جين 2 و لا نيسان صنى ؟؟؟

**osama9** · 16-05-2009 07:57 PM

هاللو
دى أول مشاركة ليا فى المنتدى ده، و قبل ما أكتب مشاركتى قرأت كل المواضيع لحد صفحة 23

أنا طول عمرى هونداوى و الهوندا بالنسبة لى مزاج قبل ما تكون وسيلة مواصلات، و لولا ضيق اليد كنت اشتريت هوندا الجديدة.

دلوقتى أنا قدامى اختيارين حسب قدرتى فى الشراء:
1- بروتون جين 2 أتوماتيك
2- نيسان صنى أتوماتيك

طبعًا معروف ان النيسان مصرى و مصرى صميم كمان ، فصعب شوية انى أعتبرها يابانى، و بصراحة من مجمل مشاركاتكم خدت انطباع كويس قوى عن العربية البروتون و كمان لما دورت فى المواقع الأوروبية لاقيت ان البروتون سمعتها كويسة بالنسبة لعمرها فى السوق.

أنا محتار جدًا أختار الجين 2 و لا النيسان صنى؟ عمومًا أنا شاب عمرى 23 يعنى مش متجوز و لا عايز أتجوز كمان

و لو حد نصحنى بالبروتون من فضلك قولى أحسن مكان أشتريها منها بالقسط فين، على اعتبار انى ممكن أدفع 20% من ثمنها كمقدم.

شكرًا ليكم !

**Ayman_52** · 16-05-2009 08:30 PM

اولا ... اهلا بحضرتك فى اكبر تجمع -بروتونى- فى الشرق الاوسط

________________________
النيسان معلوماتى عنها مش كافيه .... اسيبها لملاكها افضل (د/امير ... هيفيدك فيها)
________________________

الجين2 بقــى....:k49:

عربيه جميله جدا جدا .... لما تركبها مش هتقول ان دى بــ90,000

-موتور تصميم -بروتون- باشراف -لوتس- الانجليزيه .... لوتس يعنى -سيارات سباق- ...يعنى -قوة تحمل- ... يعنى -مواتير معمره بإذن الله-

-صاج ماشاء الله عليه ... يعنى قوة تحمل ... يعنى لو حد ريح عليك ماتخافش على عربيتك خاف عليه هو

-كماليات ... (سنتر , 4ازاز كهربا , سبويلر , مالتى فنكشن , ABS , EBD , انذار وريموت , فتح الشنطه من المفتاح بلاضاقه لفتحها من الداخل , كراسى شبه -الريكارو- ,4فوج لايت , كاسيت Blaupunkt MP3 , سخان ازاز , .....كفايه كده)

-عوامل امان .... ( 2 اير باج , ABS , ebd)

-ثبات .... يعنى تجيب لحد 180 وانت مش واخد بالك

-قطع غيارها فى انتشار .... بقيت منتشره خارج التوكيل وارخص من التوكيل ... واحيانا بخامات افضل من التوكيل

-وبقى ليها ناس بيفهموا ليها برا التوكيل ... بقى ليها ميكانيكيه برا

كنت عاوز اقول ايه تانى

--------------------
دلوقتى كمان فى تخفيض ... يعنى

الجين الاوتو بــ 90,900 وكمان فى خصم اكبر من 3000

___________________________

بخصوص افضل مكان ...اكيد التوكيل ....

بخصوص بقى افضل مكان للتقسيط ... انا سمعت من اكتر من عضو ...على بنك -فيصل الاسلامى- انا الصراحه ماعرفش عنو حاجه ...واكيد الاخوه اللى اتعاملو معاه هيفيدوك اكتر منى..

انا طولت ... ويارب اكون قدرت افيــدك

واى استفسار انا تحت امرك

تحيــــــــــاتــى لحضـــــــرتــك

**osama9** · 16-05-2009 08:36 PM

متشكر قوى قوى لتعقيبك و شكرًا على مجهودك
بس معلش سؤال صغير كده، هو مش الـ ebd اللى هو بيوزع قوة الفرامل على الأربعة عجلات حسب حالة الطريق ، ملغية فى موديلات 2009 و لا لا؟!
أصل الحاجات الصغيرة دى بتفرق معايا قوى، على أساس ان هوندا أكورد موديل 1989 كان فيها الـ abs بس تحت مسمى alb ، فاتعودت على السواقة بمساعدة الحاجات الصغيرة دى!

شكرًا على تعقبيك.

**Ayman_52** · 16-05-2009 08:48 PM

ياباشا انا تحت امرك

بخصوص الــ ebd اللى هى Electronic Brake-force Distribution

وفعلا وظيفته -توزيع قوة الفرامل على العجل حسب الاوزان المحمله فى العربيه- (لو فى حاجه غلط فى كلامى حد يعدلى )

وبخصوص بقى هى موجوده ولا لا ؟؟؟

حسب كلام البروشور ... ومدير مبيعات -عز العرب- موجوده ...

بس مافيش حاجه ملموسه اقدر اقولك عليها تدل على وجوده...يعنى الـ ِABS مثلا ليه لمبته ولما تفتح الكابوت هتلاقيه مع الفرامل ...

ممكن لو حد عارف شكله او مكانه فى العربيه يقولنا عشان نتاكد ....

بس فى بروشور العربيه موجود.

تحيــــــاتــى

**ahmedsiyam** · 16-05-2009 10:13 PM

مادام طول عمرك بتركب هوندا على كلامك صعب جدا انك تركب عربية تانية غيرها

عموما ربنا يوفقك لما فيها الخير و الجين 2 اختيار مناسب لشاب فى سنك برضه هاتنبسط بيها اذا عرفت تتأقلم معاها

**osama9** · 16-05-2009 10:22 PM

المشاركة الأصلية كتبت بواسطة ahmedsiyam

مادام طول عمرك بتركب هوندا على كلامك صعب جدا انك تركب عربية تانية غيرها

عندك حق! بس أعمل ايه بقى! العين بصيرة و الايد قصيرة، و الحمد لله فى ناس بتركب الميكروباص بالعافية!

شكرًا على ردك.

**kloda** · 17-05-2009 04:51 AM

بص حضرتك ما فيش كلام بعد كلام ايمن و الاستاذ احمد صيام
بالنسبة للقسط قسط مع كونتكت محترمين جدا عن تجربة
و اقل مقدم في اي حتة 25%
20 % دة جر رجل
و بلاش تأمن مع التوكيل لانة مش بيعمل حاجة و دة عن تجربة ايمن
امن مع كونتاكت و لو انت اصلا قسطت معاهم حيبقي التامين اجباري معاهم و دة احسن
و ربنا يوفقك للي فية الخير