تجارب "ملاك" الدايهاتسو مع مراكز الخدمة

**معاذ الشرباصى** · 13-03-2010 12:25 PM

السلام عليكم و رحمة الله و بركاته

بعتذر بشدة عن عدم الكتابة فى الفترات الاخيرة لأنشغالى الشديد فى الامتحانات

فى الاسبوع التانى من اجازة نصف العام, الاربعاء الموافق 17 فبراير ذهبت لمركز صيانة العبور لأستكمال الشغل اللى فى الضمان اللى كنت بدأته فى شهر يوليو 2009

انا احد الحاجات اللى أخرتنى فى الميعاد انى كنت بتصل اكتر من مرة (اجمالى 5 مرات) علشان احصل على ميعاد, مع الحصول على تأكيد منهم بحضور المهندس مصطفى شريف (الاتفاق بينا كان كده) علشان نكمل الشغل فى العربية, اكتر من مرة محدش يرد عليا فى المعلومة دى, لحد المرة الاخيرة فى انسة اهتمت و حجزت لى الميعاد.

الشغل اللى كان ناقص فى العربية كان ظبط الزوايا بعد تغيير علبة الدركسيون للمرة التانية (مكنتش عاوز اعملها بره خصوصا ان الطارة بتلف فى حتة اكتر من التانية و اكتر من المرة اللى قبلها), ده بالاضافة الى تغيير شداد ميزان يمين لأنه مكنش متوفر ساعتها.

قابلت مهندس مصطفى شريف, و طلع جرب العربية و كشف عليها و اتفقنا ان الزوايا هتتظبط, و الشداد هيتغير.

بعد ساعة او اكتر, مهندس مصطفى على نده عليا علشان اكتشفوا حاجة فى العربية: صدر العربية عندى مشروخ, و هو اللى "بيعصر" على الشداد اليمين و لازم الصدر يتغير. بسؤاله عن اسباب ان الصدر يتشرخ, قالى انى ممكن اكون خبطت فى رصيف او حاجة علشان كده اتشرخ.

الفكرة ان العربية كانت زمان, فى شهر ديسمبر 2008, كانت خبطت بيها كلب , و كاناتغير حاجات فى العربية فى التوكيل بحوالى 11 الف جنيه, و قالوا ان الصدر سليم.

الحاجة التانية ان الشرخ ده مكانه عند مكان خبطة رأس الكلب, اللى هى ورا الجزء العلوى من النمر بتاعة العربية, بالاضافة لكده, الشرخ مش مسمع من تحت اى حاجة ... بمعنى لو كنت خبطت فى رصيف او طوبة كان يبقى فى شرخ من عند العجل لحد المكان اللى هى فيه حاليا, بمعنى ادق يتكون "مسمعة: من تحت لحد المكان اللى هى فيه حاليا ... مش مجرد شرخ فى نص الصدر و بس (ده على رأى و رأى ناس كتير).

الصدر علشان يتغير فده هيتطلب ان كل الحاجات اللى فى وش العربية تتفك (الردياتير و السربنتينة) و ده هيخلى التكلفة تتراوح من 1500-2000

مهندس مصطفى على مشكورا "لحم" الشرخ مؤقتا لحد اما اروح و اغيره بدون اى مقابل ... بس قالى ان اللحام ده هيفك على طول.

انا بعت ايميل لأنسة مى, و هى خلت حد من مكتبها يتصل بيا و يسمع منى القصة كلها, و وعد انه يرد عليا بخصوص الموضوع ده

انا راى اللى مقتنع بيه: ان الشرخ ده موجود من ساعة حادثة الكلب, و مخدوش بالهم منه ساعتها ... لأن انا بشتكى من نفس الاعراض منذ ذلك الحين (العربية بتعوم خفيف , و بتدب جامد فى الفواصل بتاعت الكوبرى لأن القنطرة بتتحرك من ناحية اليمين)

فى انتظار رد الانسة مى ان شاء الله ... هوافيكم بالمستجدات

و لو حد عنده راى مختلف او وجهة نظر يا ريت يشاركنى بيها

دعواتكم بقى الموضوع ده يخلص لأنى فعلا اتخنقت من العربية

**معاذ الشرباصى** · 01-05-2010 01:29 PM

السلام عليكم و رحمة الله و بركاته

من فترة كنت كتبت عن اكتشاف عيب فى العربية عندى بيؤثر على ثباتها فى الموضوع ده:
http://www.nilemotors.net/Nile/132262-a.html

