محتار وأرجوا الإفاده

[aliluka]

أولا أحب أشكر كل المتواجدين فى الموقع وكل المشرفين والقائمين على الموقع الجميل ده والرائع واللى فعلا أنا إستفدت منه كتير
أنا بصراحه عندى مشكله وقررت إنى أكتبها هنا لأنى عارف إن كل المتواجدين مش هيبخلوا برأيهم
أنا عاوز أجيب عربيه جديده وطبعا نفس مشكلة الكثير من الناس مش معايا غير 20 الف جنيه
واحد صاحبى إقترح عليا فكرة إنى أدفع مقدم وأجيب عربيه ماتريكس مثلا وأعرضها للإيجار وهى تسدد نفسها

أنا مش عارف هل هى فكره كويسه ولا وحشه وإيه المخاطر بتاعتها مع العلم إنى أكيد هيكون فى تأمين شامل على العربيه
ولو كانت الفكره كويسه إيه هيه أكتر عربيه مناسبه وتستحمل التأجير ممكن الواحد يجيبها ( تويوتا - لانسر - ولا حبيبة قلبى الماتركس )

[fahd_628]

لا يا باشا معتقدش حتبقى فكرة كويسة

الايجار حيهلكها جاااااااااامد

[إسلام شاهين]

أنا مش فاهم المشكلة بتاعتك إنك عايز عربية جديدة تركبها ولا مشكلتك مادية وعايز مشروع يدر عليك ربح شهري ؟ لو المشكلة عربية عادي ممكن فعلا تدفع المقدم بتاعك 20000 ألف وتقسط الباقي ، لكن لو المشكلة مادية ممكن برضه تجيبها وتأجره بس المهم تكتب مع الشركة اللي هاتأجر منك العربية عقد مايقلش عن 3 أو 4 سنين علشان تتضمن إنهم يدفعولك الفلوس وتكسب منهم كمان بس في الحالة ديه إنسى العربية خالص وكأنك حاطط فلوسك في مشروع بيجبلك كل شهر دخل .

[د.أحمد سمير]

أنا فاهم تقصد إيه .. انت عايز تدفع الفلوس ، والعربية تسدد قسطها ، وتركبها فترة معقولة كل شهر .
أغلب أصحاب معارض التأجير بيقولك اشتري عربية وسبهالي 10 أيام فقط وهي هتسدد قسطها ، وبعد شوية ممكن تجيب عربية تانية ، وتأجير واحدة فقط سوف يغطي تكاليف تقسيط العربيتين . هذه خدعة قديمة بها الكثير من المحاذير .
1. أن أغلب الذين يقومون بهذا العمل هم أصحاب مكاتب التأجير لا الشركات ، وبالتالي فإن قدرتهم على حماية العربية فيها شك طبعاً .
2. أن هذه الصورة الوردية تتغير بمجرد حدوث أية مشكلة ، وسوف تجد نفسك أمام خيارين أولهما أن تخفض قيمة الإيجار لأنك محتاج الفلوس ، وثانيهما انك ترفض وتتدبس في القسط على ما يلاقوا عربية ثانية وشخص تاني يقومون معه بهذا الفعل .
3. ليه هذه المكاتب ما دام المسألة مضمونة جداً كدة لا تقم بهذا الفعل لنفسها .
4. السيارة سوف تتأجر بشكل جيد طالما هي لا زالت جديدة وبمجرد مرور سنة سوف تجد الرغبة في إيجارها تقل وبالتالي سوف تجد نفسك أمام عدد من السنوات مطلوب منك تسدد قسطها في الوقت الذي لن تكون عليها إقبال .
5. أن من يستأجر السيارة من هذه المكاتب أغلبهم من الشباب الروش اللي هايدمرلك العربية في شهور .
6. أن جميع الضمانات تقدم من مستأجر العربية للمكتب وليس لك فأنت تحت ضرس المكتب تماماً .
7. أنه بمجرد حدوث أي حادثة أو سرقة أو جريمة في السيارة ستجد نفسك في متاهات كبيرة قد لا يساعدك فيها مكتب التأجير ، خاصة أنه في كثير من الأحيان تكون أوراق المستأجر مزورة من جوازات سفر أو بطاقات لو كان ينوي ارتكاب جريمة بها أو سرقتها .
8. أن إيصال الأمانة أو الشيك على بياض الذي يحصل عليه المكتب قد يصدر من شخص معه رخصة لكنه تحت السن القانوني أقل من 21 سنة وبالتالي لن تكون له قيمة .
طيب هي كدة اتقفلت ... لأ
لو فكرت نفس التفكير لابد لك من الآتي :
1. أن تحاول تأجير السيارة لشركة محترمة ، واشهر الشركات هي شركات البترول ، وهم يطلبون مواصفات محددة في السيارات ، ويمضون معك عقداً لمدة ثلاث سنوات ، ومبلغ الإيجار تستطيع أن تدفع منه قسط سيارة معقولة لحين استكمال سداد أقساط السيارة الأولى .
2. لو لم يتوفر الخيار السابق حاول التعرف على سوق الإيجار محتاج سيارات من أي نوع ، واشتريها ، وضع عليها سائق من طرفك ، ولا تؤجرها أبداً بدون السائق ، بهذا تحافظ على السيارة من السرقة والحوادث والإهلاك .
3. ظبط حالك مع بعض سماسرة الشقق المفروشة من الطبقة الممتازة ، وأجر السيارة في الصيف بسائق محترم ومؤدب وملتزم لعائلات خليجية ، وسعر إيجار السيارة المتوسطة ( لانسر كورولا واجا سوبارو أو حتى ماتريكس ) في اليوم حوالي 350 جنيه بدون حد أقصى للكيلومترات في حوالي 100 يوم هو موسم السياحة الخليجية سوف تدر عليك ما يقارب من 30000 جنيه سنوياً سدد منهم القسط والتأمين واستخدم العربية في بقية السنة . ويمكنك أن تتواصل مع بعض مكاتب السياحة والسفر في دول الخليج لتكون معتمداً لديهم ، والمسألة سهلة ، وكل عائلة ستجد منك الالتزام سوف ترشحك لأقربائها وزملائها والعملية هتمشي يعني .

