مشكلة في تدوير العربية

**Alyfathi** · 26-02-2017 07:57 PM

السلام عليكم

كنت ماشي بالعربية و ركنت خمس دقائق اجيب حاجة و رجعت ادور و العربية مش رضيت تدور خالص سيبتها و رجعت في نفس اليوم بليل بعد حوالي 10 ساعات دارت معايا روحت للكهربائي و قيست دينامو و البطارية لاقيتهم كويسين مشيت بها يومين و جيت النهاردة الصبح ادورها تاني مش رضيت تدور

كدة ممكن يكون المشكلة اية ؟؟؟؟ ياريت حل لاتي مش عارف و مش متاكد اذا كانت بطارية ام لا ؟

ارجو الافادة انا راكب عندى بطارية 55 اي سي ديلكو على عربية دايو لانوس و بطارية من سنة و 6 شهور تقريبا و العربية مش بتعتل معايا قبل كدة

**ahmed.zahra** · 27-02-2017 11:24 AM

خلي الكهربائي ييجي يقيس البطارية و الشحن على الوضع ده. ممكن يكون كتاوت دينامو

**svneleven** · 28-02-2017 04:48 AM

لو مش بتدور خالص يعني المارش مش بيلف يبقي ممكن البطارية او المارش او الكونتاكت نفسه او فيوز عمومي. لو المارش بيلف لكن مش بتدور يبقي ممكن الشفرة لو المفتاح مشفر و ممكن حساس الكرنك و ممكن بوجيهات و ممكن موبينة و ممكن طرمبة ينزين و حاجات كتير.

**salam100100** · 28-02-2017 07:51 AM

هى بتعمل ايه بظبط؟
هل بتسمع صوت المرش؟ والعربيه مش راضيه تلقط؟ كدا احتمالات البطاريه او بسبب ان الرشاشات بتسيل- فبتملى غرفه الاحتراق عشان كدا مبتدرش لما تركنها فتره قصيره
لو دى الحاله- جرب تدوس بنزين لاخر الدواسه (كدا انت بلغت الكومبيوتر بانه يفصل الرشاشات) لو دارت يبقا العيب من الرشاشات
الحركه دى اسمها
Clear Flood mode

لو مفيش اى صوت؟ ممكن البطاريه او المارش

اختبار البطاريه سهل - نور النور الوسط ودور العربيه لو لقيت ان نور العربيه وطى جدا جدا يبقا البطاريه ضعيفه

العادى ان النور يوطى حاجه بسيطه مش يموت خالص

انا كان معايا نوبيرا وكانت بتعمل معايا انها مبسمعش حاجه خالص وطلع المارش وغيرته مرتين فى اقل من 100 الف كيلو

**zendo** · 01-03-2017 02:51 PM

حساس كرنك او مارش جهاز كشف اعطال هيبين كل حاجة

**عبدالله الناصح** · 01-03-2017 06:42 PM

بطارية بنسبة كبيرة

**salam100100** · 02-03-2017 07:31 AM

انا افتكرت حاجه حصلت معايا ف127 زمان- كان كبل الارضى مصدى وقواطيش البطاريه مكنتش مربوطه كويس
جننتنى - مره تشتغل عادى ومره متلقتش

**msadeka** · 02-03-2017 03:24 PM

ارجو قراءة تعليقى بعناية واتمنى انه يفيدك

الموضوع دة حصل معاية فى نوبيرا 2

البطارية بتاعتى بقالها معاية 4 سنوات ولما عملت كدة كل الناس قالولى بطارية وعمرها الافتراضى انتهى روحت اشتريت وصلة والبطارية دارت مرة بالوصلة ومدارتش تانى اوصل الوصلة والا كان فى اى حاجة كل الناس قالت البطارية باظت

وبالفعل اشتريت بطارية جديدة ac ب 900 جنيه - ودورت العربية دارت تانى يوم مرضيتش تدور

الحل انى غيرت فلتر بنزين - وبوجيهات والحمد لله الدنيا بقت تمام

جرب تعمل وصلة ولو دارت اشترى وصلة وخليها معاك وابقى اشترى بطارية يمكن باظت - ولو حصل نفس اللى حصل معاية ومدارتش بالوصلة غير البوجيهات وفلتر البنزين

اتمنى اكون افادتك وابقى قولى النتيجة