بعد مقابلة المهندس محمد عبدالصمد و الأنسة مى عبدالحميد... تم الكشف على السيارة و كانت النتيجة كالأتى:

قنطرة المحرك (او الحتة اللى بتبقى شايلة الرادياتير) دى بايظة و محتاجة تتغير, اما بالنسبة للسدر, فلا شىء يذكر يستدعى تغييره (حاجة بسيطة جدا)

القنطرة ساعة حادثة الكلب مهندس ماجد كان اكتشف انها معوجةو لكن لعدم توافر قنطرة فى ذلك الوقت و كنا هنستنى تانى بعد اما استنينا اكتر من 30 يوم علشان خراطيم تبريد الفتيس, فقالى انه هيستعدلها و هترجع كويسة و مفيش اى قلق منها.

بعد النبذة التاريخية دى ... نرجع بقى للموضوع:

أنسة مى و مهندس عبدالصمد قالوا لى انهم كدايهاتسو هيتكفلوا بالموضوع بالكامل, و انا اشوف انا عايز ايه بالظبط

يعنى عاوز اغير القنطرة بس, هيغيروها .... عاوز اغير القنطرة و السدر برضه هيغيروها, و فى الحالتين على حسابهم بدون اما انا اتحمل اى تكاليف.

هما كانوا عايزين اسيبها فى نفس اليوم و اجى استلمها تانى يوم, بس انا مكنتش عامل حسابى على كده ... فتم الاتفاق انى اجيب العربية فى اليوم اللى يناسبنى, و العربية هتاخد بالكتير يومين.

لظروف عندى اتأخرت, لكن الحمد لله ذهبت بالعربية يوم الاثنين اللى فات و استلمتها يوم الاربعاء

تم تغيير القنطرة ... لأنى بعد سؤال اكتر من شخص + رأى مهندس محمد عبدالصمد السدر مش مستاهل خالص يتغير, ده غير انه مش بيأثر على ثبات العربية عكس القنطرة.

كان فى زوايا العربية محتاجة تتظبط... الحمد لله اتعملت

و كان فى مفاجأة جميلة جدا من جانبهم ... تم تلميع العربية بالكامل من الخارج و الداخل و ازالة الخدوش اللى موجودة عليها

الحمد لله العربية كويسة و مظبوطة ... و بأذن الله بعد فترة هوافيكم برأى بعد التغيير

حاجة اخيرة:

احب اشكر جدا جدا الأنسة مى و مهندس محمد عبدالصمد على المجهود ده و على المعاملة الراقية جدا جدا من جانبهم ... ربنا يجازيهم كل خير

