الموضوع: هل بنزين 95 بيفرق؟؟؟

السلام عليكم ورحمة الله وبركاته،

أنا سعيد جداً بالمشاركات، وبالمناسبة أنا أسمي أسامه موسى، مهندس

أولاً سعة المحرك ليست مقياساً على نوع البنزين والمثال على كدة البيجو 504 القديمة محرك 2000 مم مكعب ولو خد بنزين 92 ولا
حيفرق معاه أي حاجة.

اسمحولي اوضح لحضراتكم شوية حاجات، أولاً لازم نتفق ان أفضل سيارات موجودة في السوق المصري من حيث تكنولوجيا
المحركات والإلكترونيات هي السيارات الألماني المصنعة داخل ألمانيا أو دول أوروبا، يعني:

VW
BMW
Mecreds
Opel

ودا الترتيب الصحيح، حيث تأتي مجموعة فولكس فاجن على رأس أفضل الشركات العالمية من حيث إلكترونيات المحرك تليها بي إم
دبليو ...إلخ.

إلكترونيات المحرك تتكون من التالي:

1. كنترول الموتور
2. البوابة (سواء إلكترونية أو عادة بسلك أكسيراتير)
3. الرشاشات (Injectors)
4. حساسات الأكسجين (LAmbda Probes)
5. حساس السماعة (Knock Sensor)
6. حساس الكرنك
7. حساس الكامة
8. صمام الراجع
9. مبخر البنزين
10. حساس وضع البوابة (TPS)
11. حساس درجة الحرارة

وفي شوية حاجات تانية مش ضروري نتكلم عنها

بالنسبة للعربيات الياباني بداية من سنة (2005):

كل الموجود فيها
حساس كامة وكرنك وأكسجين وبوابة وكنترول مع سوفت وير بدائي شوية

وبالمثل عربيات Opel غير المصنعة داخل ألمانيا زي الأسترا ودي مصنعة في البرازيل.

العربيات الأسيوية الأخرى (مفيهاش الكلام ده خالص، مجرد كنترول محرك بيتحكم في حركة الرشاشات وحساس اكسجين وبعض
الحساسات الأخرى الشكلية)

طيب دورة البنزين بتمشي إزاي؟

نتكلم على النظام المتطور وده حيوضح كل حاجة ليكم.

حضرتك تنزل الصبح من البيت، تفتح باب عربيتك يقوم سويتش الباب يروح يدي إشارة فورية لكتاوت طلمبة البنزين علشان تحضر
نفسها بحيث أول لما تدور العربية تدور فوراً بدون أي تأخير في الدوارة واي تأخير في الدوراة ليه أساسبا تانية نتيجة عيوب. المهم
تدور العربية يقوم حساس درجة الحرارة الي راكب على مسار سائل التبريد يبعت درجة حرارة سائل التبريد لكنترول العربية يحس
الكنترول ان درجة الحرارة أقل من 90 فيعمل أيه؟

1. يزود سرعة فتح وقفل الرشاشات (Injectors).
2. يفتح البوابة بزاوية أكبر من سرعة المحرك والعربية سخنة على السلانسيه (Idle Speed) ودا للسماح بدخول كمية
هواء أكبر فيوؤدي إلى دوران المحرك بسرعة أعلى وفي الحالة دي الـ RPM بتاع العربية يرتفع.
4. يبعت إشارة لحساس الأكسجين يقوله خلي بالك الحرق بتاع البنزين حيبقى ني لما يبقى تام قولي (يعني وانت بتسخن العربية
الصبح تشك ريحة بنزين في العادم نتيجة عدم اكتمال احتراق البنزين).
5. يروح يبعت إشارة لحساس السماعة يقوله لما جسم المحرك يوصل لدجة معينه قولي (حساس السماعة شبه سماعة الدكتور فعلاً
وعلشان كدة الصنيعية مسمينه كدا)

المهم خلال حوالي 3 دقائق يبدأ الوقود يتحرق بالكامل فحساس الأكسجين يقول أنا جاهز وراه حساس السماعة. فيبدأ الكنترول يقلل
من حركة فتح وقفل الرشاشات ويقلل زاوية فتح البوابة وتختفي رائحة البنزين من العادم وينزل الـ RPM ويهدأ صوت العربية. في
العربيات غير المجهزة إلكترونياً في شفاط ودا إلى بيعمل نفس الحكاية بس ميكانيكياً وطبعاً من غير حساسات.

