كويلات ميجان ٢ .. غيرها بنفسك

**Amr_Moh** · 09-06-2009 02:10 AM

كويلات ميجان ٢ .. غيرها بنفسك

أعزائي وحوش رينو ميجان الموضوع دة عشان الكل يطمن أد اه قصة الكويل أو الببينة بتاعت الميجان بسيطة و مفيهاش أي حوارات

معلومات فنية

تعتمد الميجان على عدد ٤ ببينة (كويل) لإمداد البوجهات بالشحنة الكهربائية المطلوبة للإشعال

أولاً مميزات هذا النظام

عند حدوث عطل أو خلل بأحد البباين يمكنك ألإستمرار فالقيادة دون توقف حتى يتم الاصلاح

ثانياً عيوب هذا النظام

إحتماليت حدوث عطل في هذا النظام ٤ أضعاف إحتمالية حدوثه للموديلات التي تعمل على
ببينة مفردة ،، لكن مع ذكر الميزة السابقة أصبح هذا العيب بلا قيمة
بالعكس فالموديلات التي تعتمد على ببينة مفردة ستتوقف تماماً عن العمل في حالة حدوث عطل لتلك الببينة

أعراض عطل الكويل

خضة للسايق، وعلطول حيفتكر الناس الألت له بلاش ميجان

إنهيار لقدرة السيارة للتسرع بالشكل الطبيعي المعتاد

رجرجة فالحركة من الثبات حتى ٢٥٠٠ ر ب م تتلاش بالوصول ل ٣٠٠٠ ر ب م

لو أبلتك المشكلة ده متقلقش و كمل سواءة على مهلك حتى مركز الصيانة
أو إنزل اشتري كويل و غيرو بنفسك

ثالثاً أسعار الكويل
أبل الفصال

توكيل ٥٥٠
أصلي من برة التوكيل ٤٠٠
فاليو فرنساوي ٣٠٠
ألماني ٢٠٠
صيني ١٥٠

رابعاً غيرو بنفسك بصور

فك الوش البلاستك المغطي الموتور. مش موجود في بعض الموديلات

حتلاقي ال٤ كويل زي الفالصورة كل واحد راكب على سلندر و تحتيه البوجيه

اختبر الكويلات عن طريق فك الفيشه الموصلة له مع ملاحظة أي تغير في صوت المكنة

بعد تحديد الكويل العطلاً اطفي العربية وسبها تبرد خمسة عشان متتلسعش ونت بتفك

كل كويل مربوط فالموتور عن طريق مسمار ١٠ كما فالصورة

نضف حولين الكويل المقصود و فك المسمار . أوعى المسمار يقع منك جوة. شد الكويل حيطلع معاك

هات الكويل الجديد وحطو مكان الأديم وعكس تسلسل الخطوات السابقة للتركيب

رجع وش الموتور مكانه تاني

خامساً و أخيراً أرجو إن الموضوع دة يكون فيه فائدة لأعزائي الوحوش

تحياتي للجميع

**HassanEissa** · 09-06-2009 03:33 AM

تسلم ايداك يا بشمهندس عمرو علي الموضوع الهايل ده و اتمني التثبيت لافاده الجميع
بس سؤال هو بره التوكيل ممكن القيه في شارع دمشق مثلا ؟
و سؤال تاني هو الكويلات في الضمان ولا لاء ؟

**akmal_hamdi** · 09-06-2009 03:44 AM

حمد الله على السلامه الف سلامه

**Amr_Moh** · 09-06-2009 04:05 AM

المشاركة الأصلية كتبت بواسطة HassanEissa

تسلم ايداك يا بشمهندس عمرو علي الموضوع الهايل ده و اتمني التثبيت لافاده الجميع
بس سؤال هو بره التوكيل ممكن القيه في شارع دمشق مثلا ؟
و سؤال تاني هو الكويلات في الضمان ولا لاء ؟

شاكر لذوقك .. واتمنى يكون الموضوع بالمستوى المتوقع

بالنسبة لأماكن قطع الغيار في كذا واحد في شارع دمشق ،، في محل كبير اسمو الإسكندراني و في ادامة واحد تاني الرحتلو مع رامي و خالد بك جبت منو تيل كليو و فلتر تكييف و في واحد تالت بيتعامل معه الكوتش و عمر عمارة

أما بنسبة لضمان فالكويلات ضمنها من ضمان العربية فتوكيل .. متئلأش

**Amr_Moh** · 09-06-2009 04:10 AM

المشاركة الأصلية كتبت بواسطة akmal_hamdi

حمد الله على السلامه الف سلامه

اه رأيك فالمفاجأة ده ياكوتش .. عشان محدش يؤلك اني بعدت عن مستواية

**Cell_k** · 09-06-2009 04:50 AM

السلام عليكم

الف شكر على الموضوع الرائع و جهد مميز

أسف بس سؤال عن الكليو و اللى اعرفة انها برضو فيها كويلات
لما انقل للتانى بدرى شوية العربية بتترج منى و بتجمع ببطئ ناس قالولى ممكن كويلات روحت فرنش قالولى كلها تمام و انت بتنقل بدرى النقلة فطبيعى العربية تترج منك بس كلام مش مقنع فهل ممكن اعمل نفس الكلام ده من فك و تركيب الكويلات و اشوف التغير ؟؟ خصوصا ان اللى قالى كان واحد فنى مش مهندس لان مكنش فى غير 2 فنين بس

معلش مرة تانية لو كنت خرجتكم عن الموضوع .

**Mohd_Adel_Amin** · 09-06-2009 09:12 AM

شكرا ليك يا عمرو باشا بس عندي سؤال (عبيط) شوية !!! ازاي افك الوش البلاستيك ؟؟؟انا جيت افكه لقيته متثبت وخفت اشد عليه يكون ليه مسمار او كلبس وانا اكسره ...

**Amr_Moh** · 09-06-2009 09:16 AM

المشاركة الأصلية كتبت بواسطة cell_k

السلام عليكم

الف شكر على الموضوع الرائع و جهد مميز

أسف بس سؤال عن الكليو و اللى اعرفة انها برضو فيها كويلات
لما انقل للتانى بدرى شوية العربية بتترج منى و بتجمع ببطئ ناس قالولى ممكن كويلات روحت فرنش قالولى كلها تمام و انت بتنقل بدرى النقلة فطبيعى العربية تترج منك بس كلام مش مقنع فهل ممكن اعمل نفس الكلام ده من فك و تركيب الكويلات و اشوف التغير ؟؟ خصوصا ان اللى قالى كان واحد فنى مش مهندس لان مكنش فى غير 2 فنين بس

معلش مرة تانية لو كنت خرجتكم عن الموضوع .

عليكم السلام.. أشكرك يافندم
أعتقد كلامهم صح لئن لو كويل,, حيبان في كل النألات مش عالتاني فقط
والموتور حيبقى متلت حتى ونت ممور أبل متتحرك