الموضوع: أى سؤال أو استشارة فى طب العيون

المشاركة الأصلية كتبت بواسطة abodi55

السلام عليكم ورحمة الله وبركاتة
اولا ربنا يسترها معاك ويبراكللك يا دكتور شريف ويجعلة فى ميزان حسناتك

ثانيا حكايتى اربع سنين بلف على دكاترة العيون
انا عمرى دلوقتى 19 سنة ولابس النظارة بنت ايالسة دية من حوالى 7 او 8 سنين

الشكوى :
1 - عينىبقى لونها محمر على طول و مش ابيض زى الطبيعى
2 افرازات لونها سمنى وساعات ابيض على عنيا الاتنين من ناحية النف والناحية التانية الخارجية
3 - دايما بحس زى ميكون فى طبقة زيت قدام عينى وبتخللى الرؤية مزغلله
4- ساعات كتير وان لم يكن دائما وانا شايف عادى تعمل زى ميكون فى ضباب قدام عينى فاقعد احرك عينى يمين وشمال وانا مثبت راسى لحد متروح
5 - ساعات كتير احس زى ميكون فى حاجة غريبة فى عينى وتقعد تشكنى واقعد بقى ادعك عينى واقفلها فترة واقوم اغسلها
6 وانا لابس النظارة بعد فترة الاقى حرف الجفن اللى بين الرموش وجسم العين نفسة ومن خارج الجفن اللى هو تحت الحواجب على طول يعملة زى مكون عايصهم زيت واضطر اغسل عينى فى الحالة دية بالماء والصاااااابون
7- ساعات اقل شوية حرقان جامد فى العين ممع احساس بجفاف جامد ولما احط اى قطرة ايا كان نوعها لاقى حرقان ولسعان فظيع وبعد شوية يروح
8 - النظارة مش مريحانى غيرتها كتييييييييييييييييير (1.5 و1.5 ) وواحدة تانية (2 و2 ) والخيرة اللى لسة ماشى عليها (1.75 و 1.75 ) وبقالى عليها بتاع تسع شهور
9- هزة فى الجفن كدة لوحدها معرفش من اية يعد كانة عاوز يقفل ويفتح تانى بسرعة بتوترنى
10 - وجع فى جسم العين نفسة وشوية ويرح الجفن ملتهب وورمان واقعد بالمراهم والقطرة وراة لحد ميخف

كلام الاطباء :

جفاف فى العين ولازم تستخدم قطرة مرطبة (( محستش باى تغيير ولا اى حاجة من ليكوا فيلم و لدموع فى علبة غريبة كدة كل مرة ببلاستيكة صغيرة لواحديها تكسرها وتنقط اللى فيها وترميها ) ( الحق يقال حسيت براحة شوية مع تيرز جارد بس مستمرتش عليها كتير نظرا لسعرها 10 جنية مبتكفيش معايا خمس ايام او اسبوع بالكتير قوى وانا لسة طالب وثانيا خوفت لعينى تتعود على الدموع دية وتتعبنى بعد كدة )


رمد ربيعى وحساسية وخدت ( توبراديكس مرهم مع قطرة اوركازيد ) ومرة تانية ( ماكسيترول مرهم مع قطرة اوركازيد ) ومرة تانية ( قطرة زاديتين ) ودلوقتى زهقت ومستحمل الوجع بس مش شايف كويس واللى قالى حساسية قاللى ان مينفعش اعمل مقاس نظارة وعينى فيها حساسية اتعالج اسبوع واتنين واروحلة نلاقى المقاس هو هو ومش شايف بية كويس وقالى دة حاجة مزمنة ومش هتروح ولازم امشى عل القطرة على طول

هل فيها حل وللا خلاص بقى ؟؟

أنا موافق على حاجة واحدة فى الكلام ده كله ، و هى ان ماينفعش ناخد مقاس نظارة و العين ملتهبة كده بالوصف بتاع حضرتك.

باقى الكلام ماقدرش احكم على صحته من عدمه الا بعد الفحص.

كلام حضرتك دقيق و وصفك ممتاز و بالتالى الأحتمالات بقت شبه محصورة فى عدة تشخيصات و لكن الفروق بينهم دقيقة و هامة جدا لأن علاج أحد التشخيصات ممكن يزود مشاكل التشخيص التانى ، و بالتالى فلا مجال للتجربة و الخطأ ، و بخاصة أن التاريخ المرضى طويل نسبيا (4 سنوات).

الفحص هو الطريق السليم للتشخيص و العلاج السليم بأذن الله.

أخيرا ، قطرة Tears guard مافيش منها قلق ، و لكن الغريب انها بتقعد معاك اسبوع بالكتير ، المفروض لو بتحط نقطة فى كل عين 4 - 6 مرات يوميا تقعد معاك من 2 - 3 اسابيع ... هل بتحط اكتر من نقطة فى المرة الواحدة ؟؟ .. عموما العين بتاخد نقطة واحدة و الباقى بينزل على الخد ، فبكده يبقى مهدر و مافيش منه فايدة و القطرة تخلص بسرعة.

اهلا بحضرتك ضيف كريم و عزيز فى اى وقت و هابعت لحضرتك على الخاص العناوين و التليفونات.

و تحياتى.