دي فكرة سريعة عن المحرك

ملحوظة مهمة للكل، خطر جداً تدور العربية الصبح وتمشي بيها دي حاجة اسمها Cold Start علشان خلال توقف العربية
زيت المحرك بينزل تحت في حوض تجميع الزيت (كرتيرة الزيت) ومع دوران العربية الصبح بتبدأ طلمبة الزيت الموجودة في
حوض الزيت في ضخ الزيت لأعلى عند الأجزاء المتحركة في الموتور لما حضرتك بدور وتمشي كمية الزيت الي مفروض تطلع
مبتكنش طلعت فيحصل تآكل في أجزاء المحرك وعمره بيقل وكبسه بيضعف وكمان لو زودت السرعة عن 80 كم/س والعربية
مسخنتش دا بيأذي البساتم بشكل فظيع.

نرجع لموضوعنا، الأصل في الحكاية ميين؟ حساس الأكسجين، ودا بيشتغل على نطاق معين من غازات العادم، لو العربية مواصفتها
92 وانت حطييت 95 حيحصل ايه؟

1. نسبة حرق العادم بالنسبة للحساس 100% لأن النطاق الي هو شغال عليه من صح فمبيعرفش يبعت إشارات صح لكنترول
الموتور للتحكم في الحساسات الأخرى وحركة الرشاشات (فتح وقفل = ضخ بنزين) والنتيجة الطبيعية للحكاية دي ان حضرتك
بتدفع فلوس على الفاضي وحاسس من جواك بس ان العربية سحبها احسن مع أن دا مش حقيقي لأن حضرتك مش مدي المحرك
مواصفاته، في بعض الأحيان بيكون موفر وطبعاً دا مع العربيات 8 صباب الي هيا أصلا مش محتاجة 95.

بالنسبة بقى للعربيات الآسيوي وخاصة الدايو تأثيرها بيجي على الرشاشات لأنها بتشتغل بحركة مش طبيعية فبتبدأ تسيل مع الوقت (يعني استهلاك
بنزين أعلى) فتصبح العملية فلوس وكمان استهلاك عالي.
وأهم نقطة في الموضوع هي معدل انضغاط المحرك، يعني بمنتهي البساطة أي عربية الـ Compression Ratio بتاعتها أقل من 11 يبقى بنزين 92 خير وبركة أوي عليها. لأن 95 مش حيفدها في حاجة إطلاقاً
والسلام ختام

+100000000000000000000

شرح فوق الممتاز فياريت حضرتك تكمل شرح عن المشي فترة طويله على سرعة موتور عاليه واضراره وايه السرعة اللى الموتور بيكون مرتاح فيها وممكن اطول عليها وليه لازم اغير من سرعتي كل فترة وايه اضرار اني ادوس على دواسة البنزين على الاخر؟؟؟

والف شكر لحضرتك مقدما

سلام عليكم ورحمة الله وبركاته،

أولاً نحط الأساس ونتناقش. غالبية العربيات الحديثة فيها عداد RPM وفي جزء من العداد لونه أحمر. الجزء الأحمر هو إلي عنده الموتور بيبدأ يعمل حاجة إسمها Cut Off علشان يحمي نفسه وميتكسرش ودا نتيجة تجاوز الحد المسموح به لسرعة حركة البساتم.

طيب نروح بقى لموضوعنا، كل عربية وليها قدرة قصوى بطلعها عند RPM معين، على سبيل المثال عداد الجولف 4 موديل 2001 1400 مم مكعب الجزء الأحمر فيه بيبدأ عند 60 RPM يعني 6000 لفة في الدقيقة طيب العربية بطلع أقصى قدرة ليها عند كام؟ يعني المحرك الـ 1400 ده بيطلع أقصى قدرته وهي 75 حصان عند كام RPM؟ بيطلعها عند 50 RPM يعني 5000 لفة في الدقيقة، إذا حضرتك لو زودت سرعة دوران المحرك عن 5000 لفة حيحصل التالي:

1. استهلاك أعلى للوقود دون جدوى (صوت العربية حيعلى على الفاضي)
2. حيبدأ يحصل تآكل في ترس السرعة الخامسة داخل الفيتيس لأنه متصمم على سركة RPM قصوى هو كمان.
3. من الجايز جداً في بعض الحالات النادرة سير الكاتينة يتقطع وفي الحالة دي نقول للموتور كتر خيرك لأنه طبعاً حيجيب وش سلندر طوالي وكمان ممكن البلوكة تنكسر ودا في غالبية المواتير إلى البلوكة بتاعتها ألومنيوم.

