الموضوع: هل عفشه العربيه واحده فى كل العربيات ولا بتختلف

نظام التعليق بيتقسم لنوعين أساسيين...

تعليق محوري AXLE

تعليق مستقل Independent


التعليق المحوري باختصار هو إنك تجيب محور (آكس) وتركب على كل طرف عجلة .. وتربط الأكس ده في جسم العربية عن طريق السوست والمساعدين (ده في الاتجاه الرأسي) وشدادات (في الاتجاه الأمامي)..



النظام ده واضح جدا وبنشوفه في كل عربيات النقل.

أنواع السوست اللي بتركب عليه تختلف.. في سوست ورق وفي سوست حلزونية (ياي)... وكل واحدة فيهم ليها ميزة وعيب.



في العربيات الملاكي أو الصغيرة ما بقاش النظام ده مستخدم إلا في الخلف..


التعليق المحوري ده ميزته إنه قوي وبيستحمل الشقا والمطبات... بس ماهواش مريح للركاب لإن العجلة لما بتطلع فوق مطب بتخلي الأكس كله يتحرك والعجلة التانية كمان بتتحرك مع المطب...

يعني تاخد مطب باليمين تلاقي الشمال هي كمان بتاخده !!!

آخر تعديل عليه إن الآكس نفسه يبقى مرن بحيث إنه ممكن يتلوي ويشتغل كإنه عمود ميزان (Sway Bar) منه فيه .. وده بيساعد كتير على الثبات في الملفات.. وقلل شوية من موضوع المطبات بين اليمين والشمال.





النوع التاني هو التعليق المستقل...

وده باختصار بيخلي كل عجلة تتحرك لوحدها عن طريق وصلة معدنية منفصلة .. اللي بنسميها المقص.



النظام ده مريح أكتر وبيدي ثبات أعلى في الملفات والمطبات.. لإن العجلة اللي اتحركت مش بتحرك العجلة التانية معاها... وبتفضل العجلة التانية ملامسة للأرض بكامل مساحتها..

بس مشكلته الأساسية إنه مش قوي زي نظام التعليق المحوري .. ده غير إن الأجزاء المتحركة الكتير محتاجة صيانة أكتر.


آخر تعديل على النظام ده كان بهدف زيادة الثبات على الطريق من خلال المحافظة على العجلة دايما في وضع رأسي ثابت مهما طلعت أو نزلت.. والكلام ده ببساطة عن طريق عمل مقصين فوق بعض ماسكين العجلة من فوق ومن تحت... وبكده بيحافظوا على العجلة دايما في وضع رأسي مهما اتحركت فوق أو تحت...

وده اللي بيسموه الـ"ملتي لينك" أو متعدد الوصلات... يعني مش مقص واحد في كل ناحية إنما مقصات متعددة



دلوقتي التعديلات على نظام المتعدد الوصلات ده كتير ومعقدة جدا..



الصورة دي بتلخص كل الكلام ده:




ولو عايز معلومات أكتر عن ثبات السيارات.. أنصحك تدخل على الموضوع ده:

http://www.nilemotors.net/Nile/375709-a.html


...