عربيتى لانوس والبطارية الغريبة !!!

**zikoofire** · 21-09-2009 04:51 AM

السلام عليكم
كل سنة وانتم بخير يا اجدع ناس واقرب صحاب
وعيد سعيد عليكم يارب العالمين
الحقيقة انا عندى مشكلة غريبة
عربيتى اللانوس فيها بطارية جافة
انا ماعرفش البطارية بقالها قد ايه الحقيقة بس انا شاريها بيها بقالها بتاع 5 شهور كدا يعنى
المهم البطارية بقالها بتاع اسبوعين بتعمل دقات نقص وبتنام
واضطر ياما ازقها ياما اجيب توصيلات واقومها
واخر مرة روحت شحنتها واشتغلت تمام لمدة 3 ايام
النهارده بقى وانا فى وسط البلد جاى بدور عملتها معايا بنت الذينا ونامت
ولفيت حوالين نفسى الوقت متاخر ومش لاقى حد يساعدنى واستعنا بناس يزقوا بس مارضيتش تدور
فى الاخر سبتها وروحت المهندسين اشتريت كابلات عشان اخد توصيلة من اى تاكسى
المهم جبت تاكسى وفضلنا نحاول الكهرباء اللى داخلة من بطارية التاكسى زى ماتكون ضعيفة او التوصيلة ضعيفة مافهمتش بالظبط المهم مش رضيت تدور
واخر مازهقت قولتله بص نديها زقة اخيرة يمكن ربنا يهديها
وهيلا هوووب زقيت بغللللللللل باقصى قوتى
والراجل بتاع التاكسى كان شاطر وعرف يرمى كويس ويدور العربية
المهم انا روحت وانا عمال افكر ايه السبب مع انى لسة شاحنها
فكرت انه يكون الدينامو .. بس متهيالى الدينامو بيشحن يا جماعة ، بدليل ان البطارية لما بمشى بيها شوية ممكن تفضل معايا شوية
وكمان اننا لما زقينا العربية مشيت عشان الدينامو عمل توليد
بصوا انا محتار
ياريت حد فيكم يفيدنى بالله عليكم لحسن انا محتار جدا
وعيد سعيد عليكم وربنا ماينيملكمش بطارية فى وسط البلد ... وفى العيد
هههههههههههههه

**magna** · 21-09-2009 05:53 AM

وعليكم السلام
وكل سنه وانت طيب

روح لواحد متخصص في البطاريات وخليه يقيس الشحن

ويشوفها والسياره شغاله ويقسها لو بتدي 14 او 14.5 وانت مشغل معناها الدينمو شغال

لو اقل ممكن يكون الملف فيه حاجه ضربه فا تغيره

بس لو الشحن مظبوط يبقى عيب بطارية

**piezo** · 21-09-2009 12:54 PM

ممكن يكون عيب البطاريه
وخد بالك الكبلات الي بتتباع في المحلات مش كويسه انا مره جبت واحد وجيت اقوم بيه العربيه مارديش لانه ضعيف وجبت واحد بتاع بطاريات وجاب الكبل معاه و قامت زي الفل