الموضوع: فتيس اوتو فيرنا مأخر نقلات

المشكلة طبعا في الزيت اللي حضرتك حاطه..

زيت الموبل 220 ده زيت مواصفته مختلفة تماما عن الزيت اللي المفروض يتحط عندك..

الزيت المطلوب عندك اسمه ATF SP-III (أو SP-3)...

الزيت ده هو نفسه بتاع الميتسوبيشي... وما ينفعش تحط أي زيت تاني غيره..



الزيت موجود عند توكيل ميتسوبيشي وتوكيل كيا.. وممكن تلاقيه عند بتوع قطع الغيار.. ومش غالي.


أهم حاجة تتأكد إن الزيت مكتوب عليه SP-III


...

المشاركة الأصلية كتبت بواسطة wael6

و لا حتى زيت 320 موبيل
من فضلك هل تغيير الفلتر فى مشكله للفتيس و لالا
وهل لازم كل مره مع تغيير الزيت ؟
والزيت كل 40 الف ولا 60 الف كم؟
ونقلات الفتيس الاوتو على سرعات كام ؟
وشكرا جزيلا

وﻻ حتى ال320..

مواصفة الزيت شيء مهم جدا جدا.. خصوصا في الفتيس الأوتوماتيك.. ﻹنه حساس جدا لنوع الزيت.

علشان تعرف الزيت الصح.. ﻻزم ترجع لكتالوج عربيتك.. هناك مكتوب نوع الزيت وكميته ومعاد تغييره

زي ما قلتلك.. الزيت مواصفته sp-3.. والكمية في حدود 6 لتر تقريبا.. وبيتغير على 40 ألف كيلومتر...

معرفش بصراحة موضوع الفلتر ده بيتغير أصلا ولا ﻷ.. وأغلب العربيات بيبقى فيها "صفاية" بتتغسل بالزيت النظيف قبل ما تركب.



بالنسبة لسرعات النقل في الفتيس.. فده بيعتمد عليك انت... مفيش سرعات معينة..

بمعنى.. إنك لو كنت بتسوق بالهداوة ورجلك خفيفة عالدواسة فالفتيس هيفهم إنك عايز توفر بنزين ومش فارق مع تسارع العرية.. فهينقل بدري..

والعكس لو كنت عايز تسارع عالي.. هتدوس بنزين جامد لحد ما الدواسة توصل الأرض.. وساعتها الفتيس هيفهم إنك عايز تجيب آخر الموتور علشان عايز تسارع ومش مهم البنزين ولا أي حاجة تانية... وهتلاقي الفتيس بينقل لما عداد الrpm يوصل للخط الأحمر..

ولو وازنت رجلك في النص.. الفتيس بردو هينقل على دوران متوسط.

ده طبعا غير الطرق اليدوية في استخدام الفتيس الأوتوماتيك...

وما تنساش تتأكد إن لمبة فصل الأوفردرايف (o/d off) مطفية في التابلوه.


...

المشاركة الأصلية كتبت بواسطة wael6

اللى انا فهمته من بحثى ع النت
ان الفتيس بالكامل فيه 6.1 لتر
نص الكمية مبتنزلش خالص الا بحل الفتيس بالكامل او عن طريق خرطوم الراجع لتبريد الفتيس
والنصف الاخر بنزل من الطبة السفليه للكرتيرة ايفل السيارة
بدليل ان لما جيت اركب الفتيس اول مره لانه كان استيراد
الميكانيكي حط 4 علب بس مع تنضيف الفلتر او الصفاية بتاعته

انا قريت فى مواصفات الموبيل 320 انه 3 و 220 انه 2
ولقيت فى الشل نوع اسمه spirax s3 md sp3 هل ده كويس
ولا اروح اجيب الزيت والفلتر من توكيل غبور ؟

هل كده انا فاهم صح ولالا ؟


متشكرا جدا لتواصل وافادتكم الكريمة

ولا موبل ولا شل ينفعوا معاك..

معندهمش زيت بالمواصفة المطلوبة


على فكرة .. زيت الATF SP-III بتاع ميتسوبيشي مش غالي بالمقارنة مع زيوت كتير في السوق...

والزيت موجود في السوق بسهولة ﻹن العربيات الميتسوبيشي والهيونداي والكيا مفيش أكتر منهم في مصر...

بس انت دور في المكان الصح.


وخلي بالك.. الموضوع يلخبط شوية.. علشان زيت الفتيس بالذات فيه أسماء مواصفات متشابهة..

يعني مثلا
.. DEXRON III ده بتاع عربيات جنرال موتورز... وبيستخدم في عربيات من ماركات تانية كتير..
و T-III بتاع عربيات تويوتا...
ATF M-III بتاع مازدا
إنما SP-III بتاع ميتسوبيشي وهيونداي وكيا

يعني مش أي حاجة مكتوب عليها 3 تنفع معاك..


وخط في دماغك دايما إن مش مهم الماركة... المهم المواصفة.. ولو لقيت علبة الزيت مكتوب عليها SP-III يبقى تجيبها ومفيش قلق إن شاء الله.

الزيوت دي تنفعك




وطبعا.. زيوت آمسويل



هي زيوت تخليقية ممتازة ومفيش كلام عليها ...

غالية؟؟؟ أيوه غالية قوي... بس بتعيش فترات أطول من ال40 ألف كيلومتر بكتير (ممكن توصل لحوالي 300 ألف كيلومتر حسب المكتوب في موقعهم)..

بس هي تصنف في فئة الزيوت اللي بتمشي مع كذا مواصفة... يعني هتلاقي العلبة مكتوب عليها أسماء مواصفات تانية كتير غير مواصفة الSP-III...

وده يمكن اللي مخليني ميال للزيت المتخصص أكتر... اللي مكتوب عليه SP-III وبس.



ورجاء حار....

ما تجيبش أي زيوت من غبور... الزيوت اللي عنده كلها مش أصلية وماهياش مطابقة للمواصفات المطلوبة من هيونداي.


...