خلاصة القول في النقطة دي، لازم تعرف أقصى قدرة لمحركك عند كام RPM ومتزودتش عنها.

أفضل أداء للمحرك على السرعات الثابتة لمسافات طويلة داخل نطاق قدرة المحرك المسموح بيها.

الناس إلي بتقول إن السير على سرعات عالية لمسافات طويلة بيبوز البساتم، كلامها ملوش أي أصل من الصحة.

نقاط مهمة:

• استخدام سائل التبريد الصحيح، يحافظ على المحرك، بالنسبة لكل العربيات الفولكس، سائل التبريد الوحيد المصرح به من فولكس هو حسب مواصفات G12 لونه أحمر سابقاً أو بنفسجي حالياً ولا يتم تزويده بماء عادي لأن الماء العادي يحتوي على أملاح وده بيقصر من عمر طلمبة المياه وممكن الطلمبة لاقدر الله تقفش.
• لا يجوز في أي حالة من الأحوال استخدام ماء الحنفية كسائل تبريد.
• زيت الفتيس مفروض يتغير كل 20-25 ألأف كم حسب أسلوب القيادة، 25 ألف للقيادة الهادئة.
• زيت الفتيس المناسب هو Esso بمواصفات 80SAE 90 وإوعى حد يحط زيت فتيس أعلى من ده علشان بيعاكس حركة تروس الفتيس. ما يباع في محطات البنزين تحت اسم زيت فرفارين مناسب للعربيات القديمة إلي هيا الفتيس بتاعها أصلا حصله تآكل الزيت ده قوامه أكثر كثافة فبيكتم صوت الفيتيس.
• استخدام زيت المحرك المناسب يحافظ على المحرك، المقولة الشهيرة لكل مصنعي الزيوت إن الزيت الصح بيقلل استهلاك الوقود مقولة غير صحيحة مطلقاً لأن الجزء الموفر لا يذكر حتى لو بتستعمل زيت غلط دي مقولة مستخدمة للتسويق فقط.
• أسوء أنواع الزيوت التخلقية الموجودة في السوق هو Mobil 1 لأنه بينقص معنى كده انه بيتبخر معنى كده أنه مش نقي.
• 10.000 كم على الزيت التخليقي من وجهة نظري أمر غير منطقي نظراً لظروف التشغيل السيئة في مصر، عن نفسي أنا بغير الزيت بعد 6000 أو 7000.
• Shell أفضل الزيوت التخليقية لحد كتابتي دلوقتي، أنا لسه مجرب إمارات مصر باور سنث من 3 أيام، نقاؤه أعلى من موبيل وشل وأظن أن أداء المحرك معاه أفضل بس حتظهر الحقيقة بعد 3000 كم.
• فلتر البنزين من الضروريات ويجب تغييره بعد 20.000 كم.
• زيت الفرامل (الباكم) بيتحلل ويجب تغيره مش تزويده بعد 20 - 25 ألف كم لاستعادة القدرة الانضغاطية العالية لفرامل العربية.
• الاستقرار على محطة بنزين واحدة وعدم خلط البنزين بكميات كبيرة من النصائح المفيدة أيضاً. حالياً أنا لا أثق غير في وطنية بتاعة الجيش وإمارات مصر.
• سائل رفع الأوكتان هجص، سائل تنظيف الرشاشات هجص، احسن حاجة تنضف الرشاشات السير على سرعة معتدلة لمسافة طويلة ودا بينضف دورة الحقن كلها وكمان بيقلل وبيزيل أي رواسب ملتصقة بجسم المحرك من الداخل. يعني مثلاً سفرية لطيفة للإسكندرية على سرعة 100 توصل هناك المحرك بقى زي الفل.
• فلتر الهواء يتغير كل 15-20 الف نفخه بالهواء غير مجدي لأن المسام بتكون مشبعهة بالتراب وبخرة زيت المحرك بالإضافة إلى عادم الجاز الموجود في الشوارع نتيجة الاتوبيسات المتهالكة.
• البوجيهات الغلط من عوامل تلف البساتم وتقطيع العربية واستهلاك الوقود العالي وانخفاض الأداء وكبس المحرك. أفضل أنواع البوجيهات هي NGK اليابانية. وبمناسبة البوجيهات لو محرك عربيتك محتاج بوجيه شمعة واحدة وجه حد قالك لو ركبت بوجيه 3 شمعة حتفرق معاك، كلامه مش صح خالص ولن تشعر بأي فرق إلا فرق نفسي إنك سمعت كلامه، العكس بقى لو العربية عايزة 3 وركبت 1 حرق البنزين حيبقى ني وكبس المحرك حيضيع.
• بالنسبة للعربيات الجديدة، إوعى أي حد يجيب زيت باور من محطة البنزين (إلي لونه أحمر) ويحطه في العربية كدا حضرتك بتقول لعلبة الدركسيون مع السلامة أنا مش عيزك، لو مش عايز الزيت الأصلي، البديل الوحيد لكل العربيات الجديدة هو زيت أمريكي في علبة لونها أصفر بحوالي 70 جنيه اللتر والزيت لونه أبيض.
• للصحة، مفروض تغيير فلتر التكييف مع دخول الصيف ومع دخول الشتاء دا علشان الصحة. في ناس بتنفخه بالهواء أو بتنفضه بس دا مش صحي وكمان بيعمل ريحة وحشة داخل العربية.
• السوق مليان قطع غيار صيني بشكل غير طبيعي ولازم اختيار محل موثوق وتاجر موثوق للحصول على قطعة الغيار الأصلية، بالنسبة لأي حد معاه عربية فولكس، سكودا، سيات، أودي الوحيد المضمون وإلي فعلا بيجيب شغله من ألمانيا هو أشرف الشهابي في شارع دمشق في مصر الجديدة والمحل اسمه الشهابي. توكيل فولكس فيه قطع غيار صيني مضروبة ودا كلام أكيد لأن أحد أصدقائي هو مستورد هذه القطع وبيورد للتوكيل.

