الموضوع: تجارب "ملاك" الدايهاتسو مع مراكز الخدمة

صيـــانة الـ 20 الف

السلام عليكم ورحمة الله وبركاته

قمت يوم السبت 28/2/2009 بعمل صيانة العشرين ألف كم بمركز خدمة دايهاتسو بمدينة العبور وكانت لي الملاحظات الآتية:

- قمت بحجز الموعد قبلها بأكثر من شهر ونصف

- كان في نيتي شراء الفرش الجلد من المركز وتأكدت من وجوده عن طريق مركز خدمة العملاء ومرة ثانية عندما وصلت من الاستقبال ومرة ثالثة من مركز بيع قطع الغيار والاكسسوارات قبل الشراء مباشرة وفي كل مرة كان يتم التأكيد أنه متوفر ولكن عندما طالبت بخصم الـ 10% المقرر للأعضاء قيل أن الفرش غير متواجد (باحاول أغلب حسن الظن)

- تم الاستفاد من الخصم على الصيانة وقطع الغيار بمجرد الإبلاغ بأنني من الذين قاموا بحضور مقابلة نايل موتورز الثانية

- قيل لي من مهندس الاستقبال إن العمل في السيارة سيستغرق ساعتين تقريباً وبالفعل استلامتها بعد ساعتين ولكن لاحظت بمراقبتي للسيارة أن العمل فيها لم يتعدى الربع ساعة وباقي الوقت كله كان انتظار لحين غسيل وتنظيف السيارة هذا شئ يحسب للتوكيل في تقليل زمن العمل على السيارة بالرغم من طول الانتظار حتى الغسيل

- تنظيف السيارة من الخارج والداخل كان أسوأ ما يمكن على خلاف المعتاد من المركز لدرجة أنني لم ألاحظ فرقاً يذكر قبل وبعد الصيانة

- بعد الانتهاء من الصيانة ملحوظ طبعاً انخفاض صوت المحرك بعض الشئ بالإضافة إلى النعومة مع المطبات والنقر وقوة فرامل اليد

- أضم صوتي لملاحظة الاخوة هنا التي أشارت لسوء حالة صالة الانتظار وهذا بخلاف تعطل الريسيفر وحتى الانترنت اللاسلكي في ذلك اليوم

- المبلغ المدفوع للصيانة 458 جنيه شامل تغيير فلتر الهواء

- أخيراً وكالمعتاد لا أخبار إطلاقاً عن موعد افتتاح مركز أبو رواش


http://www.nilemotors.net/Nile/showthread.php?t=63344

صيــــانة الــ 40 الف

اشتريت قبل ما اروح الصيانه من توكيل Ngk طقم بوجيهات اريديوم Ngk وكان سعرهم 150 جنيه زي ما نصحني اخ عزيز ليا هنا في المنتدى وخدتهم معايا التوكيل علشان يركبوهملي وانا بعمل الصيانه علشان هما سعر البويجهات عندهم 440 جنيه
بس لما جيت اعمل الصيانه قولت للمهندس عمرو انا من نايل مورتورز وعايز استفيد بالخصم اتاكد ان اسمي موجود وقالي تحت امرك يا فاندم قولتلو انا ليا طلب عندك انا جايب البوجيهات معايا وياريت لو تركبوهالي قالي طيب هسالك دخل الورشه وطلع وقالي للاسف يا فندم مش هنقدر نركبهملك لازم تبقى من عندنا قولتلو طيب خلاص متركبوش بوجيهات وانا هركبهم بره قالي ماشي رحت متصل بالمهندس احمد عبد الوهاب وقلتلو انا عايز اركب البوجيهات الي انا جايبها معايا قالي لا احنا مبنركبش Ngk واحنا بنركب دينسو وال Ngk بتعمل مشاكل في العربيه وتخليها تاكل بنزين ولو عايز انا ممكن اركبهملك بس هتمضيلي على ورقه ان احنا مش مساولين عن اي عطل يحصل بسبب البوجيهات
قولتلو لا خلاص مش مهم
وبعد ما خلصت الصيانه رحت ركبت البوجيهات في مركز صيانه في المعادي والمفجاه كانت ان البوجيهات الي طالعه من العربيه القديمه يعني الي جيه من اليابان ماركتها Ngk زي الي كنت جايبها ومرضوش يركبوها في التوكيل وعرفت كمان ان في التوكيل بيركبو Ngkاريدوم زي الي انا جايبها بالزبط ومبيركبوش دينسو ولا حاجه
بجد اضايقت جدا من الحركه دي مكنتش متوقع طيب لو كان فرق السعر بين بره وعندهم معقول كنت هقول ماشي بس الفرق تقريبا ضعفين تمنها من 150 الى 450 فرق كبير جدا
مطولش عليكو المهم انا دفعت في التوكيل النهارده بعد الخصم 1392 وتفصيلهم كالتالي
300 جنيه مصنعيات( ومخصموش مصنعية تركيب البوجيهات الي انا مركبتهاش )
52 جنيه مصنعية تركيب تيل فرامل
48 جنيه فلتر زيت
402 جنيه تيل الفرامل
176 جنيه فلتر الهواء
120 جنيه سير الاداره
8 جنيه الحزام الي بيمسك الطاسه في الجنط
10 جنيه متنوعات (الي مش عارف هيا ايه بالزبط)
9 جنيه زيت فرامل
120 جنيه زيت Xhp
60 جنيه تمن جالون مياه تبريد موبيل (ومرجعوليش الي فاضل معنو كان كتير )
35 جنيه زيت فتيس
والخصم كان 54 جنيه على كلو
والضريبه 106 جنيه على كلو
والراجل بتاع الخزنه مكانش معاه فكه وليه عندي 2 جنيه لو رحت التوكيل ده تاني هبقى ادهملو فكروني :)

