هوا الحكم هنا او المكان اللي بتظهر فيه الصبغة طبعا باقى اجزاء التكييف لازم تبقى نظيفه عشان تبان وتظهر مع كشاف الاشعة الزرقا او UV او الليزر زي مابيتسمى .
دا في حالة اذا كان فيها تسريبات ودي مابتاخدش وقت كتير غير انك بتنتظر لما الفريون يفضى ( يوم يومين شهر على حسب بيفضى في قد ايه وقت)
حاجه اخيره حابب انك تعملها وانصحك بيها بتغيير الخراطيم وجميع الاولسيهات وتغيير ابر بلوف الخدمة او الشحن لو تم الكشف بطريقة الفاكيوم لان احيانا بيبقى فيها تسريبات ومابتظهرش بالطريقة دي.
اسأل عن قطع الغيار والتكاليف داخل التوكيل وخارجه وقارن مستوى الشغل .
ودي مشاركة ليا في احد المواضيع شبه موضوعك وفيها روابط فيديو تقدر حضرتك تعرف منها معلومات مفيده وطرق الكشف

المشاركة الأصلية كتبت بواسطة mbx4e

خلاص يبقى
لازم تعرف مصدر التسريب وتقطع الشك باليقين راجع الفيديوهات دي
دا تسريب من التلاجة
https://youtu.be/h1wOCvV7bQs
ودا تسريب من الكباس
https://youtu.be/pCv7rCdcXsc
ودا تسريب من السربنتينه
https://youtu.be/KyAd3k-S58k
ودا تسريب من ابر بلوف الخدمة ومقرف جدا وصعب اكتشافه لانها احيانا بتسرب وماتبانش بس تقدر تغيرها لانه غير مكلفه الا لو في شحنة
والراجل هنا بيتكلم عن كل الطرق :
https://youtu.be/Cfm6m01FfeI
بس طبعا لازم الاماكن بتاعت الكباس وخطوط التكييف تبقى نظيفه مافهاش شحم او زيوت عشان الرؤية تبقى واضحة
وبالنسبة لطريقة المياه والصابون انا شايف انها مابتجبش نتيجه الا لو تسريب كبير او في جزء كاوتش غير كدا لازم تكبس هوا على ضغط عالى طب افرض ان في اجزاء ضعيفة او ماسكه نفسها يقوم الكبس الزياده يبوظها زي الاولسيهات والاجزاء الكاوتش زي الخراطيم واجزاء اللواكير ومثلا التلاجه بتشتغل على ضغط (٣٠:٥٠psi) متصممه انها متتحملش ضغط عالي زي السربنتينه ودي بتشتغل المفروض على (١٥٠:٣٥٠psi)
طيب اللي بيكبس بيوصل ل (psi ٣٠٠:٢٠٠)
مش دا ممكن يعمل تلف او يفك كبس اطراف التلاجه حتى لو مسربش وهو بيكشف هايسرب قريب مع التحميل وتغير درجات الحراره وضغط الفريون اللي بيتغير بسرعه ويغلي ويتبخر جوا المواسير ويرجع يتكثف بسرعة تاني
واي استفسار انا في الخدمة

ودا فيديو عربي لطريقة الكشف بالجهاز الالكتروني ليك ديتكتور
https://youtu.be/nY-MwtXU5bI

اخى الفاضل تحية اعزاز وتقدير لسعادتكم على تلكم المعلومات القيمة جدا جدا ولكرمكم واستفاضتكم فى الشرح وربنا يجعل كل هذا فى ميزان حسناتك. يارب.
انا ذهبت للتوكيل الساعة 8 صباحا ومشيت منة الساعة 6مساء خلال هذة الفترة تم تغيير السربنتينة الداخلية مبلغ التكلفة 8000 جنية غير 1200 لصيانه12.5 الف كيلو. التقفيل بدرجة 90 فى المائة مع بعض اللحوسة فى فرش السقف والقوايم من الداخل خاصة انى لونة ابيض وادينى موش عارف انظفه ازاى لانة اكيد هيسيب اثر بالاضافة الى لحوسة و لاسباب كتير اولها كرم واحترام وزوق عالى جدا من صاحب التوكيل الذى اثرنى بفضلة عمل لى تخفيض محترم فتحية اعزاز للدكتور على بك وانا الان بجرب واشوف

