اولا اهلا بيك فى قسم الفورد...
ثانيا الاسكورت سيارة جميلة بس محتاج انك دايما تصونها ومتسبهاش بدون رعاية وهى على فكرة عربية عادية يعنى مش بتاعت رفاهية فهى تؤدى الغرض يعنى من آلاخر بتوديك وتجيبك !! بس مش معنى كده انها اى كلام لأ ده موتورها شديد وحمال آسية وبتسافر كتير زى الفل بس اللى انا اقصده مافيهاش بقى الكماليات على قدها يعنى تقدر تقول اهم حاجة الباور أو زجاج كهرباء أو حتى مرايات كهرباء لكن مفيش منها اتوماتيك والتكييف على قده خصوصاً بالذات الـ 1300 لأنه بيأثر على الموتور وسحب العربية وبيسخنها وكل ده ومابيسقعش زى اليابانى ولا الكورى وده عن تجربه هى معايا يقالها سنة بس 1600 وشحنت التكييف اكتر من مره ومافيش فايدة ...
اما بالنسبة لقطع غيارها فهى متوفرة والحمد لله فى التوفيقية وشارع دمشق وشمبليون ومدينة نصر كمان ده غير طبعا الاستير اد فى الحرفيين ووكالة البلح اما فى المحافظات مقدرش افيدك...
ده غير ان أى ميكانيكى ممكن يشتغل فيها مفيش مشاكل بس يكون بيفهم يعنى ميكونش شغال فى السيات وال27 وال28 ويشتغل فى الفورد..!!! ولذلك انا بفضل انه يكون ميكانيكى متخصص فى الفورد
اما بالنسبة للسعر اعتقد انها لوكاملة وحالتها كويسة وكل حاجة شغالة متعديش 33000جم متهيألى ده سعر السوق دلوقتى...فى النهاية هى عربية كويسة جدا صاج قوى ثابتة على الطريق موتور قوى مافيهاش عيوب جوهرية لكن عيبها الوحيد (من وجهة نظرى ) ان التكييف ضعيف..!!
يارب اكون قدرت افيدك فى اى حاجة من اللى انت عايز تعرفها ...ولو عايز اى سؤال انا تحت امرك..
المفضلات