نصيحه اخويه محدش يعمل الصيانه في التوكيل تاني انتو كده عرفتو الحجات الي بتتعمل اعملوها بره اوفر كتيييييير


http://www.nilemotors.net/Nile/showthread.php?t=64280

السلام عليكم و رحمة الله و بركاته

ده موضوع معمول لسرد التجارب المختلفة لملاك الدايهاتسو مع مراكز الخدمة سواء الخاصة بالوكيل او المعتمدة.

يا ريت كلنا نشرك بتجاربنا, سواء كانت التجربة دى جيدة او سيئة, لأن ده هيقدر يخلينا نتابع التطورات المختلفى فى الخدمة و الاسعار و توافر قطع الغيار

الموضوع هنا, نذكر فيه التفاصيل, على أن يتم فتح موضوع منفصل, لو حد عنده استفسار بخصوص التجربة المذكورة, مع وضع لينك الموضوع الاصلى هنا طبعا.

الموضوع ده مخصص "لملاك" الدايهاتسو فقط.

أى حد عنده استفسار, او يود مناقشة العضو صاحب التجربة فى اى شىء, فرجاء يكون فى الموضوع الاصلى.

شكرا



______________________________

تم غلق الموضوع و تثبيته بناءا على الإتفاق مع العضو معاذ

و سيتم تحديثه بالتجارب الجديدة

مشــرف القسـم

دى تجميعة للمواضيع السابقة الخاصة بصيانة السريون

صيانة الألف


صيانة ال5 الاف


صيانة ال 10 الف


صيانة ال 20 الف

---------------------------------------

صيانة ال 25 الف

السلام عليكم و رحمة الله و بركاته

أمس الثلاثاء 17 مارس, عملت صيانة ال 25 الف

دى تفاصيل الفاتورة

عمالة 75 جنيه
فلتر زيت 48.4 جنيه
موبيل 1 (4 لتر) 260 جنيه
شحومات 10 جنيه

الاجمالى 393.49 جنيه

بعد خصم 3% (لأنى دفعت بالفيزا)

الاجمالى بالضريبة: 403 جنيه

بالنسبة للتفاصيل:

وصلت على الساعة 10 تقريبا, كان فى زحام فى المركز .... استلم منى المهندس عمرو العربية على الساعة 10 و نص, و قلت له على ملاحظاتى و كانت كألاتى:

1- تزييق بالابواب الخلفية
2- نفس صوت الزنة بتاع السماعة اليمين (بتختفى لما تروح مركز الصيانة )
3- صوت كأن مياه ماشية تحت الدركسيون كده

قالى العربية هتخلص على الساعة 2 ظهرا

العربية خلصت تقريبا فى الميعاد, التزييق فى الابواب اختفى, صوت المسعاة مش موجود, لأنه اختفى قبل اما اوصل مركز الصيانة, فمش هقدر احكم (هما قالوا عملوه).