شكرا لكلام حضرتك كلنا اخوات وفي المساعده يافندم
احيه على البلد حسبي الله ونعم الوكيل
8000
بالخصم اوفر الصراحة
التلاجة اساسا برا تعمل كام؟وصناعة ايه ؟
ليهم حق مراكز التكييف تطلب 4 و 5 شابك راكب
1000 فك وتركيب تابلوه
500 مصنعيات اخري ( شحن وفريون وكشف واويلسيهات وفك وتركيب اكصدام وكشف وكبس و
واي قصة ماعدا قطع الغيار )
3500( سعر التلاجة الاصلي بالضمان من 6 شهور الى سنه وممكن تقل على حسب الصناعه وممكن تزيد)
بس ارجع اقول الوكيل احسن عشان الضمان المفروض التكييف يبقى ضمانه قد ايه بعد اللي اتعمل فيه ؟
بس من حقك كل حاجه ترجع زي ماكانت 100 \100
ماتتنازلش عن حقك والشغل المفروض يتعمل بنضافه عالية
ولازم تاخد منهم التلاجة القديمة والاجزاء اللي اتغيرت
وتشوف التنفيس فين عشان تطمن ان التكلفة تستاهل ومايبقاش في اي اعطال قدام ؟
ياترى حد اتفرج على الفيديوهات ولو بشكل سريع ؟؟؟
حضرتك اتفرجت عليها ؟؟؟؟

صعوبة الحوار كله في الطابلوه
ومش معضله لان فيه مراكز بتعمله
كمان التوكيل موجود الحمدلله الموضوع تم على خير باذن الله
لو اي حاجة ماتأجلش الزياره ليهم
وماتنساش
شغل تكييفك مرتين تلاته اسبوعيا صيف شتا
ماتشغلش التكييف وانت على سرعة نهائي يفضل على السلانسيه فقط
نظف السربنتينه والتلاجه وفلتر التكييف مره كل شهر او اتنين بالهوا
اتاكد ان خرطوم صرف حوض التلاجة سالك ومافهوش اي وساخة تلم تراب ورطوبه تملح وتبوظ التلاجه مستقبلا
حاول على ماتقدر الابتعاد عن ركن السيارة في الشمس فترات طويله
اتاكد دايما انك مشغل وضعية الريسكل للهوا
مادخلش هوا فريش الا لما تبقى عايز وفلتر التكييف راكب( وماتشلش فلتر التكييف فتره طويله) وماتنساش تقفله عشان الجو الجميل بتاعنا بيدخل تراب جامد يتراكم بعد فترة ويكون طينه مع ندي التكييف بيعمل تمليح والمواسير تتاكل وتنفس وتسرب الفريون

مرة اخرى تحية تقدير واحترام لحضرتك يا فندم
انا بالفعل اخدت السربنتينة المخلوعة واللة زى ما تكون لسة مطلعها من الكيس لان العربية مشت 12 الف كيلو فقط ولم اعرف ولم اسأل عن الجديدة صناعة اية اتلبخت لان وانا باستلم العربية كانو ناسبين خرطوم الفايظ وكانت المية بتنقط جوة العربية على رجلي فاصبت بالصدمة لان كان اول القصيدة كفر. ناهيك عن وساخة فرش القوايم وبعض اجزاء من فرش السقف بالمناسبة يافندم انظفها ازاى من غير ما تبقع لانى موش عاوز اغسل السطحية كلها لانة شفت الغسيل الكيماوى فى مركز فى اكتوبر عبارة عن دعك بالصابون ثم مسح بالمية ويقول لك فبريكة وغسيل كيماوى واسماء موش عارف شان كل حاجة فى البلد واحية ثم احية ثم احية المهم الحمد للة وحسبنا اللة

انا بالفعل شفت الفديوهات واشكر حضرتك عليها فهى قيمة جدا

هو حضرتك من سكان اكتوبر؟ ولا فين؟
في اي حي؟