الموضوع: أى سؤال أو استشارة فى طب العيون

المشاركة الأصلية كتبت بواسطة mostafabakry

اولا شكرا جزيلا علي المبادرة الجميلة دي و ربنا يجعل ثواب هذا العمل في ميزان حسناتك

بالنسبة لي انا باستخدم النظارة من و انا في اولي كليه و كان نظري مش ضعيف بدرجة كبيرة يعني كنت ممكن اتحرك بدونها عادي واذاكر كمان من غيرها بس كنت احتاجها في اثناء المحاضرات عشان اشوف الكتابة علي السبورة

المهم في خلال ال 3 سنوات الأخيرة النظر بدا يتدهور بطريقة كبيرة و ظهر عندي ما يسمي بالإستيجماتيزم وحاليا انا لا استطيع ان استغني عن النظارة و كنت كشفت في الدولي للعيون و طلبوا مني طبوغرافية قرنية عشان فيه شك في القرنية المخروطية و للأسف ما عملتوش و ما رحتش تاني عندهم

المهم انا دلوقتي مستوي الرؤية مع النظارة مش كويس خصوصا بالليل و فيه زغلله و ازدواج في رؤية الأشياء بالليل و خصوصا لما تكون حاجات فيها ضوء يعني مثلا اللافتات الضوئية زي بتاعت الأطباء و المحامين بالليل بتبقي الكتابة داخلة في بعضها و بكون شايفها مرتين تحت بعض و لازم ادقق بعيني عشن اعرف اقراها

و المشكلة اني حاسس ان النظارة اخرها كدا بالنسبة للرؤية و بصراحة مش عارف اعمل ايه
هل ممكن استخدام العدسات يكون مفيد لحالتي و لا بلاش و هل هناك اي طرق اخري لعلاج الإستيجماتيزم ولا مافيش
درجات الإستيجماتيزم عندي 4.5 للعين الشمال و 5 للعين اليمين طبعا مع قصر نظر تقريبا بنفس الدرجات

علي فكرة انا كنت بعاني من رمد ربيعي في فترة طفولتي حتي سن 16 سنة و عمري حاليا 27 سنه يعني بالشكل دا علي ما وصلت ل 40 سنه هكون في الباي باي

اسف علي الإطاله و شكرا مرة تاني لحضرتك

المشاركة الأصلية كتبت بواسطة lancer92

بداية الشكوى واضح انها استجماتيزم بدرجة صغيرة علشان كده كنت بتلبس النظارة عند اللزوم
و بعدين الأمر تطور و زاد و بصراحة مع درجات زى 4.5 و 5.00 و الرؤية مش واضحة بالنظارة يبقى لازم اشك فى قرنية مخروطية "Keratoconus" و اللى يخلينى اشك اكتر فيها انك ذكرت انك كان عندك رمد ربيعى كتير و انت صغير و معروف ان فيه نظرية من نظريات حدوث القرنية المخروطية بتربطها بالرمد الربيعى العنيف لأنهم بيقولوا فى النظرية انه بيضعف النسيج الداخلى للقرنية فتتمدد تحت تأثير ضغط العين و تعمل القرنية المخروطية.
عموما ، لازم تعمل طبوغرافية القرنية علشان نحدد مجرد استجماتيزم و لا قرنية مخروطية
انسى العدسات اللاصقة ، مقاسك كبير فى الأستجماتيزم ، صحيح هتلاقى قريب منه و لكن مش هاتبقى مريحة و لا واضحة فى حالتك
لو الأمر مجرد استجماتيزم عادة بيثبت بسرعة و لكن لو قرنية مخروطية فالأمر مختلف و عادة بتزيد و لها سكة تانية
مستنى ردك عن الطبوغرافية للقرنية
و تحياتى

السلام عليكم و رحمة الله و بركاته
ازي حضرتك يا دكتور

انا كنت عملت فحص طبوغرافية قرنية من حوالي شهر بعد ما حسيت ان الأمور كل ما تتدهور و النظر عمال في النازل
طبعا زي ما حضرتك توقعت بالظبط قرنية مخروطية
انا عملت الفحص في مستشفي العيون الدولي - مصر الجديدة
و للأسف النتيجة ان عندي قرنية مخروطية
و الدكتور قاللي انت م ينفعلكش الليزك نهائيا و الحل الوحيد بالنسبة لحالتك في المرحلة دي هي العدسات اللاصقة الصلبة و راح محولني علي قسم العدسات اللاصقة الصلبة في المستشفي عنده
انا هبعت لحضرتك التقرير اللي اتعمل لحالتي بعد فحص القرنية عالخاص
يا ريت حضرتك لو اي حاجة ممكن تفيدني بيها في الموضوع دا