الموضوع: فائدة علبة البيئة او محفز العادم او الكتاليزر او Catalytic converter

يا جماعة عايزين نبقي ايجابين شوية ونبدا نشتغل كلنا اننا نحسن من ردود افعالنا واتجاهاتنا لمواضيع بالنسبة لينا تافهة جدا مع انها مهمة جدا جدا جدا

اللي خلاني اكتب الموضوع ده اللي قريته في موضوع الاخ Ahmed20_08nubira ده :http://www.nilemotors.net/Nile/showthread.php?t=55288
ولاقيت ان كل ردود الاخوة الاعضاء ان البيئة دي مالهاش اي لازمة زي ما يكون مش احنا اللي عايشين فيها

انا دورت شوية عن موضوع علبة البيئة و لاقيت ما يلي:
اولا: ده موضوع عن شخص سعودي اعتقد بيحكي عن سرقات علبة البيئة في الجراجات
ادخلوا وانتوا تعرفوا بتتسرق ليه
http://www.mekshat.com/vb/showthread.php?t=158333

ودي مقالة من جريدة الشرق الاوسط بتحكي عن تاثير البنزين علي الانسان ودي انا حاططها طبعا عشان لو علبة البيئة مش وجودة وطلع بنزين غير كامل الاحتراق مع العادم:
http://www.asharqalawsat.com/details...3&issueno=9914

وده شرح ازاي محفز العادم بيشتغل وازاي الخواجة زي ما بنقول بيحط جواه مواد غالية جدا عشان يحافظ علي البيئة وعشان صحة انسان(خواجة زيه طبعا)
http://en.wikipedia.org/wiki/Catalytic_converter

وده لينك تقريري تاني عبارة عن صفحات متتالية شرح كامل للموضوع:
http://auto.howstuffworks.com/catalytic-converter1.htm

المشاركة الأصلية كتبت بواسطة عمرو عمارة

أستاذ Swimmer مع إحترامي الشديد جداً لحضرتك..........خلينا نتكلم بطريقة عملية شوية.....حضرتك بتكلم عن فائدة علبة البيئة وما شاء الله عربيتك لسة جديدة
طيب إن شاء الله كده كمان خمس أو ست سنين لما تحتاج تغير علبة البيئة عشان الصالحية بتاعتها هاتكون إنتهت وتروح تسأل عليها وتلاقيها بـ1000جم ساعيتها هاتفكر ألف مرة قبل ما تشتريها....خاصة إنها لا تفيد أداء العربية في شىء بل العكس....إزالتها بيفوق الموتور ويديلو عزم ملحوظ
طيب سؤال تاني......حضرتك خايف على تلوث الجو؟؟....حضرتك تعرف منين إن علبة البيئة بتاعتك عايزة تتغير؟؟.....ممكن الفحم الي فيها يكون تشبع وإنتها صالحيته.....طيب تعرف منين؟؟.....إحنا هنا في مصر بنغير العلبة لما تبتدي تشخلل وطبعاً في المرور الأجهزة الحديثة بتاعتنا إيدك والأرض

طيب تعالى نتكلم في نقطة تانية.....إنت ممكن يكون عندك علبة بيئة ومعدل العادم الملوث أعلى من الي شايلها عشان بتأخرفي مواعيد الصيانة وده كمان بيأثر سلباً على عمر علبة البيئة

على فكرة مش إحنا بس الي بنعمل كده.....في أوربا والدول المتقدمة بيعملوا Decat عشان الأداء والتكلفة.....وساعة الترخيص بيركبوا علب البيئة تاني عشان يعدي الفحص وساعت برضه بتكون علب الDecat متوافقة مع أجهزة كشف العادم في المرور

الناس دي يا باشا بيتكلموا على التقليل من نسبة ثاني أكسيد الكربون في الجو وإنت هنا في مصر عندك سحابة سوداء من المواتير المفوتة.....
الكلام ده يظبط الأول وهاتلاقي سماء القاهرة فيها هوا نظيف.....وبعد كده نفكر في أهمية علب البيئة والتقليل من نسبة غاز CO2

بالنسبة لتعليق حضرتك باني هشتريها او لا ربنا يقدرني واشتريها لان بعد الكلام اللي قريته في الموضوع بتاعي وخاصة تاثير العوادم دي علي صحة الانسان (الانسان ده اب وام واخ واخت وزوجة واولاد واخ مسلم مش انسان يهودي مثلا) اكيد لو مشتريتهاش يبقي مش بحب اي حد من الناس دي والرسول عليه الصلاة والسلام قال (لا ضرر ولا ضرار)

بالنسبة لتعليق حضرتك التاني اننا هل هنقدر نقيس ازاي صلاحيتها انا فكرت فعلا فيه ولو فيه حد من الاعضاء فعلا يعرف ازاي بتتقاس او ليها صلاحية محددة او لا ياريت يقولنا
اللي اعرفه في النقطة دي ان المادة اللي في علبة البيئة دي برا بتبقي بلاتينيوم وده اغلي من الدهب تخيل
وكمان في بعض منها بدلوا البلاتينيوم بالدهب عشان ارخص وبيعمل نفس التاثير
وبعدين كل انسان لازم يبدا بنفسه زي ما قلت مش نقول المواتير المفوتة والسحابة السودا واحنا بنحرق البيئة زيهم بالظبط
وبعدين حضرتك العبرة انه اولا يحول ال CO الي CO2 يعني كده كده فيه CO2 وال CO2 بيعمل ظاهرة Greenhouse Effect او الاحتباس الحراري بس غير سام لكن ال CO سام وقاتل للانسان
ثانيا يحول NO الي N2 , O2 ودي غازات بلا اضرار ولكن ال NO بيسبب ظاهرة Acid Rain او المطر الحمضي اللي بيسمم الارض وبالتالي المزروعات
ثالثاالعادم الغير مكتمل الاحتراق وده بيبقي HYDROCARBONS بيسبب الدخنة في العوادم وانت وعلي قد ما صدرك يستحمل و بيبقي فيه حساس اكسجين عشان يحس بالعادم الغير مكتمل الاحتراق ويدي امر للكنترول يعدل كمية الاكسجين عشان يبقي مكتمل الاحتراق ولو فيه عادم غير مكتمل الاحتراق بيحولو ل CO2 , مياه
يا استاذ عمرو العبرة مش بالكمية مش اروح اسرق جنيه واقول هوا انا زي اللي بيسرقوا مليارات . هي في الاخر سرقة
ودي بيئتنا احنا مش بيئة الجيران وادعي ربنا يهدي الموظفين المرتشين اللي بيعدوا السيارات اللي مواتيرها مفوتة بالرشوة
واعتقد كفاية انك تبقي بعيد عن دعوة الشخص اللي ماشي في الشارع او ساكن في بيته ويشم ريحة الدخان القاتل ده ويدعي علي كل اللي بيعملوه
ودعوة المظلوم مستجابة ليس بينها وبين الله حجاب
وربنا يوفقنا ويوفقكم لصالح الاعمال