الجزء العاشر : أنا والسفنتينا وضبط الزوايا

**نور العمر** · 13-06-2009 10:58 PM

شيء إلهي خلاني أفكر أروح أشيك على الزوايا للعجل
كنت حسة العربية بتحدف شمال شوية
كان فيه صوت تصفير كدة ... المهم قولت يمكن العجل الجديد
بيريح .. لسة ما أخدش على الحركة ...
أي كلام اصبر نفسيتي
روحت اشيك على الزوايا وقلت للراجل ليك في الدركسيون
قاللي طبعا .. قولتله شيكلي عليه .. أصلي حسيته نعم شوية
قاللي العربية بتعوم معاك .. قلتله لا
قاللي طب يبقا إن شاء الله مفيش حاجة
الحقيقة ملحقش يعمل أي حاجة
هو يا دوب نزل الحفرة
وكانت المفجأة
قاللي إنتي شكلك أخدتي مطب جامد شويتين
قلتله خير ...ليه
قاللي الركبة مشروخة ولازم تتلحم
وخطر تمشي كدة
والمقصات عاوزة تتغير
قلتله .. طب وضبط الزوايا
قاللي لا الشغل ده لازم يتعمل الأول عشان اضبط على سليم
كان جمبه الراجل إللي غيرللي الشكمان ... لحملي الركبة وأخد 10 ج
ولحد دلوقتي مش فاهمة يعني إيه ركبة
ويكفي اللحام واللا لازم تتغير
وطبعا المنطقة من ساعة ما كسرو للغاز الطبيعي وهي زفت في الطرق ... والمطبات حجرية واقفة .. مش منحنية حتى عشان العربيات تكون مرتاحة وهي بتاخدها
المهم المقصات قالولي تدخل في 120 ج
قلتله نووو دلوقتي خالص
قاللي يبقا نحلهم ونظبطهم ونرجعهم تاني يقعدوا معاك فترة مؤقتا .... الحقيقة زميلتي إللي باعتلي العربية
كان حظها من السما ... إني مكنتش افهم حاجة نهائي ولا عندي ميكانيكي أمين يقوللي رأيه بصدق
مش عاوزة تبطل طلباااات
ده أنا لسة غسلاها ومنظفاها وجايبلها معطر وقولت اظبطلها الكاسيت والسماعات ... وشهر كدة أركبلها سنتر بريموت
وركبتلها اكسسورات في الفرش
بس نقول إيه
مفيش فايدة
فيكي
يا
سفنتينا

:K_crying[1]:

**نور القمر** · 13-06-2009 11:09 PM

نور شوقتيني اشوف اللي متتسماش
متصوريها مرة كدة من برة وجوة نتفرج عليها وندعي لها ربنا يهديها
والله يا بنتي كل ما اقرالك مشاركة اقول ياريتك سجلتي في المنتدى بدري شوية واشتريتي المرحومة بتاعتي

**نور العمر** · 13-06-2009 11:20 PM

يا ريت يا نووووور
بس نعمل إيه
كله نصيب

**hamedo0** · 13-06-2009 11:26 PM

الله يكون في عونيك
بصراحه انا اسمع عن لحام الركبه ولاكن لااعلم شئ عن تغيرها بنسبه للمقصات هو ممكن يظبطهم و ربنا معاكي

SS · 14-06-2009 01:49 AM

تصدقى بجد انا كرهت عربيتك ديه
و احتمال كبير انزل اولع فى عربيتى بسبها

بص انا عارف شكل الركبة ديه من ال 28 ...مخدتش بالى من وجودها فى 27 ...هى بتتكسر كتير فى 28 ...و بتتباع و ممكن تغيرها ....بس هى اساساً عبارة عن جزء ملحوم
فممكن تكون الركب ةسليمة بس فكت من عند اللحام....و بالتالى بتتلحم تانى ...و فى ناس بتركب لها مسمار زيادة مع اللحام عشان ما تفكش...ديه كل معلوماتى من خلال تعاملى مع ال 28 ...لو فيها حاجة غلط يا ريت حد يصلحها لك ( المعلومات مش الركبة)

و اتمنى ما شوفش الجزء ال 11

**ZALABANY** · 14-06-2009 08:41 AM

هي دي ال 27 وال 28 سياره تعشق الصنايعية والصيانه ربنا يتوب عليكي منها

**YaSSerwIN** · 14-06-2009 11:04 AM

هو فعلا ً الراجل كلامه صح ميقدرش يظبط زوايا قبل ما ما الحاجات دة تتعمل
بالنسبة للمقصات انا كنت شارى جوز المقصات ( أوكاب ) ب 110 جنية
من رأى تطلعى على عفشجى كويس يغير المقسات وكوتش الميزان وهتلاقيه ب 12 جنية
ويفك العفشة كلها ينظفها ويظبطها ويركبها تانى
التكلفة كلها
110 مقصات + 12 كوتش ميزان + المصنعية 50 جنية

**dasboot** · 14-06-2009 02:53 PM

ربنا معاكي بجد يا نور
و بعدين ايه كل التيونينج ده, انتي مش قلتي هتبيعيها؟
رجعتي في كلامك بناء علي طلب الجماهير ولا إيه!!!

و علي فكره لو هتبيعي خساره تغيري المقصات, علشان هتتكلف اكتر من كده, لما تطلع هيقوللك بالمرة stablizer arms (شدادات الإستوبليزر بلغه الصنايعيه :) ) و بيضات الدركسيون و كده يعني.
و مادام طلعها و عملها reformation (استعدلها بلغة الصنايعية) هتمشيكي لحد ما تبيعي