أسباب سوء سمعة الميجان (الحلقة الرابعة : ثقافة السوق )

[farahat]

أنا قعدت أفكر كدة و أسأل يا ترى ليه الناس مستغربة الميجان في السوق بتاعنا ، و ليه الناس بتتفرج عليها من بعيد و خايفة تقرب منها، و ليه الكمية الكبيرة دي من النكات الجميلة اللي طلعت على العربية دي بالذات و على الموديل دة منها تحديداً ؟؟!!
بعد تفكير لقيت إن مفيش أصلاً موديل تاني فاكره للرينو في مصر كان منتشر و موجود بالكم دة عشان حتى الناس تفتكره مش حتى تطلع عليه نكت ،
اكتشفت إن من زمااااااان و احنا في مصر بنشوف العربيات الرينو دي و عليها نمر خضرة بس ، يعني طول عمرها دبلوماسي و بس (فاكرين رينو Safrane ولا Chamade ) ، و طول عمرها مبيعاتها مش كتير لأن ليها زبون معين ، و لما الوكيل نزل عربيتين متواضعين بسعر متواضع ( Rainbow و Optima ) كان شكلهم قديم (شبة رينو ١٩ ) و مفيهمش كماليات منافسة للعربيات الكوري اللي سعرها كان أقل شوية و فيها نفس الكماليات و أكتر أحياناً .
لحد ما ابتدت ثورة الإلكترونيات و السوفتوير في العربيات من كام سنة و ابتدت تبقى الكماليات و التكنولوجية مرتبطة بالسوفتوير و دة معناه تكاليف أكتر في التطوير و تمن أقل للعربية في حالة المبيعات الكبيرة (لأن التكليف لكل سيارة بتكون قليلة عشان سوفتوير و لكن تكاليف التطوير بتتوزع على عدد العربيات المباعة )

طيب دة اللي من ناحية رينو فين بقى وجهة النظر من ناحيتنا احنا كمصريين ؟
احنا هنا في مصر سواء من أصل ريفي أو صعيدي عندنا ثقافة العرف و الأصول ، يعني ديماً ميالين إن احنا نتعامل مع اللي نعرفه بس و نمشي على اللي اهلنا إتعودو عليه ، و مش طبيعي إن احنا نجرب حاجة جديدة لمجرد انها جديدة ، و ساعد على كدة كمان الحالة المادية للمصريين يعني لو معك ٥ جنيه مش هتغامر بنص جنيه منها عشان تجارب حاجة جديدة يا طلعت حلوة يا خسرت النص جنيه بتاعك .

نيجي بقى نحت العنصرين دول على بعض ، رينو عملت عربية شكلها جميل (و د طبيعي في عربياتها من زمان على فكرة بس احنا مش متعودين على شكلها لأنها ذي ما قلنا مربوطة في بالنا بأنها عربية دبلوماسي أو فاترينة و مش بنتخيل حتى نركبها بس نتفرج عليها) ، و العربية الجميلة دي فيها شوية حركات و كلها معتمدة على سوفتوير (يعني كارت بدل مفتاح والكارت دة بتاعة بلاستيك تمنها رخيص كوحدة بس عليها كود بتاع العربية و دة بيتغير بالبرنامج من عربية للتانية و أول ما السوفتوير اللي في العربية يشوف الكود دة يعمل شوية حاجات كدة يفتح نور الصالون و يدور الموتور و لم تنزل يقفل الزجاج و كمان المرايات يعني كله لعب fi السوفتوير مع انها هي هي نفس الوحدات القديمة يعني معملش مثلاً عربية بخمس مرايات ولا موتورين :) )
يعني باختصار العربية من حيث تكاليف الاجزاء زي أي عربية من أي موديل قديم بس الإمكانيات زيادة و مش مكلفاه حاجة غير تمن تصميم العربية و دة لازم يبيع كتير عشان يعوضه .
تزامن الكلام دة مع بداية صحوة السوق في مصر ، كل وكيل بدل ما كان بيجيب موديل واحد أو بالكتير اتنين من الماركة اللي هو بيمثلها ابتدى يجيب كذا موديل و بقينا نشوف من هيونداي ٤ أو ٥ موديلات و VW كذا موديل حتى مرسيدس بأت تدخل ال-E و ال-C و ال-S وال A في وقت واحد و بقينا نشوف عربيات كتير و تنوع أتاح للمشتري إختيار العربية اللي تعجبه .

