الموضوع: ازاي تتصرف صح لو عملت حادثة ؟؟؟

أنا عجبنى جدا الموضوع ده

اهم حاجه بجد الاعصاب تكون هاديه وبلاش تعصب طبعا ولا زعيق ولو حتى انت مش غلطان
وكل حاجه هتتحل باذن الله

انا عن نفسي خبط واحد والله كمان مره انا لما خبطه محستش بنفسي لثوانى
والناس اتلمت وكده والراحل كان غلطان المهم الناس بتزعق فيا وبتركبوها ليه
المهم حاولت اهدي الناس
وخدت الراجل جريت بيه على المستشفي
وقولتله المهم صحتك وكده
وكانت الخساير طبعا الزجاج الامامى اتكسر كله

اهم حاجه الاعصاب تكون هاديه ومتحولش تشتم

بس المشكلة انك ممكن تتخبط من واحد وهو اللي غلطان وينزل يقل ادبه ويزعق ايه بقي التصرف في الموقف ده؟

أولا باحييك علي الموضوع

و بادعي الله تعالي ان لا يعرض احدا منا لاحد هذه المواقف

في حالة انه لا قدر الله تعرضت لحادث تصادم بين سيارتين

1- اتأكد ان وضع العربية بالشكل الحالي مافيهوش خطورة علي السيارة يعني مثلا مش موجودة في نهر الطريق السريع...
2- فصل الكونتاكت بتاع السيارة
3- لم اي حاجه مهمة كانت معاك علي التابلوه او جنبك... ولو مافيش مشكلة في الزجاج قفل السيارة
4- لو حضرتك مش اللي غلطان و الحادث السبب فيه الطرف الاخر... قبل ما تنزل من سيارتك اتصل بالشرطة
5- لو حبيت تنزل تتكلم مع قائد السيارة الاخري لازم تحط في اعتبارك مجموعة من الثوابت
- هو غالبا هايحاول يزعق و يقنعك بشتي الطرق انك انت الغلطان
- ممكن يحاول يهرب منك ولازم تبقي مستعد علي الاقل بنمرة عربيته و مجموعة من الشهود لو توافروا
- ممكن يكون شخص قليل الادب ولسانه فالت فلازم تمسك اعصابك
6- المحضرررررررررررررر ضروري جدا جدا جدا لإثبات حقك... لو فيه شركة تأمين .. لو مش متأمن عليها المحضر بيتحول للنيابة و تتحول لقضية للمتسبب في الحادث و الغرامة المدنية بتبقي 50 جنيه... بس بناء علي الحكم ده ممكن يترفع علي المتسبب في الحادث قضية تعويض بالقيمة الملائمة... علشان كده بقول ان المحضر مهم جداجدا ... علي الاقل لو فيه سوء نية من الشخص المتسبب في الحادث.. هايخاف وهايقلق
7- تصليح السيارة علي حساب المتسبب في الضرر مش عوض والكلام الفارغ اللي انت غالبا لا قدر الله لو تعرض لحادث هاتسمعه.. ده حقك .. دينا.. شرعا... وعرفا وقانونا كمان.
8- قدر الامكان حاول ما تحركش السيارة من مكان الحادث علشان المعاينة الا اذا ظروف الطريق اضطرتك... و ما تستعجلش علشان ما تعطلش اللي وراك و تضر نفسك .. لا من حقك انك تتمهل و الناس تصبر عليك لحد ما تطمن علي كل حاجه قبل ما تحرك العربية
9- في حالات التصادم دي خد بالك من اللي يقولك اصلحهالك و علي عيني و علي راسي... اوعي تصدقه .. ياأما يطلع مبلغ التصليح وهو واقف يا اما المحضضضضضضضضضضر.... وبعدين لو ادالك حقك اتنازل يا سيدي براحتك .... انا باتكلم من تجربة عملية وحقايق حصلتلي انا و اخوايا ومش من كتير

ده في حالة ان حضرتك المجني عليك... لما لاقدر الله لو انت المتسبب في التصادم

1- برضو قفل سيارتك وحافظ علي متعلقاتك الشخصية
2- اتعامل مع الموقف بهدوء لأنك انت الغلطان
3- حاول تهدي صاحب السيارة التانية ولو مش قادر ماتحتكش بيه
4- لو فعلا تقدر تتكلف تصليح السيارة بشكل فوري او تدفع جزء كبير من مبلغ الاصلاح "ده نادرا ما بيحدث" ما تترددش تخلص الموقف.. بس خد بالك ماتبقاش عرضة للاستغلال.. يعني لو الراجل التاني استغلك يبقي المحضر و التصليح علي حسابك هايبقي افضل ليك
5- المحضر ده حق قانوني للمجني عليه... ما تزعلش منه ولازم تتقبل الوضع لان ببساطه لو انت في مكانه هاتعمل زيه
6- لا داعي علي الاطلاق للاحتكاك او التعارك مع الطرف الاخر... كلاكما خاسر

و في الحالتين ... ما تحركش السيارة بعد كده غير لما تتأكد تماما انه مافيش اي خطر... اتأكد من ضغط الاطارات... السوائل الخاصة بالسيارة ... الاطراف الخاصة بالسيارة و الرفارف و الاكصدامات.. لو فيه مشكلة من دول متغامرش بأنك تمشي بيها كده
و حاول تشوف وسيلة لنقلها لمركز الاصلاح

و خلي ديما معاك تليفون ونش او التوكيل او شركة التأمين للطوارئ

اما في حالة صدم أحد الاشخاص... عفانا الله واياكم يا رب و استر طريق الجميع

مافيش اي حل غير انك تقف علي اول يمين آمن ليك... وتتصل بالاسعاف او النجدة.
و اتبع شروط الاسعافات الاولية

ده الصح من وجهة نظري حتي لو كان اللي بيعبر من المشاه هو اللي غلطان ... احنا بشر .. و ربنا جعل دم المسلمين و من آمنوهم حرام ... استني و اطمن عليه ... و آمن ان ده قضاء ربنا ولازم تصبر و تتحمل مسؤلة انسانيتك
دي وجهة نظري .... طبعا علي الرغم من اني عارف اني هالاقي ناس كتير معارضة .. بس انا اتمني من الله ان اي حد يعمل كده . وا تمني اني انا كمان يلهمني حسن التصرف في المواقف اللي زي دي
و قبل ده كله أسأل الله لنا جميعا السلامة و للمسلمين

شكر أخير لصاحب الموضوع ، وأسف شديد علي الاطالة
وتحياتي لاعضاء المنتدي الكرام

انهارده كنت واقف مع واحد صاحبي علي ناصيه شارع و فجأه حادثه تاكسي بيجو 504 دخل في عربيه فيات سينا من الباب الخلفي خلاها تلف ادام عنيا و من كتر اللفه راحت داخله في عربيه اوبترا كانت واقفه ما فيهاش حد
و بعدين ظهر امين شرطه عمل محضر بس عملو حاجه غريبه طبعاا شافو الاوبترا و هيا مخبوطه بس ما عمالوشي محضر عليها هيا كمان و قالو انها مش طرف في الحادثه
بس انا فضيلت واقف لغايت ما التاكسي مش و العربيه التانيه و فضيلت مستني لغايت ما صاحبه العربيه الابتراا جت و حاكيتلها علي حصل قالتلي يالا بقا نصيبي كده و مشيت
بس و لا سواق التاكسي و لا العربيه السينا حد رفع صوته علي التاني مع انهم غلطانين