لسه عامل عمره بس مش مبسوط

**stlony** · 03-09-2009 11:06 AM

السلام عليكم
انا معايا كرولا 98 (العيون) المتور 1300 سي سي معايا بقالها 3 سنين من حوالي شهر استلمتها من العمره لانها كانت بطلع دخنه ابيض مزرق من الشكمان والحكايه ديه حصلت كده مره واحده وانا علي الطريق

المهم اني عملت العمره وليينت 1000 كيلو علي سرعه من 60 الي 70 علي النقله الخامسه بدون قرص نهائيا (العربيه مافيهاش rpm) بس العربيه مرجعتش لحالتها زي قبل العمره من ناحيه السرعه يعني مثلا ديه بيانات

قبل العمره

الاول 30 كيلو
الثاني 50 لو قرصت 60 كيلو
الثالث 80 لو قرصت 90
الرابع 110 لو قرصت 120
الخامس في النهايه يوصل لحد 165 يقرب من ال 170

اما بعد العمره

الاول 20 كيلو
الثاني 40 لو قرصت 50 كيلو
الثالث 70 لو قرصت 80
الرابع 100 لو قرصت 105
الخامس في النهايه يوصل لحد 160 تقريبا

البيانات كلها متاخده بعد العربيه ما عملت 1500 كيلو بعد العمره 1000 تلين و 500 سواقه طبيعيه

طبعا محدش يقولي الفرق طلع حوالي 5 كيلو في السرعه القصوي لان الفرق مش كده بس انما كمان بالطريقه ديه زمن التسارع وسحبة العربيه والعزم اختلف نهائيا

مع العلم اني رحت ظبط التاكيهات والكاتينه والاسبراتير والكربراتير (بعد التليين) ظبط تمام التمام عند ميكانيكي انا واثق فيه غير اللي عمل العمره وانا واثق ان هما مظبوطين تمام التمام

هل ده طبيعي ان العربيه بعد العمره تقل كفاتها ولا فيه حاجه غلط في العمره في البلوك ولا الاسطوانه والدسك مش مربوطين كويس ففي هادر في الحركه
عايز مساعده من حد خبير

**samirayad** · 03-09-2009 10:15 PM

لا هو أنت تقول الحمد لله على وصولك للحاله دى
لأن اللى حصل ده

لانها كانت بطلع دخنه ابيض مزرق من الشكمان والحكايه ديه حصلت كده مره واحده وانا علي الطريق

وده معناه أن شنبر الزيت أنكسر
وجرح البلوك شويه من الداخل
ومبقاش زى طبيعته الأستاندرد
وأكيد الميكانيكى اللى عمل العمره
صنفر غرف الحريق من الداخل
وبكده مقاس فتحات الغرفه أتأثرت شويه
وبالتالى صعب الوصول الى الوضع الأول

**stlony** · 04-09-2009 10:10 AM

تمام بس انا خرط المتور وجبت بساتم 0-10 وشنابر وصوبابات وكله
انا عامل عمره كامله

هل برده نفس الرد ؟؟

**samirayad** · 04-09-2009 02:45 PM

هو أنت عملت الصح بصراحه
والله ينور عليك
بس خللى بالك بيبقى فيه حدود ونسب تفاوت فى أعمال خراطة البلوك
وفيه حدود للخلوصات بعد الخراطه
وكتالوجات الصيانه لأى محرك بتبقى مديه سماح للخراطه بين
أقصى قيمه وأقل قيمه مسموحه .....
وأنت وحظك وكفاءة الخراط فى عمل توسيع وضبط لغرف الحريق
والصراحه أنا شايف أن الخراط والميكانيكى اللى عملولك الشغل عندك
كفائتهم ممتازه .....أن وصلوك للمرحله دى
ويجب عليك أن تحمد الله على وصولك لهذه النتتيجه
أصل خللى بالك
عمر المحرك اللى بيتعمل فيه خراطه مابيرجع زى الأستاندرد
مع تغيير البساتم والشنابر لمقاسات over size
سواء زيرو 10 & زيرو 20
بس بجد عندك الحظ كويس جدا .....وأنا شايف النتيجه أكثر من رائعه
فأمسك الخشب .....وقل الحمد لله
ومش مهم الفروق اللى مش عجباك دى عن قديمه ............!!!!!!!!!!!!

**stlony** · 04-09-2009 03:03 PM

طب والله طمنتني الحمد لله
بس فيه ناس بتقول ان الموتور بيكون كده في الاول ماسك نفسه وبعد كده بيفتح زي مابيقولو
وشكرا علي اهتمامك

**samirayad** · 04-09-2009 03:18 PM

البيانات كلها متاخده بعد العربيه ما عملت 1500 كيلو بعد العمره 1000 تلين و 500 سواقه طبيعيه

بس فيه ناس بتقول ان الموتور بيكون كده في الاول ماسك نفسه وبعد كده بيفتح زي مابيقولو

برضه وارد جدا ....حدوث تحسن معاك فيما بعد
وبالذات مع أستمرار التليين مع الأحمال
أصل أنت لحد دلوقتى .....بيعتبر تليينك كله بدون أحمال
وقرص جامد ......
فممكن عملية أستمرار التطبيع للشنابر على غرف الحريق من الداخل
يزود الكفاءه كمان عن كده ....وتصل لمرادك ....وأوصيك بتقليل السرعه بقدر الأمكان ......أصلها مبتفرقش كتير فى الوصول لنهاية الرحله بالسياره ....بس تفرق كتير فى آمان قائد السياره .....................
بس أنا عاوزك تقول الحمد لله ..........
وتذكر الآيه الكريمه
ولئن شكرتم .....لأزيدنكم
صدق الله العظيم