المستهلك المصري بقى بالمفهوم اللي لسة قايلين عليه قال " اللي نعرفه أحسن من اللي منعرفوش " ، و أدامه موديلات كتير من الحاجات اللي يعرفها (ميتسوبيشي و تويوتا و دايو و هيونداي و نصر و BMW و مرسيدس ) ، انما الحاجات التانية دي مالناش دعوة بيها ، دي بتاعة الناس التانيين دي مش بتاعتنا ( فولفو ، رينو ، ألفا روميو ، Audi )
طب مين بقى اللي إشترى الميجان ؟ هو نفسه اللي إشترى فولفو S40 و هو اللي إشترى الألفا روميو ١٥٦ و اللي زيهم ، زائد كم واحد كدة من هواة التجربة و هواة الجديد و كم واحد تانيين من اللي بيقرو البروشور بتاع العربية و بيفهمو إيه المكتوب فيه قبل ما يشتري ( و ساهم في كدة كمان إن العربية سعرها كويس فزادت نسبة المجربين )

طب د كلام حلو لحد دلوقتي فين بقى المشكلة ؟؟؟
هو مفيش مشكلة بس فيه لخبطة حصلت ، زي م أقلنا الموضوع فيه سوفتوير كتير و حركات ، واحد لقى إن الكارت بيفتح باب السواق بس و مش بيفتح التلاتة التانيين قعد مع أصحابه يقول أنا مش فاهم إيه اللي بيحصل في حاجة غلط ، مش واخد باله إن هو داس دوسة طويلة مثلاً على زرار ال-lock بتاع العربية مع وجود الكارت (حركة كدة مشروحة في المنوال بس كم واحد قراه ؟؟!!) ، ولا مفتاح الصوت بتاع الكاسيت علق معاه و قالك في مشكلة حصلت أنا مش فاهم ليه بس عدت ، ولا الفتيس بيعمل نتشة بين التاني و التالت و بيقولولي دة عايز سوفتوير جديد ؟! سوفتوير جديد إيه في الفتيس ؟ الناس دي أكيد بتهرج !!!

بس بقى و الكلام ده قعد يمشي من هنا لهنا و واحد يقول لواحد " شفت حسنين حصله إيه في عربيته الجديدة .. كذا و كذا " و تكبر الإشاعة و كل واحد طبعاً يحط تحابيش عليها ، و إتملت الدنيا نكت على العربية و هي لا بيها ولا عليها :) :)
و زود الحكاية دي كمان إن مفيش مشترين كتير يعني مفيش قاعدة عريضة للمستهلكين عشان تكون المعلومة إحصائياً حتى سليمة ، بمعنى انها لو حصلت مرتين تبقى سليمة و نقول عليها أمين مع انها عشان تكون سليمة لازم تكون حصلت ألف مرة مثلاً عشان تكون إحصائياً سليمة و نصدقها بس ده مفيش ألف عربية أصلاً يبقى هنجيب معلومات منين بس ؟؟!

ييجي حسنين صاحبنا الغلبان بقى عايز يغير عادي ، يقوم يفكر يبيع عربيته ، يقوم صاحبه إياه يقوله " أنا أخدها منك بس نزل فيها ١٠ ألف ولا حاجة دي يا عام كان فيها كذا مش فاكر لما قولتلي ، يا عام دا احنا كنا مع بعض عيب تضحك عليا " ، و تتبع العربية أرخص من تمنها بعشرين تلاتين ألف جنيه و هكذا لحد ما بقي سمعة إن العربية دي رخيصة عشان وحشة ، و طالما وحشة يبقى ترخص تاني و هكذا

هي دي بقى ثقافة السوق المصري اللي وصلت الميجان الجميلة للوضع اللي احنا فيه دلوقتي .

أسف على الإطالة بس أعمل إيه ... مستغرب

و عجبي !!!

