تعديل محرك ريجاتا

**montela** · 06-11-2007 02:25 AM

السلام عليكم اية الاخبار
انا عندي سؤال تقيل شوية
انا عندي عربية ريجاتا موديل 85 1500 سي سي عايز اعدلها المحرك بتاعها ممكن حد يساعدني
بس اللس ناوي يساعد يارات يقولي علي الحاجات اللي هعاوز اشتريها اشتريها منين ماشي

**hazem_khidr** · 06-11-2007 04:06 AM

يا تري حضرتك عاوز تعدل الموتور ازاي؟؟؟
الاحسن انك تجيب موتور 1600 تمبرا برضه و بيبقي 100 حصان او موتور لانشيا مثلا و فيه منه 1600 و 2000 كمان
بس حضرتك قول عاوز تعمل ايه بالضبط و ان شاء الله نساعدك

**montela** · 06-11-2007 09:55 AM

انا كل اللي انا عايزة ازود قدرة المحرك يعني احصل علي قوة اكبر
فياتري الاحسن اني اسقطلها موتور جديد ولا اعمل تعديلات علي الموتور القديم ولو هسقط موتور جديد منين وبكام
ولو هعدل الموتور القديم هعمل اية؟ وفين ؟ وهيكلف كام
دة كل اللي انا عايزة وشكرا :-)

**NaderNabil** · 06-11-2007 12:36 PM

اللي أنا فاكره ممكن تحط كاربراتير أكبر أو تحط اتنين كاربراتير بس ده الاول هيحتاج تغير القواعد بتاعتهم عشان يشيل الجديد أو تعمل قاعدة تفصيل بحيث انها تشيل واحد لكل 2 سيلندر. لازم تروح لتاجر استيراد كويس عشان يقولك تعمل ايه و اعمل حساباك في 500-700 جنيه

تاني حاجة طرمبة بنزين أكبر يكون الضغط بتاعها أعلي و ممكن تكون اليكتروني برضه تاجر استيراد

تعمل هيدر و اكسوست عمولة ستانلس ستيل و الماسورة تكون 2 انش و متزودش عن كده و طبعا علبة شكمان نضيفة في الاخر.. روح لواحد بتاع شكمانات كويس و هتلاقي في الحرفيين كتير و هيكلف حوالي 300-400 جنيه بالعلبة

نزود الهوا اللي داخل للموتور عن طريق فلتر رياضي أو ممكن تعمل عمة عمولة برضه بتكون مفتوحة من الجوانب بحيث الفلتر ياخد هوا من كل حته مش بس من الفتحة الصغيرة بتاعت العمة

**MMamdouh** · 06-11-2007 01:35 PM

المشاركة الأصلية كتبت بواسطة NaderNabil

تاني حاجة طرمبة بنزين أكبر يكون الضغط بتاعها أعلي و ممكن تكون اليكتروني برضه تاجر استيراد

الطلمبة الاكبر ملهاش لزمة طالما مش مركب تربو او سوبر شارجر لان ضغط الطلمبة مش عنصر من عناصر الاداء

كل اللى محتاجة انك توصل للضغط الصح لو عربيتك انجكشن او ان الطلمبة توصل الكمية الكافية من البنزين لغرفة العوامة فى العربية الكربراتير فيما عدا ذلك يبقى الطلمبة الاكبر مضيعة للفلوس

ممكن لو غيرت الكربراتير بواحد اكبر تحتاج طلمبة اكبر بس لو مغيرتوش يبقى ملهاش لزمة

MMamdouh