شيفرولية افيو ام هيونداى جراند اى تن

**سارة يحيى** · 19-08-2016 02:43 PM

السلام عليكم
انا لسة عضوة جديدة فى المنتدى بس المنتدى ما شاء الله واحد من اهم واكبر منتديات السيارات علشان كدة انا محتاجة مساعدتكم ضرورى.
انا لسة اول مرة هشترى عربية كمان فكرت اشتريها زيرو طبعا العربيات اسعارها وهمية فبعد حصر للانواع اللى ممكن اقدر اشتريها يعنى ثمنها مناسب ليا فاحتارت بين شيفرولية افيو وبين الهيونداى الجراند اى تن هاتشباك.
مش عارفة اخذ قرار بينهم ابدا الشيفرولية افيو سمعت وقريت عنها بعض العيوب بالنسبة الجراند اى تن غالية وصغيرة على ثمنها العالى. فياريت تساعدونى لانى محتارة جدا جدا
ولو ممكن اعرف عيوب ومميزات كل واحدة من العربيتين

**محمد 2001** · 19-08-2016 02:57 PM

ربنا يوفقك في الإختيار ومنتظرين معاكي رد الخبراء

**سارة يحيى** · 19-08-2016 03:04 PM

شكرا يا استاذ محمد وفعلا اخنا فى انتظار رد الخبراء

**scientist9508** · 19-08-2016 09:59 PM

بسم الله الرحمن الرحيم

الزملاء المحترمين

لكم الموده قبل الرأى الرشيد . . و هذا ما أراه رأى رشيد و لكم حرية قبوله أو رفضه

1 - الشيفروليه أفيو

بدأت فى مصر بإنطلاقه قوية و مشجعه . . و لكن الموديل الحالى به عيوب و يشتكى منه الكثير من ملاكه و يمكن حصر الأعطال المشهور بها آخر موديل للأفيو فى النقاط القليله القادمه

أ - إستهلاك عالى للوقود بما لا يدعم مسافه طويله على الصحراوى دون الإضطرار للتوقف للتزود بالوقود و بما يجعل إستخدامها مكلف

ب - أعطال مفاجئه و أشهرها (أو أسرعها فى الظهور) تخريف فى مؤشر عدد لفات المحرك

ج - المحرك متواضع فلا هو ضعيف مثل محرك اللوجان المانيوال و لا هو قوى مثل الفيرنا

د - تابلوه سخيف و قديم و كئيب و إضاءة عدادت السرعه و شكلها و حجمها كافية جدآ لأن تجعلك تكره السياره سريعآ و خاصة إن كنت ممن يسافر ليلآ كثيرآ

ه - وكيل الأفيو من أسوأ الوكلاء فى العالم العربى قاطبة (منصور شيفروليه)

و - أبعاد السياره غير واضحه للسائق و لذلك يفضل ملاك الأفيو تركيب الجناح الخلفى لتحاشى الإصطدام كلما رجعت السياره للخلف (هذا العيب نسبى . . أى قد يشعر به البعض و لا يشعر به البعض الآخر . . لأن معاناة هذا العيب تتوقف على مدى إحتراف القائد للقياده)

2 - الهيونداى جراند أى تن

بكل أمانه عليمه و دقه فى سديد الرأى . . لا أعرف عنها الكثير و لكن القليل الذى أعرفه صحيح وهو

1 - السياره غير محبوبه لأن سعرها لا يتناسب مع إمكانياتها . . بكلمات أبسط سعرها مستفز

2 - محرك السياره ليس سىء و أيضآ ليس ممتاز . . للتوضيح . .سوزوكى ألتو نفس الحجم و لكن الفرق بين محرك الألتو و الجراند أى تن هو سنوات ضوئيه لصالح الألتو فى القوه و الآداء (أقصد هنا الموديل السابق من الألتو)

3 - عدم إنتشار هذه السياره يرجع لسعرها المستفز

4 - كل موديلات هيونداى ما دون الإلانترا ينبت لها جناحين على جانبى السياره عند تخطى سرعة 120 كم/ساعه إستعدادآ للطيران السياره فوق الأسفلت . . . وبعد الطيران . . . لا توجد وسائل أمان

الإستنتاج

أرى أن الجراند آى تن أفضل من الأفيو و لكن يجب توخى الحذر فى الوصول لسرعات عاليه بهذه السياره كما يجب الحفاظ على الصيانات الدوريه و فى مواعيدها للحصول على أعلى آداء

أتمنى أن أكون قد وفقت للصائب الدقيق من الرأى السديد

هداكم الله لأرشد أمركم و أقومه

السلام عليكم ورحمة الله و بركاته

**mhasen57** · 19-08-2016 11:41 PM

اجمعى احتياجاتك من السياره وضعيها امامك من حيث مده القياده حجم السياره بالنسبه لكى وللاسره ولاكن جميع موديلات السيارات اليوم بها مشاكل ولاكن انظرى ايضا الى الوكيل وقطع الغيار وتوافرها

**سارة يحيى** · 19-08-2016 11:44 PM

متشكرة جدا لنصيحة حضرتك الغالية ولرد حضرتك الاكثر من رائع واللى وضحلى الفرق بكل وضوح وسهولة