و طول ما فى التوكيل ناس محترمة زيهم, التوكيل اكيد هيتقدم للأحسن

http://www.nilemotors.net/Nile/145998-a.html

**hhhmmmzzzz** · 20-06-2010 02:23 AM

السلام عليكم ورحمة الله وبركاته
سلامى لكل اخوانى بالمنتدى بجد وحشتونى انا اتاخرت عليكم بس والله ظروف
فى شهر11-2009قررت مع صيانة ال15000اركب فوجات فى التوكيل هي سعرها عالي بس اعمل ايه عشان الضمان وفى نفس الوقت قولت اركب حاجة كويسة وانساها وبواسطة ناس متخصصين(فى ابو رواش)
المهم بعد 3شهور وبالتحديد فى يناير 2010لقيت لمبة مش شغالة منهم وكمان وحدة الرفع اللي ركبتها فى صيانة ال10000 (بالعبور)مش شغالة برضه فقررت وذلك لظروف وقتى ااجل الموضوع لصيانة ال20000ك
ولما روحت قابلت المهمدس ايمن وقولتلو علي اللي حصل وفكرتو انى انا المفروض فى فترة الضمان سواء بالنسبة لوحدة الرفع او الفوجات وقالى حاضر كل شيئ هيكون تمام
طبعا انا كنت واخد اخر ميعاد2.5مساءا وبعد ساعتين فى صيانة العشرين الف قالى احنا غيرنا وحدة الرفع لانها فعلا بايظة فغيرناها اما بالنسبة للفوج فمسئول قطع الغيار بيقول اللمبات بتاعة الفوج مش فى الضمان ولازم اشتريها تمن الواحدة حسب قوله130ج
هنا جن جنونى وقولتلو ازاى هى الفوج ايه غير قطعة اكسسوار وفيشة ولمبة امال الضمان بيشمل ايه غير كدة
وقولتله انا كنت مركب فوجات صينى لسيارتى القديمة ب200ج عند بلية الكهربائى معملتش كدة
المهم قولتلو اكلم حد مسئول او مدير المركز فقالى الساعة بقت5 ومافيش حد انا هكلملك المدير وارد عليك بعد3ايام وانتظرت كثيرا ولم يتصل بي احد(قمة الاستهتار منه)ولانى والله مش فاضى اكلمه قولت استنى صيانة ال25000 لانى سافرت كتير فعملت كيلو مترات كتيرة فى فترة قليلة وروحت المرة دى متوعد علي عدم الاهتمام بالعملاء بالطريقة دى تشاء الظروف قبل ميعاد الصيانة بيوم الاقى اللمبة التانية مش شغالة كمان قولت يلا كملت
وتشاء الظروف ان المهندس ايمن برضه يستلم العربية منى(الظاهر مافيش غيره)وقولتله فاكرنى انا الي حصل معايا كدة المرة اللي فاتت وكانت نبرتى المرة دى حادة شوية وقولتله اللمبتين مش شغالين فقالى علي تكاليف الصيانة واللى هيتعمل فى العربية قولتله انا عارفه انا عايز اخلص من موضوع الفوجات ده لانه مش هيحصل
كويس لو ماتغيرتش ومش هدفع قرش ابيض والا سوف الجا لحماية المستهلك لان كدة سرقة علنى
فرد علية وقالى حاضر هشوفلك الموضوع وبعد ماخلص صيانة العربية طلع لي وقالى نفس الكلام المفروض حضرتك تدفع تمن اللمبات(شخصية مهزوزة جدا لا بيحل ولا بيربط يريحك بس لحد ما ينتهى معاد الصيانة)
قولتله الكلام خلص كدة معاك قابلنى بالمهندس محمد عبد الصمد يشوفلى حل وقابلته فعلا وكانت اول مرة بجد شخصية محترمة وفوق الوصف قمة فى الذوق والاخلاق بالاضافة للعملية فى الاداء استمع منى لكل التفاصيل واتصل بقطع الغيار فقالى ان اللمبات مش بالضمان قولتلو انا لو شاكك للحظة ان ماعنديش حق مش هتكلم ومش هتفرق معايا الفلوس بس لو انت مقتنع باللي بيحصل قولى لكن مش هدفع جنيه واحد مش مقتنع بيه
اتاريه كان فاكر ان المشكلة ظهرت فى صيانة ال25000يعنى بعد 6شهور من تركيب الفوج
ومايعرفش الفلم اللي حصل فى صيانىة العشرين وان اللمبة اتحرقت بعد شهرين او تلاتة بس
نسيت اقولكم انى عرفتوا انى عضو فى نايل موتورز فبصراحة اثنى علي الناس اللي موجودة بالمنتدى كثيرا
فوعدنى باتصال منه واعطانى الكارت بتاعه وفعلا بعد 3ايام اتصلت بية الانسة ولاء علي ما اذكر وحددت معايا معاد يوم الاحد20-6 لتغيير الفوجات(هو ده الشخص المناسب فى المكان المناسب)بالرغم من صغر سنه او شكله يبان انه صغير بالسن لكن الشخص بافعاله ومش عشان انصفنى انا بقول كدة ولكنه عشان انصف الحق لا علي حساب الشركة لان الشركة بكدة زادت احترامها لنفسها ولعملائها
وهروح بكرة ان شاء الله وسوف اوافيكم بالتفاصيل
معلش طولت عليكم بس دى تجربة عايشتها حاولت اسرد اهم تفاصيلها عسي تنفع احد بالمستقبل
واخيرا وليس اخر لكم منى اطيب تحياتى