ولاحظ أنه بدون أن تتمكن من ضبط هذه الأمور لا تتسرع في شراء سيارة تحت أي وهم أو تعشيم على الإطلاق .
تقبل خالص مودتي وبالتوفيق إن شاء الله تعالى

[الريس]

برغم اني ليس لي علاقة بالموضوع
الا اني ارفع القبعة ـ اللي انا مش لابسها اصلا :D ـ للاستاذ الفاضل د.احمد سمير على الرد الوافي جدا ده

[amrrashed]

فعلا رد رائع يا دكتور مفيش احسن من كدة

[TAREKSHEIR]

إحترس

كلام أ / أحمد سمير صح إبعد عن الشر وغنى له .

[Dr_Smart]

ربنا يباركلك يا دكتور أحمد سمير جزاك الله كل خير على ردك الوافي ويا ريت تفيدنا بخبرتك دايما

سلام عليكم

[د.أحمد سمير]

تقبلوا جميعاً خالص حبي ومودتي

[aliluka]

دكتور أحمد سمير أنا بشكرك جدا على الرد الرائع ده وفعلا أفدتنى وطبعا ما أفدرش أنسى كلى اللى ساهم بالرد على الموضوع وأنا بجد بشكركم جدااااااااااااااااااااااااااااااااا

[Islam_galal]

السلام عليكم
رد د.أحمد سمير وافي و كافي حتي أني لا أستطيع اضافة كلمة
جزاك الله خيرا

[Santino]

فعلاً السؤال اللي دايماً بيخطر علي بالي : لمّا الحياة حلوة كدة زي ما بتوع مكاتب الإيجار بيقولوا , طيب ليه مش بيشتروا عربيات لحسابهم و يبقي المكسب كله ليهم ؟؟!!!!

[labbody]

أعتقد أن الدكتور / أحمد سمير أستوفى جميع أركان الموضوع

[خالد]

هايل يادكتور أحمد

[Akram]

كلام د/سمير كلام موزون و متكلف و منظم,
هو انت دكتور في ايه بالضبط.
مع خالص تحياتي و تقديري,,