الموضوع: تعالى ادخل جوه غرفة الاحتراق

تسلم ايدك يأستاذ فارس
انا اول مره اشوفها وعجبتني جدا

بس الكاميرا احتملت الحراره الرهيبه دي ازاي
بس تسلم ايدك

برااااااااااااااااااااااا افو عليك وعلى فكره مبطئنها اوووووووى

حلو اووووى
كان نفسى من زمان أشوف المنظر ده
الف شكر

طيب عشان نفهم كلنا
ممكن حد يشرحلنا العملية الى بتحصل باظبط عبارة عن اية؟؟؟
مع الشكر

المشاركة الأصلية كتبت بواسطة ehab4367

طيب عشان نفهم كلنا
ممكن حد يشرحلنا العملية الى بتحصل باظبط عبارة عن اية؟؟؟
مع الشكر

بص ياباشا...
بدايه كده غرفه الاحتراق دى اللى بيحصل جواها الانفجار بتاع الشحنه (بنزين+هواء)
فى محركات البنزين بيكون فى 3 حاجات اساسيه موجوده فى وش السلندر
1- الصمامات:
-صمام سحب:
وده بيكون متحكم فى فتح وغلق الخط اللى جاى من الكاربراتير
يعنى بيتحكم فى الشحنه اللى داخله غرفه الاحتراق.
لاحظ انه موجود على اليمين فى الفيديو

-صمام العادم :
وده اللى بيصرف الغازات اللى ناتجه عن الانفجار او الاحتراق
وبيكون متوصل بغرف تنقيه غازات العادم ومجموعه العادم لغايه الشكمان
وده اللى موجود على الشمال فى الفيديو.

2- شمعه الاشعال ( البوجيه):

البوجيهات دى اكيد كله عارفها وهى اللى بتدى شراره كهربيه كل فتره زمنيه محدده عشان تحرق الشحنه (بنزين + هواء)
ملحوظه:
عند تأخر او تقدم الشراره الكهربيه عن الوقت المحدد لها يسمع صوت فرقعه شديده وشرر خارج من الشكمان لانه بذللك التأخير لم تشتعل الشحنه(بنزين+هواء)كامله فيخرج جزء منها عن طريق العادم ومع حراره الغازات ينفجر الجز الهارب من الشحنه
شفتوا صوت الفرقعه اللى بيخرج من الشكمان ده جزء من الشحنه لما انفجر
تخيلوا الانفجار اللى بيحصل بقى جوه الغرفه عامل ازاى..
وكمان الضغط جوه الاسطوانه بيحسب بالبار ودى وحده ضغوط زى الكيلو والمتر وكده
لو سلطت هواء مضغوط بقوه 10 بار على حيطه ممكن يخرمهالك
طبعا الضغط جوه الاسطوانه بيكون اعلى

ده اللى بيكون موجود فى وش السلندر

تحت شويه جوه البلوك او جسم الموتور مجود جسم الاسطوانه وجواه المكبس اللى موجود فى الوسط فى الفيديو
وده بيكون جسم اسطوانى موجود منه فى كل اسطوانه واحد

اللى بيحصل كالأتى:
صمام السحب بيتفتح بفعل عامود الكامات او التاكيهات وفى نفس الوقت اللى بيتفتح فيه بيكون المكبس نازل لتحت
تخيل هنا ان المكبس عامل زى السرنجه
بيتحرك من ن.م.ع النقطه الميته العليا
وهى النقطه اللى المكبس بيكون فيها عند اقصى ارتفاع ليه فى الاسطوانه
بيقوم ساحب الشحنه (بنزين + هواء) جوه الاسطوانه لغايه ما يملا بيها غرفه الاحتراق ويوصل ل ن.م.س النقطه الميته السفلى
واللى هى ادنى نقطه فى الاسطوانه بيوصلها المكبس
وبعد كده المكبس بيقوم طالع تانى من ن.م.س الى ن.م.ع
وهو طالع بيفضل يضغط على الشحنه يضغط يضغط
قبل مايوصل لل ن.م.ع بمسافه بسيطه بيقوم البوجيه بتوليد الشراره الكهربيه ويتم الانفجار
خد بالك الصمامين مقفولين تماما عشان مايحصلش تسريب او هروب للشحنه
بعد كده قوه الانفجار بتجبر المكبس انه ينزل من ن.م.ع الى ن.م.س
وهو نازل بيعمل نفس نظام السرنجه بس هنا الصمامين مقفولين فبيقوم فاتح صمام العادم نتيجه الخلخله او فرق الضغط اللى حصل فى غرفه الاحتراق
.الصمام بيتفتح تدريجى مع نزول المكبس واول ما المكبس يوصل لل ن.م.س
ادنى مكان فى الاسطوانه بيكون الصمام اتفتح بالكامل وخرج كل الغازات العادمه
بيروح المكبس طالع تانى فوق اثناء طلوعه بيقفل صمام العادم تدريجيا لغايه مايوصل لل ن.م.ع وهنا بقى يبتدى من الول وجديد
ينزل تانى . صمام السحب يتفتح . ويعمل زى السرنجه ويسحب شحنه وهكذا.......
ودى شويه صور على الكلام ده

دى اجزاء المحرك




الشكل ده بيوضح الصمامات والبوجيه والمكبس



دول الاربع اشواط اللى بيعملهم الموتور







ده البلوك بتاع الموتور العادى المستقيم ذو اربع اسطوانات

وده شكل متحرك لطريقه عمله



وده المحرك على حرف v




وده شكل متحرك لطريقه عمله

المشاركة الأصلية كتبت بواسطة farahat

شرح رائع و مفيد جداً ، نشكرك عليه بشدة

عندي توضيح صغير لو تأذن لي ؟
في شوط العادم بيفتح صمام العادم مش بفعل الخلخلة أو فرق الضغط ، و لكن إلي بيفتح الصمام دة هو الكامة برضه يعني زي ما فيه كامة لفتح صمام السحب فيه كامة لفتح صمام العادم ، و الاتنين ليهم توقيت بيفتحوا فيه ، محسوب و ثابت لكل موتور حسب شكل عامود الكامات

تاني حاجة .. إلي بيحصل داخل الإسطوانة هو حريق الشحنة و ليس إنفجار الشحنة ، لأن لو حصل إنفجار داخل الاسطوانة بيحصل ما يسمى knocking و هو دة إلي احنا بنقول عليه تصفيق (العربية بتسقف يعني بالبلدي )

اعتذر عن تدخلي في الموضوع بس والله الهدف هو التوضيح و المنفعة مش أكتر، و اكرر شكري للعضو evoo90 (خيركم من تعلم العلم و علمه )

ياباشا ولا يهمك انت فعلا وضحت نقطه غلطت فيها
انا كان قصدى ان الغازات بتنطلق للخارج تحت تأثيرين
اول تأثير المكبس اللى بيكون قادم من الاسفل وبيكسح الغازات امامه
وتانى تأثير الفرق فى الضغط مابين الضغط الجوى الخارجى والضغط داخل الغرفه زى كره القدم او البالونه الهواء جواهم مضغوط واول ما ينفك على الهواء الجوى بينطلق بسرعه

شكرا على التوضيح