مشكلة عجيبة في التكييف

**Tastoo_99** · 21-09-2016 03:02 AM

السلام عليكم اخواني الكرام،

عربيتي لانسر 92 بطة مانيوال 1300 سي سي، التكيف ما شاء الله تلاجة وقوي ولكن عند تشغيله يحدث اشياء عجيبة جدا ؛
اولا: ترتفع حرارة المحرك جدا ويصل مؤشر الحرارة امامي الى الحد الاخير ويهبط قليلا بعد فترة للنصف ويصعد مرة اخرى للاخر وهكذا...
وهذا يحدث بعد تشغيل المكيف بدقائق رغم ان الحرارة دون تشغيل التكييف تكون اقل من النصف عند الربع تقريبا ومعتدله ولا تزيد عن الربع طول ما المكيف مغلق.

ثانيا: يقل عزم السيارة بطريقة ملحوظة للغاية على كل النقلات لدرجة اني اذا بطلع على مطلع او كوبري السرعة تقل جدا رغم الاستمرار في الدوس على دواسة البنزين واشعر السيارة سترجع بي للخلف وبمجرد اطفاءة فورا يرجع العزم شديد.

ثالثا: عندما يقل العزم بعد عدة دقائق السيارة فجأة تسترجع عزمها الطبيعي وتندفع للامام بشدة فجأة!! ثم ترجع مرة اخرى للعزم البطيء وهكذا لدرجة اني في مرة كنت هلبس في الامامي لان السيارة استعادة عزمها فجأة واندفعت للامام بشدة وانا ضاغط على دواسة البنزين...! ومن ثم تعود للعزم القليل مرة اخرى (كأني في مرجيحة فجأه تشد وفجأة تبطىء).

لا اعلم ماهي المشكلة ولا اعلم هل ازور متخصص في التكييف ام ميكانيكي؟

افيدوني افادكم الله، شكرا.

**mbx4e** · 21-09-2016 09:56 AM

مشاكلك مش مشاكل تكييف
دي مشاكل ميكانيكا
١-مشكلة حرارة بتظهر مع تحميل الكباس على الموتور
دي حلها بتشوف دورة المياه وتكشف عليها كاملة
لان دا دليل على مشكلة فيها مش معنى ان من غير التكييف مابتسخنش يبقى مافيش مشكلة بالعكس فيه مشكله بس بتظهر مع التكييف اكتر وراجع على الدورة كلها .
والاحتمالات كتير وراجع على كله وابتدي من
الخراطيم وصلات اكواع او شجرة او مواسير او الراديتير او غطا الرادتير و طلمبة المياه و حساس الحراره ثيرموستات الكهربا في الراديتير والمراوح وثيرموستات الكوعة ماتلغيش غيرو بواحد اصلي الشكمان والشكمان .
وش السلندر جوان وش السلندر طبب المياه في الموتور او البلوك البوجيهات تقديم او تاخير الشراره يعني ضبط كهربا الاسبراتير تأخير وتقديم توقيت الاشتعال يعني مراجعة تقسيمة الكاتينه للمكنه .
ضعف قدرة طرمبة الزيت والخلوص لسبايك الكرنك انسداد او ضعف بلوف الزيت تحميل التاكيهات او عدم زبطها كل دا يسبب مشاكل حراره راجع على دورة المياه وابدأ بالاسهل فالسهل فاصعب فالاصعب.
٢-مشكلة ضعف عزم الموتور مع تشغيل الكباس دا شي طبيعي انه يحصل فابيتم التغلب على كدا من خلال ابانص او حساس او سولونويد بيركب على الكربراتير او نظام حقن الوقود او الانجكشن عشان يعلى الماكنة عشان يزود عزمها ويرفع عدد لفات الموتور rpm مع تشغيل المكيف ودا نظام بييقى نازل في العربية وهو فيه عطل او خلل عندك .
وانت عندك كربراتير فهتلاقي موضوع الابانص وهو عباره عن كبسوله مبططه مدوره ومكبوسه او متبرشمه وبتشتغل كهربا يعني ليها فيشه وبتاخد توصيلاتها مع دايرة التكييف او بضغط فاكيوم او قوة شفط الموتور ودا من خلال خراطيم هوا صغيره كواتش بتتوصل مع العمة او الاسبراتير او الاتنين
لكن لو انجكشن او هاف انجكشن زي ما الصنايعية بيسموا ممكن يبقى في الموضوع حساس .

