الموضوع: ما هو رادار السرعه وكيف يعمل؟

هناك عدة أنواع من الرادار المستخدم لمعرفة سرعة الأشياء, طبعا اللي يهمنا هنا الرادار اللي بييوقفونا بعده عشان ياخدوا الرخص

أشهر الأنواع وأكثرها إنتشارا إسمه Radar Gun وده بيعتمد على نظريه علميه إسمها Doppler Effect

عشان نفهم Doppler Effect ده, حاول تفتكر كده آخر مره كنت راكب فيها قطر

لما بيبقى فيه قطر تاني مقابل القطر اللي إنت راكبه ولو تصادف إن القطر ده (لامؤاخذه) بيزمر

هاتلاقي إن نغمة الزماره دي بتتغير في اللحظه اللي بيعدي فيها القطر المقابل جنبك

يعني القطر ده وهو بيقرب منك بتبقى الزماره صوتها أرفع من صوتها وهو بيبعد عنك

مع إن الزماره دي بتطلع صوت بتردد ثابت, بس عشان في فرق في السرعه النسبيه بين مصدر الصوت وبين اللي بيستقبل الصوت بيحصل فرق في التردد ده

عن طريق الفرق ده ممكن تقدر تحسب السرعه بين المصدر والمستقبل

يعني الراجل اللي بيبقى قاعد مستخبي وراالشجره أو ورا إعلان الشامبو بيبقى ماسك حاجه بتطلع waves بتردد معين وبتستقبل إنعكاس الwaves دي تاني.

لو الحاجه اللي بتعكس الwaves دي واقفه في مكانها هايبقى إنعكاسها ليه نفس التردد بتاع الwaves اللي طلعت في الأول, ولو رجعت بتردد أقل ده معناه إن الحاجه دي بتبعد عن المصدر, ولو رجعت بتردد أعلى ده معناه إن الحاجه دي بيتقرب من المصدر.

عن طريق فرق التردد ده الراجل المستخبي ده بيشوف سرعة الحاجه اللي بتجري قدامه (اللي هي العربيه اللي سيادتك سايقها)

لو مش فاهم الDoppler effect شوف اللينك دي:
http://www.astro.ubc.ca/~scharein/a311/Sim/doppler/Doppler.html

الRadar Gun ده بيشتغا على Frequency bands مختلفه:

X Band: 8GHz – 12GHz

K Band: 20GHz – 40GHz

Ka Band: 26.5GHz – 40GHz

Ku Band: 12GHz – 18GHz

ملحوظه مهمه: كل ما الfrequency بيقل ده معناه إن الwave نفسها لازم تبقى أقوى عشان تقدر تمشي مسافه أكبر وده بيخلي وظيفة الRadar detector أسهل عشان كده الX Band ده مبقاش مستخدم قوي.

طيب نعمل إيه عشان الرادار مايلقطناش؟؟

أول حاجه: تمشي على مهلك ومتتجاوزش السرعات

تاني حاجه إنك تمشي بسرعه جدا جدا جدا لدرجة إن الwaves اللي بتنعكس منك تبقى أبطأ من إنها تتقري, وكمان على ماتتقري ويتعمل الProcessing والكاميرا تيجي تلقطك هاتكون خرجت بره الكادر, ده معناه إنك لازم تكون فوق ال250Km/h وبالتالي الراجل اللي مستخبي ورا إعلان الشامبو مش محتاج رادار عشان يبلغ الكمين إنه يقفشك (ده إذا لحقت تفرمل قبل الكمين ومادوستش العميد اللي قاعد تحت الشمسيه)

تالت حاجه ودي علميا صعبه شويه, إنك ترش العربيه بماده مابتعكسش ال waves بتاعت الرادار دي (زي الطيارة الشبح كده يعني) أو على الأقل ترش النمر بماده تكون شفافه بس تخلي النمر بايظه في الصوره. وطبعا الكلام ده كلام مش هاتلاقيه عند "إسماعيل المحروق" السمكري يعني.

يعني باختصار إمشي على مهلك وخلاص

فيه حاجه تانيه بتستخدم نفس الفكره بس بتطلع LASER Pulses وبتقيس الفرق بين كل الpulses المنعكسه وبين الفرق بين ال pulses دي عند المصدر, نفس الفكره يعني من الأخر كده ,ده إسمه LIDAR

فيه بقى حاجه ماينفعش معاها detector ولا نيله, ودي بيستخدمو فيها نوع إسمه (Automatic Number Plate Recognition) ودي بتصور كل العربيات المعديه (مش بتقيس سرعتها خالص) وعن طريق نوع من الImage Processing بتطلع من الصوره رقم العربيه وبتسجله بوقت المرور وبعدين تيجي الكاميرا اللي بعدها تعمل نفس القصه وعن طريق مقارنة زمن المرور بين الكاميرا الأولى والتانيه بتقدر تحسب السرعه.

ماعتقدش إن ده عندنا في مصر والحمد لله

المشاركة الأصلية كتبت بواسطة mohamed777

جزاك الله خيرا

وياريت لو حد عندة معلومات عن كاشف الرادار وبكام ومنين

كاشف الردار ممنوع على ما اعتقد وفية سحب رخص فورى