http://www.nilemotors.net/Nile/158633-a.html

**م. حاتم السباعي** · 20-09-2010 12:09 AM

اسمحوا لي ان اقص لحضراتكم ماذا فعلت اليوم في التوكيل
القصة بدأت في يوم الخميس صباحا طلبت الخط الساخن لدايهاتسو لتحديد موعد لصيانة ال 5000 كم وبعد الرد من الاخت الفاضلة بأحترام حددت لي اختيارين (( اما الاحد الساعه 11,15 او الاحد الساعه 1,30 فأنا بدون تردد اخترت الاول وسألتني هل توجد شكوي من السيارة بحسها من اي نوع حتي تكتبها في الاوردر فأخبرتها بأن الفرامل بتصدر صوت خفيف في اثناء النزول من طريق منحدر وان هناك صوت تكتكة تحدث في الكبوت بعد الركن يسمع في الجراج لما بييكون مفيش صوت حولي وان التكييف عاوز اشيك علي الفلتر بتاعه
السبت الساعة 12 ظ طلبوني يأكدوا علي الميعاد
اليوم الاحد ذهبت ابو رواش الساعة 11 بالضبت استقبلوني احس استقبال و طلبوا مني انتظار الربع ساعة حتي يستلم مني مهندس الصيانة العربية و بالفعل الساعة 11,22 بدء الاستلام اخبرني بأننا في صيانة ال5000 بنعمل ك1ا وكذا وخيرني بين زيت 5 او 10 وانا قلتله بما اني هاجي لصيانة ال10 يبقي نحط 5 و اخبرني بأن كده التكاليف هتبقي حوالي 270 جنية قلت توكل علي الله سألني بعد الاستلام عن المشاكل اخبرته بها كلها بدء يستفهم اكثر وحسيت انه هيبرر كل شئ فأنا اخبرته بأن التكتكة اللي بسمعها دي سمعت عنها قبل كده من عميل هنا كان بيسألني هل بحسها ولا لاء وانا ايامها كنت بعمل صيانة الالف واخبرته بأنه اكيد سمع من العملاء الحكاية دي فهل عنده تبرير لها فأخبرني انهم هيشيكوا عليها مع اعمال الصيانة فأخبرته بأن الصوت اكيد مش هيتسمع لان العربية ركنت خلاص وده بيصدر لما اكون جاي من مشوار بعيد فأحسست اني لن افهم شئ فانتقلت للنقطة اللي بعدها موضوع الفرامل وبرده قالي هنشيك
الساعة بقت 11,35 قالي ان هناك بريك هيبداء الساعة 12 حتي 1,30 و عليه يبقي هستلم علي الساعة 2,30 لان احتمال لا يستطيع البدء فيها قبل البريك سلمت بالامر طبعا وهما يشكرو لانهم خيروني قبلها بميعادين وانا مكنتش اعرف حكاية الاستراحة دي مع ان ده طبيعي
الساعة 1ظ بالضبط نادو عليا كنا بنصلي الظهر فوق في الاستراحة الجميلة جدا ولما نزلت اخبرني بأن كل شئ تمام ولكني اخبرته بأني قلق من موضوع الفرامل فنادي علي مهندس زميل له وطلع معي للتجربة اول ما خرجنا علي الرئيسي سألني هل الصوت تصفير قلت لاء قال هل (هوب عمل الحركة اللي بسمعها برجله ) قلت ايوه هو ده راح لافف تاني وقالي ان ده طبيعي لان السيارات الاوتوماتك بتكون وخده غيار يعني في حالة حركة والصوت ده بيصدر لما بنيجي نشيل رجلنا من علي الفرامل والعربية في منزل فبيكون في ضغط علي الفرامل وان كل الاوتوماتك كده فأنا بصراحة اعترضت علي كلمة كله لاني ركبت قبل كده في انواع اخري ومحستش فأراد ان اختار اي سيارة من اللي داخل التوكيل ويسمعني نفس الصوت فشكرته واخبرته ان طلما انه شايف ان ده طبيعي وامان خلاص
خلصت الموضوع ده علي 1,15 حاسبت ومشيت وحاسس طبعا ان السيارة ناعمة جدا بعد الصيانة
متشكر جدا لحضراتكم انكم استحملتوني كل ده بس حبيت اكون امين في نقل اللي حصل بالضبط
في بقه موضوع غريب حصل اني من ساعة موصلت التوكيل حتي خروجي وكل واحد انظر له احس انه معنا في المنتدي ولولا الاحراج لسألت كل اللي قاعدين مين يا جماعة من نايل موتورز فأتمني ان كلنا من هنا ورايح لما يجي ميعاد صيانة نكتب احنا هنتواجد الساعة كام قبل ما نروح بيوم بحيث نلتقي هناك بدل ما الواحد فضل قاعد علي الاب توب زي الحزين لوحده وهي فرصة الاصدقاء للتعارف
وشكرا للجميع

م.حاتم السباعي

http://www.nilemotors.net/Nile/18220...post3873055516