**سارة يحيى** · 19-08-2016 11:47 PM

المشاركة الأصلية كتبت بواسطة mhasen57

اجمعى احتياجاتك من السياره وضعيها امامك من حيث مده القياده حجم السياره بالنسبه لكى وللاسره ولاكن جميع موديلات السيارات اليوم بها مشاكل ولاكن انظرى ايضا الى الوكيل وقطع الغيار وتوافرها

شكرا لرد حضرتك انا محتاجة عربية عملية وقليلة العيوب وتستحمل السفر يوميا رايح جاى 120 كم

**مهندس احمد F** · 20-08-2016 01:00 AM

انا نفسي نبطل .........................
واحد بيقول مش معايا جراند اي تن ولاعمري ركبتها وعمال..... ويقول جناحات وبتطير وثبات وسعر .
انت مش مالك للعربيه ولا ركبتها ولاسوقتها ولاسافرت بيها ولافضلت 5شهور زايي تقارن هنا وتقارن هنا وتلف علي المعارض وتعمل تيست درايف ولا ليك علاقه اصلا بالعربيه .
طيب استنتاجاتك دي جبتها منيييين ؟
اتقي الله يااخي وكفايه فتي .
انتو بتلبسو الناس في حيطه في الاخر بسبب الفتي المتاصل في المصريين ده وانا كنت هالبس بردو في عربيه زباله بسبب اني سمعت اراء ناس ماركبتش اصلا .
لاجربت العربيه ولا سوقتها وعمال تفتي !!
المهم . بالنسبه للمقارنه . بعد عن الافيو لانها مع صديق ليا واعطالها كتير وخامات سيئه جدا وسمعتها وحشه جدا جدا ومن بعد ماشتراها بشهر أ يتشكي من قيادتها وانها مش ريحه .
بالنسبه للجراند اشتريت جراند اي تن في مارس 3016 هاف اوبشنز
الجراند صاج محمل وقوي وصالون واسع
موتور ناعم وصوت منخفض
عفشه ناشفه نوعا ما تولد ثبات ممتاز للسياره
تكييف قوي جدا
سحب جيد
استهلاك البنزين داخل المدينه جيد وفي السفر ممتاز مع مرتبة الشرف
بالنسبه للارتفاع عن الارض حملتها 5 اشخاص وعمرها ماحكت مني في شوارع المخروبه (بلدنا ) تيل الفرامل عندي بيصفر من يوم الشراء وفي صيانة ال5000 هاغيره ان شاء الله .
تكلفة الصيانه لاول 1000كم كانت كلام فارغ حوالي 300 ج بتغيير زيت ال10 الاف . هاتحسبوها ازاي ؟ والله ماااعرف ازاي . انا دفعت 300 وشوية فكه .
الكلاكس جيد
خامات التابلوه ممتااااازه
الفنش ممتاااااز
عزل جيد
تغسل السياره مافيش ولانقطة مايه دخل الكابينه او الشنطه عكس سيارات زيرو مافيش داعي لذكر اساميهم
الكشافات والاناره قويه وممتازه
تقفل الزجاج تبقي في عزله عن همجيه ودوشة الشارع المصري
الكاسيت صوته جيد لو ضبط الاكيوليزر من الموبايل لو شغلت اغنيه بلوتوث .
تابلوه جميل جدااا واناره زرقاء شيك جداااااااا اكنك قاعد في مهبط طائرات
بلوتوث روعه ونقي
كنت بشتكي من قعدت الكرسي وفعلا كنت هاغير الكرسي او كنت هابيع العرببه ولكن اكتشفت ان العيب فيا انا . لاني كنت بحسب ان الكرسي ثابت مابيتحركش للخلف او الامام لاني ماكنتش لاقي الدراع بتاع التحريك لاني واخذ علي سواقة الياباني والامريكي بحكم عملي في الخليج . المهم ظبط الكرسي والمشكله اتحلت
المهم توكل علي الله سياره ممتااااازه وصفقه رابحه بكل المقاييس . وبالنسبه للسعر . العربيات كلها سعرها بقي نار . لو مالحقتش تشتري النهارده عمرك ماهاتشتري لان مصر مافيهاش نزول في الأسعار

تنبيه بالالتزام بقواعد المنتدى واداب الحوار

**مهندس احمد F** · 20-08-2016 01:04 AM

بالنسبه للجراند اي تن .
انا من طبعي بعلي الكاسيت فغالبا مش بسمع صفارة الانذار لما بعدي سرعة ال120 وكل مره الاقي نفسي سايق علي 140 و130 ومن غير مااحس .
لا بلاقي رعشه ولا تعويمه ولا ((جناحات)) ولاطيران ولا كاني ماشي علي 80 . وكل مره اقول الحمد لله ان اللادار ماصورنيش .
العربيه ثابته جدا جدا ومن شدة ثباتها مابحسش بالسرعه .

**مهندس احمد F** · 20-08-2016 01:10 AM

وفيه اخ كاتب الاستنتاج كذا كذا
استنتاج ايه ؟
هيا مسالة فيزياء او كمياء .
معاك العربيه اكتب رايك ولو مش معاك العربيه فياريت تسكت ومش تضلل الناس وتستنتج وتجود من دماغك وتلبس الناس في الحيط لانك بتبعدهم عن الصواب باستنتاجاتك دي
نفسي الانسان اللي مش معاه العربيه ومش هايعرف يرد علي اسئلة الناس في اي شق تاني سواء جراند او اي عربيه تانيه فياريت يسكت .
كفايه فتي !!
لاحول ولاقوة الا بالله