الموضوع: توكيل سكودا (أرتوك أوتو)...آسف على الإزعاج!

السيارة: سكودا أوكتافيا a5
موديل: 2007
الكيلومتر:60700كم

الموضوع: صيانة ال 60000
المكان: مركز خدمة أرتوك أوتو بدير الملاك/ غمرة

تفاصيل الموضوع:
قمنا بالتوجه انا و والدي في صباح الأربعاء الماضي إلي توكيل سكودا لعمل صيانة ال 60000 الخاصة بها...و أثناء قيادتي لها أخذت أسجل في ملاحظاتي عليها حتي أخبرهم بها هناك

وصلنا في تمام الثامنة و الثلث صباحاً....كنا السيارة السادسة التي تدخل المكان...تم تسجيلها من قبل فرد الأمن و قمنا بالإنتظار حتي التاسعة...و هو ميعاد بدء المهندسين عملهم...

بدء أحد المهندسين في تسجيل أمور الشغل للسيارات و جدنا انه تخطى العديد من السيارات و عندها بدأ صوت خناق من أحد مالكي السيارات...إزاي تاخد الناس اللي جاية بعدي؟؟؟
و كانت الإجابة بكل بساطة...إحنا ماشيين بالأرقام الزوجية و الفردية...و المهندس التاني لسه مجاش!!!!!!!!!!!!!!! حاجة عادية جداً

قمنا بإنتظار البيه...حيث اننا كنا من ضمن الأرقام الزوجية...و بدأ في كتابة الجوب...و كان كالاتي:

1- صيانة ال60000(بدون تغيير زيت و فلتر)
2- تغيير التيل الخلفي (قمنا بشراءه من محل بالخارج قبل الذهاب)
3- الكشف علي ضعف بالسحب
4- إصلاح مكنة الزجاج الأمامي يمين(بتعلق في الطلوع و النزول)
5- ظبط وش السيارة (الإكصدام طلع في حتة من مكانه)

قال لنا المهندس هاتخلص علي الساعة 4....لأن تغيير سير الكاتينة لوحده بياخد 3 ساعات

قلنا ماشي...طلعنا فوق الإستراحة و إتجددت و بقت تمام...و واسعة ومكيفة (تكيفات شارب بالأيونيزر)....و مشروبات و روتانا سينما و حاجة زي الفل...طبعا مافيش حاجة أحكيها في 7 ساعات الإنتظار لأنها كانت مملة لأقصى درجة...و إتكتب عليا أشوف فيلم زفت كركر...حاجة قمة في السفاهة و الإنحطاط الفكري و التمثيلي...ما علينا

جت الساعة 4 كنت خلاص جبت جاز من كل حتة...و عمال أخبط راسي في الحيط...قلت لأبويا جوم بينا نمشي من هنا يابوي...الجو كان حر جداً بس أهون من قعدة المستشفي اللي فوق

أثناء إنتظارنا بالخارج...كان فيه زبون بيستلم عربيته من الصيانة...و أثناء ما كان بيراجع عليها وجد علي الكبوت و الرفرف...خدوش كثيرة جداً و طويلة لم تكن موجودة من قبل...و هو ما أثار إستياءه الشديد...و طبعاً بدأ يزعق جامد...جه واحد من العمال في النص يبجح معاه بكل قله أدب و عدم إحترام للشخص الكبير...و هاتك يا زعيق....طبعاً أخدوه جوه في الإستقبال و قعدوا يهدوا فيه...و جابوا مهندس السمكرة عشان يعمل مقايسة لإصلاح الخدوش...و بعد ما خرجوا...لاقيت الراجل بيزعق تاني..."قال تدفعوا 5% قال...انا كنت فاكرها 50%...رغم اني المفروض مادفعش حاجة"...و بدأت الخناقة تاني...المهم راحوا علي مدير الورشة بعد كده ...بس مشوفتش وصلوا لإيه....
طبعاً مش محتاج أقول الموقف ده لو في كيا مثلاً كان حصل إيه :)

خرجت سيارتنا...و فضلنا مستنين فوق النص ساعة عشان الفاتورة تخش للحسابات ....و كان فيه فاتورة أخري خارجية خاصة بعمل خرط لحاجة في قاعدة الموتور...مافهمتش هي إيه بس اللي فهمته انها لازم بتتعمل في الصيانة دي....و حسيت انها إشتغالة...أو هما مش بيشتغلوا صح زي ما الكتاب بيقول!!دي كانت ب 140 جنيه لوحدها

وصلت الفاتورة للحسابات...كام يا سعادة البيه المحاسب؟؟؟؟

3326 جنيه!!!!!!!!!!!!