أما بخصوص صوت المياه, لما قلته لمهندس احمد عبدالوهاب فى الأول, قالى نكشف على سربنتينة السخن, و دى اعراضها ان يبقى في مياه بتنزل فى الدواسة, او خارج العربية حسب مكان السربنتينة, و العرضين دول مش عندى... مهندس احمد طلب منه يعمل لها اختبار ضغط, و لو فى حاجة غلط هتبان لأن لو محتاجة تغيير لابد من فك التابلوه بالكامل. هو المهندس فى الورشة الصراحة كان مصمم انه صوت عادى, و متواجد فى موديلات الدايهاتسو من سنة 99, وهو تشبيهه له كأنه "خرير ماء" و بيظهر لما العربية تبقى واقفة فترة مركونة, و كل اما تزيد الفترة دى, الوصت يبقى اوضح. الاأعراض دى فعلا عندى, لكن الصوت جديد, يعنى بقاله معايا بس 3 الاف كم, مكنش بيظهر قبل كده خالص!!

العربية اتغسلت كويس و كل تمام

بعض الاخبار الجديدة:

1- كنت ناوى اركب الانذار المرة دى, لكن القديم خلاص بطلوا يركبوه و حاليا الاصلى فقط, و ده تمنه 890 جنيه بالضريبة و التركيب, و الخواص بتاعته اقل من الحالى (مبيعملش lock لما تدوس فرامل اول اما تتحرك, و مبيشغلش السرينة الا لو حد حاول يدور العربية, مش يفتح بابها) يعنى خواصه اقل من القديم

دى صوره التقطتها له:






2- ابو رواش الميعاد اللى اتقالى 15 يونيو 2009 .... اتمنى طبعا

3- قلت لمهندس احمد على حكاية الزيت الباقى, و قالى حقك طبعا تاخده, و اطلبه عادى, بس انا قلت له الافضل انك تحط لكل واحد باقى الزيت بتاعه فى العربية, هيبقى افضل ان المبادرة تبقى من جانب التوكيل

4- فى تجديدات هتحصل فى مركز العبور مع بداية العمل فى ابو رواش, استراحة العملاء فوق هيكبروها, و تدخل على مكان السكرتارية, علشان تستوعب عدد عملاء اكبر, و فى تجديدات تانية كمان. و قلت له على حالة الحمامات كمان. ده بالاضافة ان النت كان شغال و اتحلت المشكلة بتاعته.

5- بخصوص صندوق الاقتراحات و الشكاوى, و قالى انه وقع على الارض و اتكسر, و اتعمل واحد جديد, و هيتم وضعه قريبا جدا, و ان الورق الخاص بالاقتراحات و الشكاوى موجود بالاسفل.

6- قطع الغيار اللى مكنتش موجودة فى الفترة الاخيرة فى منها موجود حاليا, خصوصا المرايات اليمين للتريوس و السريون. أنا سألت على كذا حاجة و انا هناك و كانوا موجودين.

7- قابلت ا/ايهاب ثابت مدير قطع الغيار, و قالى انه حاليا فى دراسة بتتم فى السوق لأسعار قطع الغيار, و وعد ان هيبقى فى تغيير فى الفترة القادمة بخصوص الاسعار و توافر قطع الغيار.

8- كان فى خبر صاعق عرفته و انا هناك:
سعر فلتر البنزبن : 1300 جنيه (الف و ثلاثمائة جنيه!!!)
الفلتر موصى انه يتغير عند ال 60 الف كم.تفسيرهم للسعر المرتفع ده, انه بيبقى معاه العوامة كمان!


خليت مهندس احمد يشوف موضوع هيثم الخاص بصيانة ال 40 الف, و هكتب التفاصيل الخاصة بها هناك.

م/احمد له رجاء منكم: إن اى حد واجه مشكلة و هو هناك فى مركز الصيانة يطلب يقابله على طول, و هو بيؤكد ان مش هيخلى حد يمشى الا و مشكلته محلولة و ميمشيش و هو زعلان او متضايق


http://www.nilemotors.net/Nile/showthread.php?t=65360

سعــر الإنذار الإيطالى

انا عني تجربتي السيئة الوحيده في التوكيل
هيا جهاز الأنذار الأيطالي اللي ركبته اول ما جبت العربيه
سعره كان حوال 800 جنيه وشويه كمان
ومميزاته مش اد كده غير انه ماركة patrolline ايطالي
يعني انا شايف المشكلة دلوقتي هيا تسعير الأكسسوارات مش كويس
وبعض قطع الغيار سعرها عالي مقارنة بالخارج زي البوجيهات اكيد

اما بصراحه غير ذلك مفيش ولما بيحصل حاجه وطلبت منهم حلها بلاقي استجابة بصراحه

تجربة مع السمكرة و الدهان

السلام عليكم و رحمة الله و بركاته

زى ما حضراتكم عارفين, انى كنت خبطت كلب بعربيتى, و يوم المقابلة 19 ديسمبر و انا رايح العربية لقيتها بتطلع دخنة بيضاء من الخلف (شفتها من المراية) و ركنت على جنب طبعا, و الكلام ده كان قبل بوابات بتاعة مصر اسكندرية الصحراوى.