بما إني طولت عليكم، خلاصة القول:
سائل تبريد صح، زيت مناسب، زيت فتيس في حالة جيدة، بنزين حسب مواصفات العربية، بوجيهات حسب المواصفات فلتر هواء نوعه نضيف كل العوامل دي = أفضل أداء انت حتحس بيه وسلاسة غير طبيعية في القيادة

السلام عليكم ورحمة الله،

باشمهندس إيهاب، سؤال سريع العربية دي انت اول رجل عليها ولا مشتريها مستعملة؟

شوف حضرتك، أولاً باب تانك البنزين متغير إلي حصل ان صاحب العربية باب تانك البنزين اتكسر اللسان بتاعه فنزل اشترى واحد استيراد بتاع عربية محركها أعلى ورش الباب لون العربية أو كان حظه حلو وطلع الباب إلي جابه لون العربية.

على حسب كلامك لو العربية دي مفيهاش لعب يبقى المواصفات بتاعتها كالتالي:

حروف المحرك: Aer
سعة المحرك 1000 مم مكعب
قدرة المحرك 37 كيلووات = 50 حصان
عداد الصبابات 8
محرك عربية ساعتك 8 صباب وهو نفس المحرك الموجود في البولو 98.

بنزين 92 طبعاً كويس جداً بالنسبة للمحرك ده، على الرغم من إن فولكس بتقول انه محتاج 95 بس دا مش حيفرق مع المحرك في أي حاجة وخصوصاً إنك حتلاقي صاحبها الأول كان بيحط فيها بنزين 90. أنا حاطط في المرفقات البيانات الفنية للمحرك Aer حسب فولكس في البولو 98

حتلاقي المعلومات المفيدة وحتلاحظ إن معدل الانضغاط منخفض وعلشان كده أنا بقولك بنزين 92 كويس جداً عليها.

شوف كدا ولو فيه حاجة عايزة توضيح قولي.

للمهندس إيهاب