**Tastoo_99** · 22-09-2016 09:33 AM

اولا انا بشكرك جدا على تعاونك معايا ومساعدتي في ايجاد سبب للمشكلة

ثانيا : انا بصراحة مش فاهم اوي هههههههه ولما كتبت الكلام دا حسيت اني ابيع العربية احسن ههههههههههه
على العموم انا هزور ميكانيكي واحاول انقل الكلام دا له كأني فاهم ههههههههه

شكرا ليك ، وما شاء الله عليك احلى حاجة انك تكون فاهم :)

**mbx4e** · 22-09-2016 10:49 AM

ولا يهمك يافندم بس حضرتك لما تروح ويبقى عندك فكرة بسيطة عن طريقة شغل الحاجة ومع الملاحظة والمشي لانك انت اكتر حد يعرف يشخص العطل بما انك اكتر حد بتحس العربية وتقدر تعرف بتعمل ايه
انت اكتر حد هاترتاح انا ماقلتش كدا عشان اعقدك او اتفزلك عليك مثلا بس موضوع الفهم هايرحمك كتير من اشتغالات ويوفرك وقت فلوس وتعب اعصاب وجرب وانت هاتفهم قصدي وانت بنفسك بعد كدا الميكانيكي هايطلعلك حاجات نص نص ويركبهالك تاني وهايلقيك انت بنفسك اللي بتقوله غير واستنى عشان اجبهالك عشان توفر وقت ومصنعيات وبالنسبه ل
نظام تبريد الموتور سهل بس بيدخل في سخونة الموتور كذا عامل عشان كدا انا كتبت لحضرتك كل الاجزاء اللي بتسبب المشاكل دي وممكن يبقى اكتر من سبب مثلا طرمبة ضغيفة + راديتير مسدود جزئيا
او ثرموستات الكوعة لو راكب بيعلق عند الفتح او مراوح ضعيفة او شجرة المياه او الماسوره اللي ورا البلوك مسدوده جزئيا
فتلاقي الحل فيه كذا حاجه بعد كدا طبب المياه
والشكمان دا بند لوحده ازبطه الاول
لاقيت ان مافيش تحسن ملحوظ يبقى ادخل على زبط الكهربا في الاسبراتير وزبط سن البوجيه بالفيلر او الثغرة بتاعت سن البوجيه وتركب نوع ورقم بوجيه معتمد ومخصص للموتور
اذا ماحصلش تحسن يبقى امرك لله خش على الموتور وابدأ بزبط تقسيمة الماكنه وسير الكاتينه كل دا صيانة وزبط للماكنة وتغير قطع غيار ومافيش شغل عمرة او طقم شنمبر او شغل خراطة تقيل اعتبره شغل تزبيطات .
مافيش تحسن خش على الهيد او وش الموتور عمود الكامه او التاكيهات و خراطة وش السلندر وجوانه وضبط التاكيهات ومراجعة بلوف الزيت
لغاية المرحلة دي ( مافيش شمبر او عمرة بس بنقدر نحدد منها لو الموتور محتاج وعلى حسب تقييم الميكانيكي و على حسب خبرتة الفنية وممكن نحتاج خراطة لوش الشلندر او استبداله بواحد استيراد)
لسه فيه مشاكل ( يبقى تبص الموتور من تحت طرمبة الزيت وضغطها اللي بيجي من حبك خلوص السبايك) هنا لو فيه مشاكل ممكن تحتاج عمرة او شمبر ونرجع لرأي وخبرة الميكانيكي وثقتك فيه
الموتور بالذات العربيات القديمه( عايز اقولك انها معمره وعمرها الافتراضي اعلى من الجديد ) لما بيتاكل من جوا ودورة الزيت والتبريد تضعف لعدم الصيانة (الجيده مهمة جدا الصيانة الجيدة) في اول ١٠ سنين من حياته بيهلك ويقرف اصحاب العربية المستقبليين
الموضوع بتاع عزم الماكنة هاتشوف الميكانيكي لو عنده خبره ودراية هايفيدك ماعندوش معلومات وانت بتجيب قطع غيار بالذات بتوع الاستيراد ومن على النت حاول تعرف ايه اللي بيركب عندك وفين وراجع عليه لو كهربا عند كهربائي تكييف لو ابانص عند ميكانيكي بس الحاجة تبقى شغالة ماتبقاش ملغية مافيش حل وغلبك خالص روح لاحمد حنفي محفوظ كهربائي تكييف في المعادي اعتقد دا ممكن يفيدك سمعته كويسه بس للاسف ماعنديش تعامل شخصي او ماسبقش ليا التعامل معاه
وانا بقول لحضرتك اسأل وابحث عشان لما تروح لحد تبقى عارف وانت اللي بتوجهه للي في بالك زي مابتسوق عربيتك.
وخلي بالك
ماحدش يفتح دورة الفريون الا لو شحنته زياده او بلية كلاتش الكباس بايظه يعني عاملة صوت ومهربة شحم هنا تشك لنها لو تقيله ممكن تعمل حمل زياده يسخن الموتور.
وفيه احتمال ضعيف شوفه برده لو السير مشدود جامد او الكباس متعدل قبل كدا وحاجه مش راكبه بطريقه صح هنا ممكن تحتاج شغل تكييف

