الموضوع: ساعتين في صيانة ال 5000 عند السبع اوتوسيرفيس بالتفصيل و الجمبري

انا اننهارده يا جماعة عملت صيانة 5000 كيلو عند السبع اوتوسيرفيس زهراء المعادي بعد نادي وادي دجلة بكيلو
الصيانة كانت كالآتي
كل اللي عملوه انهم ربطوا العفشة كويس قوي و قرطوا علي فرامل اليد و كمان قولتلهم يقرطوا علي علبة الدريكسيون و كمان غسلوا العربية من برة لكن سألتهم ليه مغسلوش الموتور بالفوم .... قالولي ان ده بيكون طلب العميل و كمان احنا لو لأقينا ان الموتور يحتاج غسيل كنا هنغسلوا من غير طلب و فعلا الموتور عندي كان نظيف جدا جدا و كمان غيرولي لمبة صغيره من غير كعب في الكشاف الامامي شمال كانت محروقة اللي بتقيد مع انوار الطابلوه و كمان اخدوا العربية بره التوكيل عشان يجربوا التربيطات اللي عملوها عشان موضوع علبة الدريكسيون ... بس العربية بقت فعلا 100% .. كل ده كان 75 جنيه + 5 جنيه لمبة + الضريبة

ان بقي زودت انهم يغيرولي زيت الموتور و كنت حريص ان انا اشتري الزيت من بره 3000 كيلو Mobil XHP
و بعدين لاقيتهم بيقولوا لي انهم هيغيروا الفلتر معاه عشان لازم الفلتر يتغير مع كل تغيير زيت . انا مش عارف اعتقد انها واسعه قوي لأن الفلتر بيتغير كل 10000 . بس قلت مش مشكلة يعني 50 جنيه.

المهم استلمت منهم العربية و كانت العربية 100% . السبع فعلا كويس جدا و بيهتموا بالعربية .... دا بالنسبه للصيانة

اما بالنسبة للكافتريا اللي كان صاحبنا عضو من اعضاء المنتدي بيتكلم عنها و حسسني ان انا هدخل كافتريا 5 نجوم :
طبعا انا مش من سكان القاهرة فذهبت الي التوكيل بدون فطار علي كلام السيد العضو . و كانت الفاجعة ان انا ملاقيتش اي حاجة تتاكل و كنت هعيط هناك و طبعا كان معايا المدام . علي العموم المشروبات هناك كانت مجانا و المدام شربت قهوة
النت الويرلس هناك كان بيقطع كل شوية مقعدتش نصف ساعة علي بعضها لكن عملت داونلود للبرامج اللي كانت معايا

بالنسبة انك تشوف عربيتك و هي بيتعملها الصيانة .. كنت فاكر انها صالة كبيرة و تشوف بقي و انت مادد رجليك بقي
لاقيت ان المنظر عبارة عن زجاج 3 متر * 2 متر بتشوف منها عربيتك و يادوب من 3 الي 4 افراد بس اللي بيشوفوا عربياتهم ....

الحاجه اللي دايقتني ان المكان طريقه مش متسفلت قوي ... يعني بعد غسيل العربية الكاوتشات كده كده هتترب تاني مع العربية.

موضوع الجمبري و علاقته بصيانة ال 5000 في السبع اوتوسيرفيس
كل الموضوع اني بنصح اي حد يكون راجع من السبع اوتوسيرفيس و يكون جعان زي حالتي يروح كوك دور شارع النصر بالمعادي يضرب ساندوتش جمبري و هتلاقيه جامبوا و بيبسي .. هتشبع و تروح بالسلامه

دا كان يومي في السبع اوتوسيرفيس في صيانه 5000