يخرب بيت أبوكم!!!!العربية دي حاجتها رخيصة يا جدعان....إيه الأسعار دي؟؟؟؟؟؟
المهندس قبل كده أصلاً قال لنا إعملوا حسابكم علي باكوين

طقم السيور لوحده معدي ال 1000 جنيه
زيت الفتيس ب604 جنيه!!!! ليهههههههههههههههه!!!!!
مصنعية 1100 جنيه (@#%@^)( أو كاميسوترا علي رأي أحمد مكي)

لأ و واخدين بالكم ان إحنا أصلاُ مغيرين الزيت و الفلتر بره + التيل جايبينه معانا و سعره أرخص من عندهم 100 جنيه!!!!
يعني لو عملنا الحاجت كلها كانت هاتتكلف 4000 جنيه!!!!

يرضي مين ده؟؟؟!!

دفعنا طبعاً رغماً عننا...و حظنا ان أبويا كان معاه بزيادة...و روحنا في الأخر ب20 جنيه في جيوبنا

أخذنا إذن الخروج و جرينا علي العربية عايزين نمشي بأي شكل...و أبويا بدأت العروق تنطر في وشه من تأثير المبلغ:)

أول ما قربت منها...لاقيتها عبارة عن مزبلة علي 4 عجلات....كومة من الشحم و الطين في كل حتة...صوابع ملطخة في كل حتة...حتي جوة الصالون....شوفوا رغم اني كنت بارد طول اليوم إلا اني أول ما شوفت المنظر ده إنفجرت...و جه واحد من الأمن يقولي ببساطة...أصل محدش قالنا ننضفها!!!!و أثناء ما انا بزعق...قام أبويا شاخط فيا و قالي مش قادر عايز أروح...سيبها مطينة كده!!!

قلت أمري لله...و مشيت من الزبالة اللي اسمها أرتوك...مع وعد مني و من أبويا اننا مش هانعتبها تاني...

إستجابة و سرعة العربية بقت زي الفل...بتفط من الدوسة...صوتها أنعم كتير...و بقت ماسكة نفسها أكتر و الزجاج تم إصلاحة...بس عمره ما هايبرر ال 4000 الجنيه اللي إتدفعوا ولا الخدمة الزبالة...

لو عملناها بره ...عمرها ما هاتزيد عن 1500-2000 جنيه بالكتير قوي قوي

و إحنا بنركن قلنا نشوف نفتح الكبوت نشوف ايه الأخبار...إتفرجنا و كل حاجة...أول ما قفلناه...لاقينا بوز الرفرف فط من مكانه...و الفانوس دخل لجوه!!!!!!!!!!!....الأساتذه كانوا ملصمين الوش و مريحين الفانوس عشان كله يظبط مع بعضه....بس كله راح مع قفلة الكبوت و اللي خلت وش العربية كأنه مخبوط من عربية تانية!!!!!


______________________________________
توكيل سكودا....انا فعلاً آسف علي إزعاجك طول السنين اللي فاتت...و أوعدك مش هاتشوف العربية تاني...
أراك في حياة أخري...ربما تكون صالحاً فيها!

المشاركة الأصلية كتبت بواسطة kareemhisham

امتى بقى نشوف توكيل محترم ,,

كل توكيل فى مشكلة جامدة ,,

الواحد مش عارف يروح فين طيب ,,

لأ و حكاية الفردى و الزوجى و المهندس التانى اللى لسه مجاش دى موتتنى من الضحك (حاجة عادية جدا فعلا) هههههههه

ربنا يكون فى عونك

كيا توكيل محترم

رينو توكيل محترم

و اقفل على كده