علبة البيئة اللى على الشكمان مافيهاش فحم لكن فيها مواد بتحول الاكاسيد الضارة للبيئة والسامة لاكاسيد مافيهاش ضرر للبيئة او اضرارها اقل شوية ومش سامة زى اول اكسيد الكربون بيتحول لثانى اكسيد الكربون وبخار ميه وزى اكاسيد النيتروجين - المواد اللى جوه العلبة دى من المواد الغالية علشان كده بيبقى سعر علبة البيئة غالى - والمواد دى مش بتخلص بمرور الزمن لانها بتنشط لما بتسخن وترجع تانى لاصلها - اللى بيبوظها هو عدم جودة الحريق فى الموتور بسبب مثلا الميس فاير او الموتور بياكل زيت فبيتكون عليها كربون وزيوت وبتتسد ومالهاش اى حل غير التغيير - لو لغيت علبة البيئة او فرغتها العربية اداءها حايختلف وحاتحرق بنزين اكتر من العادى لان العلبة دى قبلها سينسور اكسجين وبعدها سينسور اكسجين تانى والكمبيوتر دايما بيقارن السينسورين وياخد منهم شوية معلومات بيستخدمها فى تظبيط كمية البنزين اللى طالعة من الرشاشات داخل الموتور - وبالتالى فى حالة الغائها الكمبيوتر مش حايبقى عنده المعلومة دى وبالتالى حايخلى الرشاشات دايما تضخ بنزين زيادة وده بياثر على استهلاك البنزين وبيزوده .
المفضلات