إيه يتجاب بربع مليون!

**Ahmedology** · 28-10-2016 10:29 PM

السلام عليكم.
من سنتين بس الربع مليون كانوا يجيبولي ركوبة محترمة، في ظل الهطل اللي بيحصل دلوأتي وسعر العربية اللي بيزيد كل يوم ألفين تلاتة الواحد مش عارف يعمل إيه. العربية تبقى زيّ ما هية بوقفتها وركنتها في المعرض متحركتش سنتي من مكانها، وأول الشهر ب 250 ألف، وآخر الشهر 280 ألف، والحق يا استاذ لو شاري عشان حتزيد تاني!

السؤال دلوأتي، إيه يتجاب زيرو من معرض استلام فوري ب 250 ألف؟ وياريت محدش يقولي هات مستعمل لأنه مش حينفع، لازم زيرو. رجاء الإفادة.

**أحمد عثمان** · 29-10-2016 01:14 PM

طيب انت عايز عربية مواصفاتها إيه؟؟
يعني سيدان ولا كروس أوفر و لا هاتشباك؟؟؟
لازم تحدد عشان نعرف نساعدك.

**أحمد عثمان** · 29-10-2016 01:49 PM

بدايةً لازم تعرف إن عشان تستلم فوري حيبقى فيه أوفر برايس محترم بيختلف حسب نوع العربية و الطلب عليها و عوامل تانية كتير, عشان كده العربيات اللي حقوللك عليها حتبقى في رينج 200000 جنيه عشان مش عارف الزيادة بتاعة التسليم الفوري حتبقى قد إيه.
1- شيفرولية كروز هاي لاين 196000
2- بروتون بريف 200000 العربية دي ممتازة فعلاً و ياريت تدخل تبص على إمكانياتها و الأوبشنز بتاعها.
3- سانديرو ستيب واي هاي لاين نافيجيشن 202000 عربية عالية عشان المطبات و النقر.
4- فورد فوكاس أوتوماتيك سبورت 225000 بس خد بالك من موضوع البنزين ال95
5- رينو فلوانس هاي لاين 235000 لو سعها مش حيزيد عن ال250000 عند الاستلام الفوري.

طبعاً في إختيارات تانية كتير بس أنا شخصياً بحب لما أجيب عربية أجيب أعلى كاتيجوري عشان أستمتع فعلاً , يعني ممكن تلاقي فلوانس أول فئة أوتوماتيك بس مش هاي لاين ب 210000 و ممكن تلاقي حاجة زي ميجان بلاي ب 215000 برضه عربية ممتازة لو حابب النوع ده.

ربنا يوفقك.

**Ahmedology** · 31-10-2016 11:09 AM

شكراً جزيلاً يا فندم. رد وافي فعلاً. أنا رحت الليثي وأوتو سمير ريان، ولقيت الفلونس الهاي لاين بس اللي موجودة استلام فوري ب 290 ألف!
وفيه سنترا 235 ألف ولانسر 250 ألف وياريس 245 ألف.
أنا بدوّر على عربية سيدان تكون أمان عشان بسافر كتير ولمّا أبيعها كمان فترة مخسرش كتير، بس كدة.
شكلها حترسى على سنترا أو ياريس. إيه رأي الناس أنهي أحسن؟

**أحمد عثمان** · 02-11-2016 01:35 PM

لو انت مصمم على إختيار من اللي انت قايلهم يبقى أرشحلك السنترا.
في رأيي هي أفضلهم.
بالتوفيق إن شاء الله.

**Ahmedology** · 02-11-2016 02:02 PM

مش مصمم والله، ده اللي لقيتوا متاح بالميزانية بتاعتي. لو كنت لقيت حاجة تانية كنت ححطها في الاعتبار طبعاً..
رحت النهاردة أباظة أسأل على فورد لقيتها بتبدأ من 260 ألف السيدان الفاضية اللي مفهاش أي حاجة :(

**hero** · 15-11-2016 10:53 PM

المشكلة في شراء الزيرو حاليا هو ان اي تغير في سعر الدولار هاينزل السيارة غير معدل هبوط سعرها بسبب الاستعمال..
كل جنية في سعر الدولار هايفرق من 20 ل 30 الف جنية في سعر السيارة