[Sharky]

كالعادة متألق فى حلقاتك يا باشا

[Ahmed Selim]

تحليل ممتاز يا باشا

طيب الحمد لله انها رخصت علشان الواحد يعرف يشتريها

[ASD peugeot]

كلام مظبوط يا استاذ فرحات وبيدل علي مدي الجهل الموجود
شكرا يا باشا علي حلقاتك وتعتبر مرجع لكل من يريد شراء الميجان
بس الميجان المنوال الجديده 117000 في كنتاكت كارز وهي موديل واحد منوال
اسعار المنوال في المستعمل بيكون في حدود كام في موديلات 2006او 2007

[farahat]

كلام مظبوط يا استاذ فرحات وبيدل علي مدي الجهل الموجود
شكرا يا باشا علي حلقاتك وتعتبر مرجع لكل من يريد شراء الميجان
بس الميجان المنوال الجديده 117000 في كنتاكت كارز وهي موديل واحد منوال
اسعار المنوال في المستعمل بيكون في حدود كام في موديلات 2006او 2007

المانوال عموماً مش موجود كتير في الميجان لأن الناس مش بتشتري مانوال في الاسعار العالية (جزء من ثقافة السوق )، عشان كدة مش هتلاقيه في المستعمل كتير .

بس عموماً ال-٢٠٠٦ بتكون في حدود اواخر ال-٨٠ و أوائل ال-٩٠
و ال-٢٠٠٧ بتكون في التسعينات و أوائل ال-١٠٠ بالكتير

[lolly136]

ana 3yza adeef 7aga ana msh m3ya megan bas 3yza a2ol r2yey

el mohem ay blad btnezel el taxiat 3la ay asas
3rbia mtina we btets7mel el mshweer

we btwfar bnzeen sa7???


kolena akid 3rfeen en el megan t2feel turkey


we bsra7a ana lma bsfer turkey akber nesbet taxiat henak el megan wel clio fa da dlil 3la kf2etha wla aih??

[islamnabil]

كالعادة اتحفتنا بالحلقة الرابعة
تسلم ايدك و الى ىالامام و في انتظار المزيد

[أبو عبدالله]

كلام جميل جدا وربنا يبارك فيك
ولكن لي تعليق بسيط على

المستهلك المصري بقى بالمفهوم اللي لسة قايلين عليه قال " اللي نعرفه أحسن من اللي منعرفوش " ، و أدامه موديلات كتير من الحاجات اللي يعرفها (ميتسوبيشي و تويوتا و دايو و هيونداي و نصر و BMW و مرسيدس ) ، انما الحاجات التانية دي مالناش دعوة بيها ، دي بتاعة الناس التانيين دي مش بتاعتنا ( فولفو ، رينو ، ألفا روميو ، Audi )
طب مين بقى اللي إشترى الميجان ؟ هو نفسه اللي إشترى فولفو S40 و هو اللي إشترى الألفا روميو ١٥٦ و اللي زيهم ، زائد كم واحد كدة من هواة التجربة و هواة الجديد و كم واحد تانيين من اللي بيقرو البروشور بتاع العربية و بيفهمو إيه المكتوب فيه قبل ما يشتري ( و ساهم في كدة كمان إن العربية سعرها كويس فزادت نسبة المجربين )

انا معاك كلامك صح ولكن ليس هذا السبب الرئيس
فده ايضا لو بحثت على اصله هتلاقي ان العربيات اللي حضرتك ذكرتها
لا تحتاج لتوكيلها بصفة دورية او لا تحتاج لتوكيلها من اساسه
لأن قطع غيارها زي الرز
واي ميكانيكي بيشتغل فيها
واسعار قطع غيارها بالنسبة لعمرها الأفتراضي جيده
واسعار صيانتها جيده
وبتعطي ما تعطيها باقي السيارات الأخرى التي ذكرتها غير مسالة التمييز مفيش غير كده

وده رايي ان دي الاسباب الرئيسية لهذا الكلام
والدليل ان حضرتك الأودي مثلا لو قطع غيارها وصيانتها زي باقي السيارات
اكيد كل الشباب هيركبها
ولو الميجان اسعار قطع غيارها وصيانتها زي الكورولا ولا يوجد ما يعبها حتى لو مفتاح معلق
صدقني ناس كتير جدا هتركبها

ولكن ليس كذلك

وشكرا للموضوع

[farahat]