اما من اول الكلام حضرتك قلت انه شغال تمام عشان كدا دماغي راحت في الميكانيكي كمان بسبب المشكله التانيه ( ياريت تعملها هي الاول لان الحمل الزياده على الموتور على عزم قليل ممكن يعمل قصة السخونيه مع كذا عامل تاني)
السؤال بقى التكييف شغال تمام تلاجه وبيسقع حلو ولا بيرطب ويلطف بالنهار في جو حر وشمس ورطوبه وصرف التكييف بينقط ولا لا؟

**mbx4e** · 22-09-2016 11:28 AM

تعديل للرد الاخير عشان الوقت ماسمحش

الموضوع بتاع عزم الماكنة هاتشوف الميكانيكي لو عنده خبره ودراية هايفيدك ماعندوش معلومات وانت بتجيب قطع الغيار اسأل بالذات بتوع الاستيراد بس حد يكون فاهم يدلك ومن على النت حاول تبحث و تعرف ايه النظام اللي بيركب عندك على الموتور ومكانه فين وراجع عليه بنفسك لو كان نظام كهربا يبقى روح عند كهربائي تكييف
و لو ابانص ( شغل في الكربراتير ) يبقى روح عند ميكانيكي بس الحاجة عندك تبقى شغالة ماتبقاش ملغية.
مافيش حل وغلبك خالص روح لاحمد حنفي محفوظ كهربائي تكييف في المعادي مشهور جدا اعتقد دا ممكن يفيدك سمعته كويسه بس للاسف ماعنديش سابق تعامل شخصي معاه قبل كدا
وانا بقول لحضرتك اسأل وابحث عشان لما تروح لحد تبقى عارف وانت اللي بتوجهه للي في بالك زي مابتسوق عربيتك.
وخلي بالك من حاجه وهي
ماحدش يفتح دورة الفريون الا لو شحنته زياده تقدر تعرفها لو الماسورة الساقعه الكبيره معرقة لغاية الكباس شوف الموضوع دا بنفسك وقلي
او بلية كلاتش الكباس بايظه يعني عاملة صوت ومهربة شحم هنا تشك لانها لو تقيله ممكن تعمل حمل زياده يسخن الموتور.
وفيه احتمال ضعيف شوفه برده لو السير مشدود جامد او الكباس متعدل قبل كدا وحاجه مش راكبه بطريقه صح هنا ممكن تحتاج شغل تكييف وماتبقاش مشكلة تكييف .
كمان نظام تشغيل المراوح لو فيه كنترول او كتاوت بينظم سرعات المراوح او سرعات المراوح العالية ملغية دا لو عندك تبقى مشكلة كهربا وقطع غيار .
كمان حاول تبقى السربنتينه الخارجية نظيفه والفراغ اللي بينها وبين الراديتير نظيف دايما مافيش ورق شجر او حاجه بتمنع مرور الهوا من السربنتينه الخارجية للراديتر او لو فيه قميص فيبر وملغي او مكسر راجع عليه .
في اول الكلام حضرتك قلت انه شغال تمام عشان كدا دماغي راحت في الميكانيكا كمان بسبب المشكله التانيه ( ياريت تعملها هي الاول لان الحمل الزياده على الموتور على عزم قليل ممكن يعمل قصة السخونيه مع كذا عامل تاني ) .
السؤال بقى التكييف شغال تمام تلاجه وبيسقع حلو ولا بيرطب ويلطف بالنهار في جو حر وشمس ورطوبه ؟؟؟ وفترات تشغيله قد ايه وقت ؟؟؟، وصرف التكييف بينقط ولا لا ؟؟؟؟ ، سؤال اخير واستحملني طولت عليك هل فيه حاجه في التكييف متعدله قبل كدا كباس او خلافه ؟؟؟؟