لما نزلت ابص على العربية, لقيت ان فى مياه بتتسرب من الرادياتير, و فى زى زيت كده (بس طبعا ساعتها كنت بكدب نفسى)و سبب الدخنة البيضاء دى ان المياه بالزيت دى بتمشى على ماسورة الشكمان للأخر و بعد كده بتتبخر.

ساعتها كلمت مهندس محمد عبدالصمد, اللى كان متواجد فى المقابلة وقالى لو بتمشى العربية تعالى علينا, حاولت امشيها, لكن مكنتش بتمشى تقريبا, ده غير انى فى نتشة جامدة جدا فى الفتيس. المهم دورنا على ونش, و خدناها على مركز صيانة العبور, و مهندس محمد عبدالصمد مشكورا جدا جدا خلاهم يدخلوا العربية جوه الجراج بتاع المركز, و يستلموها منى بالرغم ان ده كان يوم اجازة, و الطبيعى ان العربية تتساب بره المركز.

رحت سلمت كل حاجة يوم السبت 20 ديسمبر, و انتظرنا التقييم النهائى للخسائر, و أنا اكتر حاجة كانت عاملة رعب عندى النتشة بتاعة الفتيس.

بعد تقييم الوضع بالكامل, اتضح ان العربية محتاجة طقم تبريد بالكامل (مروحة + سربنتينة تكييف + رادياتير) ده بالاضافة الى خراطيم تبريد زيت الفتيس, و الاكصدام الامامى.

المشكلة الرئيسية كانت فى عدم توافر خراطيم التبريد فى الوقت ده, و بعتوا طلبوها من اليابان. مهندس محمد عبدالصمد قال لى ان الخراطيم دى ضغط عالى, و هو مش حابب اننا ناخد مجازفة و نجيب حاجات من هنا محلية, لأن جربوا قبل كده و لم تكن بالجودة المناسبة.

الخراطيم مهندس ماجد كلمنى و قالى انهم بلغوه انها المفروض توصل يوم 20 يناير, و ساعتها هيبدأ شغل فى العربية, و أكد لى ان الشغل مش هياخد اكتر من يومين بالكتير.

اللى حصل انها اتأخرت زيادة شوية عن الميعاد ده لأن كان فى مشاكل مع الجمارك, و مهندس احمد عبدالوهاب مشكورا تدخل, و الحاجة خرجت على طول.

نيجى للأستلام, انا استلمت يوم 26 يناير. التصور المحتمل للسبب فى اللى حصل كله: لما خبطت الكلب و نزل تحت العربية, فأتعوج الرادياتير و مداخل خراطم تبريد الفتيس فيه كمان. المروحة القميص بتاعها اتفك, فغالبا مع الضغط على الخراطيم, و خروج المروجة من مسارها بعد تحطم القميص, ففكت الخراطيم من مكانها, و ده كان سبب وجود زيت مع المياه.

خرجنا جربنا العربية, و الفتيس كويس علشان ده كان اهم حاجة ليا, و الحمد لله مكنش فى اى حاجة غلط. كتكييف كان كله تمام و شغال و كذلك التبريد.

الملاحظات اللى كانت عندى كانت فى تقفيل الاكصدام. مكنش معمول له finish كويس كدهان, ده غير ان بعض الكليبسات مكنتش راكبة كويس فى مكانها, العربية دخلت و خرجت كذا مرة لحد اما الحاجة اتعملت كويس بنسبة 90%, لأن فى حاجات مهندس مصطفى على قالى مش هنقدر نظبطها اكتر من كده (كانت شوية نتوئات على اطراف الاكصدام من الدهان).

بخصوص التكاليف فكانت كالأتى:

العمالة:
دهان: 210 جنيه
سمكرة: 120 جنيه
ميكانيكا: 255 جنيه
اجمالى العمالة: 585 جنيه

القطع المستبدلة:
مروحة بالقميص و الموتور: 2535.35 جنيه
رادياتير: 3002.20 جنيه
حامل اكصدام امامى: 96.96 جنيه
اكصدام امامى بدون الهواية: 950.56 جنيه
سربنتينة: 2212.15 جنيه
مثبت للرادياتير: 20.76 جنيه
خرطوم تبريد: 129.28 جنيه
خرطوم تبريد: 50.99 جنيه

اجمالى القطع المستبدلة: 8817.98 جنيه

Materials:
عدد 10 كليبسات: 20 جنيه
فريون (340 بس مش عارف الوحدة بتاعتها) : 200 جنيه
الدهان: 90 جنيه
شحومات: 30 جنيه