كلام جميل جدا وربنا يبارك فيك
ولكن لي تعليق بسيط على



انا معاك كلامك صح ولكن ليس هذا السبب الرئيس
فده ايضا لو بحثت على اصله هتلاقي ان العربيات اللي حضرتك ذكرتها
لا تحتاج لتوكيلها بصفة دورية او لا تحتاج لتوكيلها من اساسه
لأن قطع غيارها زي الرز
واي ميكانيكي بيشتغل فيها
واسعار قطع غيارها بالنسبة لعمرها الأفتراضي جيده
واسعار صيانتها جيده
وبتعطي ما تعطيها باقي السيارات الأخرى التي ذكرتها غير مسالة التمييز مفيش غير كده

وده رايي ان دي الاسباب الرئيسية لهذا الكلام
والدليل ان حضرتك الأودي مثلا لو قطع غيارها وصيانتها زي باقي السيارات
اكيد كل الشباب هيركبها
ولو الميجان اسعار قطع غيارها وصيانتها زي الكورولا ولا يوجد ما يعبها حتى لو مفتاح معلق
صدقني ناس كتير جدا هتركبها

ولكن ليس كذلك

وشكرا للموضوع

على فكرة يا أستاذ أبو عبد الله كلامك سليم و أنا بشكرك و أحييك على اسلوبك في الحوار و الاقناع ، و يا ريت نستمر في الحوار عشان أكيد هنستفيد .
أنا معك إن قطع الغيار دي عمل مهم جداً في قرار إختيار عربية و أسعار الصيانة و ما إلى ذلك أو ما يسمى "cost of ownership " يعني تكاليف إمتلاك السيارة أو بالبلدي كدة التمن إلي إنت بتدفع عشان يكون عندك سلعة بمستوى معين (يعني إلي عايز يسكن في وسط البلد يستحمل الزحمة واللي عايز يسكن في حتة هدية يستحمل المشوار واللي عايز يسكن في حتة رقية يستحمل قيمة الإيجار ، بمعنى أخر مفيش حاجة من غير تمن ) ، كذلك في السيارات لو عايز حاجة فخمة إدفع تمنها ، و لو عايز حاجة عمرها طويل إدفع برده و لو عايز حاجة فيها الاتنين إدفع مرتين :)

قطعة الغيار الفرنساوي ممكن تكون تكنولوجياً متميزة أكتر من غيرها و بالتالي بتضيق مرونة في الاستعمال و التغيير ، الألماني معقدة أكتر و لكن محسوب حساب كل إحتمالات الإستخدام و كدة يكون عمرها أطول من الفرنساوي لكن أصعب في التركيب و الإستخدام ، القطعة التايواني بتأدي الوظيفة بشكل مرضي و بسهولة يتقبلها المستخدم و تركب بسهولة و لو ضغط عليها شوية في الإستعمال هتبوظ ، هو د الفرق بين قطع الغيار و هو في الحقيقة فرق مفاهيم و ثقافات مش بس في العربيات .

نيجي بقى للعربيات و ماركاتها ، الفكرة في قطع الغيار ملهاش دعوة بماركة العربية و لكن بماركة قطعة الغيار ، بمعنى إن مروحة الرديتر بتاعة رينو كليو مثلاً
عملاه bosch (مثلاً يعني) ، معناها انها ألماني و حتعيش بس هتكون غالية و ممكن تكون أغلى من بتاعة مرسيدس لو كانت مرسيدس واخده المروحة دي من حد تاني إيطالي مثلاً ذي Marelli ، و لو هيونداي جايبة مروحة الرادياتير بتاعها من bosch هتكون بنفس تمن بتاعة رينو بغض النظر عن ماركة العربية .

المقصود إن قطع الغيار مرتبطة بالموردين بتوعها مش بالعربية و كذلك عمر قطعة الغيار دي ، و توفر قطع الغيار في السوق مرتبط بعدد العربيات إلي موجودة من الموديل في السوق مش العكس ، و بكرة افكرك لم نلقي قطع غير ميجان 2 عند كل بتوع قطع الغيار طالما إتباع منها كتير و مش بعيد نلاقي منها تايواني و صيني و إستثمار كمان .
عزيزي دي فلسفة السوق بيحركها العرض و الطلب ، تقبل احترامي و تحياتي :)