الحلقه الثانيه - يا صباح الدبرياج

**abdallh_magdy** · 21-03-2009 06:44 PM

http://www.nilemotors.net/Nile/showthread.php?t=65700
رابط الحلقه الاولى

انا رحت النهارده على طول على العملى ( عندى 6 ساعات منهم النهارده 2)
كنت فى ميعادى لقيت العربيه المحدده ليه موجوده والمدرب موجود .
طلعنا عند قصر عابدين وابتدى يشرح شويه نظرى وورانى (الدينامو - البطاريه - ..... الخ ) وباقى الاجزاء الاساسيه اللى كل الاعضاء هنا عارفينها ثم ابتدت المعركه .
10 دقايق تدريب على كيفية الضغط على الدبرياج ورفع الرجل عنه بشويش وزيهم مع التدريب على (الاول - الثانى - الموور) المرحله ديه كانت اول مره استلم دريكسيون فى حياتى ثم انطلقنا قالى دور وابتدى .
بجد عرفت ليه اصحابى بيقولوا السواقه دى متعه انا قعدت سايق حوالى 45 دقيقه ما بطلتش منى الا مرتين (لخطأ فى تتابع الدوس على الدوسات) ولف وهدى وخد المطب واقف فى الاشاره حس ما لقيت نفسى ثانى عند المدرسه فى باب اللوق وبجد انا مستنى الحصه اللى جايه على فارغ الصبر (مع العلم انى لم اتخطى العشرين طول مدة التدريب الا انها متعه حقيقيه لأنى فعلا اول مره اسوق عربيه)
وحبقى انقلكو الحلقه الثالثه بعد ما اخلصها .
ســــــــــــــــــــــــ ـــــــــــــــــلام مــــــــــــــــــــــــ ـؤقت .

**تامر.محمد** · 21-03-2009 06:53 PM

السواقة و انت بتتعلمها بتبقى متعة فعلا
:)

و لو حصل و قعدت فترة ما تسوقش , بتبقى هاتتجنن عشان تسوق تاني
:)

**abdallh_magdy** · 21-03-2009 09:54 PM

ياااااااااااااااه فكرتني باحلي ايام
انا لما كنت بتعلم السواقة كنت زيك كده بفرح جدا اني رايح اتعلم
بس انا بقي يامعلم كنت بدرب علي 128 وعربيتي فيرنا (ربنا يحفظه) يعني اخلص الدرس علي ال128 واروح لواحد صاحبي ماشاء الله محترف سواقة وناخد العربية بتاعتي وادرب عليها زيادة ودي فرقت معايا جدا واتعلمت اسرع

بس نصيحة ياريت تظبط الي بيدربك يعني مرة تديلو فلوس سكة10جنيه او تجيبله سجاير لو بيشرب يعني بحيث يعلمك كل حاجة ومتسبش حاجة متسالش عنها وتتعلم الركنات والرجوع لورا لمسافات طويلة وتقولو عاوز اسوق في زحمة عشان تمشي خطوة وتقف وتتعود علي المواقف دي
وربنا معاك

لحسن الحظ الراجل محترم وانا فى اول يوم سوقت فى الروقان والزحمه .

**A.Saad** · 21-03-2009 10:18 PM

عادى جدا
بكرة تسوق وتزهق
انا بردة كنت باخد حصة زيادة علشان اعود نفسى اكتر
بصراحة فى ناس تنحة اوى فى مصر
بس
جمد قلبك

**mohamed_mohsen** · 23-03-2009 12:27 AM

جمد قلبك و نفض للكلاكسات و عقبال الرخصه يا باشا

**roky** · 23-03-2009 09:50 AM

المشاركة الأصلية كتبت بواسطة abdallh_magdy

وبجد انا مستنى الحصه اللى جايه على فارغ الصبر

لا فعلا ... هي السواقة إدمان ... أنا قبل العربية كنت بمشي حوالي 4 كيلو لحد الشغل كل يوم . و أول ما جبتها كنت بقول أني هاركنها و أتمشي للشغل مرتين علي الأقل في الأسبوع ...
وفي واحد جاري كنت بتريق عليه عشان لو نازل يشتري كيس مكرونة من البقال اللي علي أول الشارع ياخد العربية ...

بجد بدون مبالغة !!

لكن هيهات يا معلم ... لما تتعود ... تحس أن في مغناطيس في الدركسيون ... و لما العربية تعطل تحس انك مش علي بعضك لحد ما تتصلح ... كأن عيل من عيالك هو اللي عيان مش العربية

بالمناسبة هي المدرسة دي في شارع التحرير ؟ اللي فيه محلات قطع غيار الكومبوتر و الكلام ده ؟!

بالمناسبة بقي أنا شايف أنك تمتحن و تطلع الرخصة ، و ماتعملش زي بعضهم و تدفع رشوة وكلام من ده.

سلام