الاجمالى: 340.60

اجمالى الفاتورة: 9923.85

و بعد الضريبة 10%: 10916.23

دى كانت التفاصيل كلها, أى استفسار بخصوص الموضوع انا تحت امركم. http://www.nilemotors.net/Nile/showthread.php?t=65615

صيانة الألف كم

السلام عليكم ازيك يا احبائى يا رب تكونوا بخير
معلش اخرت عليكم بأخبارى
اولا حجزت يوم السبت واخدت معاد الصيانه يوم الاتنين
قالت لى تعالى قبل الميعاد بربع ساعه كان معادى 10.45 روحت فعلا 10.30 انتظرت حوالى 20 ساعه لغاية ما جه دورى استلم منى المهندس العربية وقالى على تفاصيل الصيانه وقالى انها مجانية طبعا سالته على الانذار طلع فعلا غاااااااااااااااااااالى قوى 890 وقالى انه جاى من اليابان والحاجات ديه قولتله لا شكرا و مركبتش طبعا
واضايقت طبعا السعر عالى قوى حتى لو يابانى وكمان اللى عرفته منكم هنا انه كمان امكانياته اقل من القديم
المهم قالى ان شاء الله هتستلم على الساعه 12.30 طلعت قعدت في الاستراحه شكلها شيك وحلو بس برضه كان الانترنت مش شغال وديه حاجه زعلتنى لانى شغلى معتمد على النت وكنت رايح في يوم شغل فكنت محتاج النت المهم قضيت شغلى بالتليفون وطبعا من وقت للتانى كنت بابص على العربية من فوق ولما جات الساعه 12.30 فعلا قالوا اسمى فرحت قوى من دقه المواعيد
بس ده كل اللى عايز اقوله
معلش طولت عليكم
السلام عليكم
وربنا يوفقنا ويحفظنا جميعا




http://www.nilemotors.net/Nile/showthread.php?t=65880

صيانة الـ 15 الف كم

السلام عليكم

الحمد لله بالأمس تم عمل صيانة الـ15ألف.....إليكم التفاصيل :

- زي ما انتم عارفين أنا معملتش صيانة الـ10ألف عشان كانت تكلفتها مبالغ فيها....المهم المهندس قالي إهنا كده هانعملك صيانة الـ10ألف مع تغير الزيت (Mobil 1 ) عشان صيانة العشرة أهم....قولتله يعيني إنتوا في الـ15 بتغيروا زيت بس.....قالي أيوة مع تربيط عفشة وتنظيف فلتر الهوا

- كنت مراقب العربية من لحظة دخولها الساعة 10:30 حتى الإنتهاء منها الساعة 12:00.....الشغل الي تم في العربية ما خدش نصف ساعة بضبط ....تم عمل:
1-فك فلتر الهواء والتنظيف بالهواء
2-عمل Rotation للعجل
3-رجلاش للفرامل الخلفية
4-تغير زيت وفلتر
5-تزويد مياه الردياتير بمية حنفية بدون أي داعي...وده أكتر شىء دايقني أولاً عشان منسوب المياه كل فترة باكشف عليه وهو مضبوط....ثانياً ليه يحط مية من الحنفية؟؟!! ده أكتر شىء بيضر الردياتير ووش السيلندر وبيعمل فيها بلاوي.....إزازة مية مقطرة بـ1.5جم مش هاتخسرهُ حاجة
6-الكشف على جميع الأنوار

العربية وقفت حوالى نصف ساعة مستنية دورها في الغسيل ونصف ساعة عشان المهندس يعملي الفاتورة النهائية ( واحدة واقفة معاه حوالي نصف ساعة بتستلم عربيتها )

الـHand Brake أصبحت أقوى وإستجابة الفرامل أحسن كتير

الفاتورة :

- 186 جم صيانة 10,000
- 260 جم زيت Mobil 1
- 48 جم فلتر زيت
- 10 جم ( مش عارف إيه الي مكتوب )

المجموع 539 جم بالضريبة

لا حول ولا قوة إلا بالله....200جم عشان rotation ورجلاش وتزويد مية من الحنفية ولو كنت عملت صيانة الـ10ألف من قبل كان هايحاسب على صيانة الـ15 بـ420جم...يعني 120جم زيادة عشان تغير زيت وشوية كلام فارغ كله

لو شوفته العربية وهي بتتعمل هاتعرفوا أد إيه أنا محروق على الـ200جم من بساطة العمل الشديد

حسبنا الله ونعم الوكيل


http://www.nilemotors.net/Nile/showthread.php?t=66070