تعديل هام فى دورة التبريد للاسكودا فليشيا - بالصور

[MOHAMED ABD EL SHAFY]

الاخوة الاعزاء
بدون مقدمات ندخل فى الموضوع
المشكلة:
بعد عطب الثرموستات فى احدى المرات وبدون مبرر معروف الثرموستات يبدا بتشغيل المحرك عند درجة حرارة110 تقريبا على المؤشر فى التابلوة وقمت بعمل الاتى
- تم تغيير الثرموستات 3 مرات ولكن نفس النتيجة كلهم 90 على 78 والحرارة تعمل على 110 ونوع الثرموستات ايطالى نفس النوع الى بيركب فى ال 128
-تم تغيير الثرموستسات رقم 4 وبعمل على 86 على 76 والمروحة اشتغلت على 100
-تم تغيير الثرموستات رقم 5 على 82 على 72 والمروحة اشتغلت مظبوط ولكن تعمل طول المشوار ختى لوعملت 4 ساعات مشي فادت الى ضعف البطارية بشدة وفى احدى المرات بمون بنزين وجيت اشغلها لم تدور الا زق عشان البطارية فيصت واضررت للرجوع الى الثرموستات 86 على 76 والمروحة اشتغلت على 100
-تم غسل الريداتير وتنظيفة وتسليكة وبتاع الريداتيير اكدلى ان اليداتيير بحالة ممتازة ولم يحدث فرق
-تم تغيير طلمبة المياة ولم يحدث فرق
-تم نغيير ثرموستات الصباع اللى على الكوعة ولم يحدث فرق
-تم فك العداد والكشف عليه ولا توجد مشكلة فية
-مش عارف لبه فيه دائما فرق بين العداد فى التابلوة والمغذى من صباع الحرارة فى الكوعة وتوقيت عمل المروحة مع الثرموستات
-المياه لاتغلى عند ال100 لحظة دوران المروحة وتم التاكد من ذلك
-تم تغيير المروحة لمروحة سيارة فورد امريكى كبييرة وقوية اكبر من المروحة الاصلية ولكن لم يحدث تغيير

المشكلة كلها ان هناك فرق حوالى 10 درجات بين ثرموستات الكوعة (الصباع الحرارى) وثرموستات المروحة فى الريداتيير

قمت باستشارة اكثر من ميكانيكى - كهربائى وكل اقتراحتهم تتلخص فى تنظيف دورة التبريد او تخفيض الثرموستات لدرجة قليلة وكما ذكرت مسبقا عملت كل الحلوومفيش فايدة
وشفت عربيات مماثلة ولا توجد بها هذة المشكلة معظمهم المروحة تدور على 85 ولا تتعدى ال 90 باى حال من الاحوال


فقمت بالتفكيير كثيرا فى الموضوع وبحثة
وفى احدى المرات كنت مع صديقى بنشحن فريون للفيرنا فى الحرفيين فوجدت سيارة سيات ابيزا موديل 2000 وتفحصت دورة التبريد فوجدتها مماثلة تقريبا للفبيشيا مع وجود التغييرات التالية
الثرموستات موضوع فى جهة دخول المياة للريداتيير (شمال السائق ) بعكس الموجود فى الفليشيا (يمين السائق)
فمعنى ذلك ان الثرموستات يحس بالمياة بعد تبريدها فى الريداتيير بدلا من ان يحس بيها عند خروجها من الموتور
ففكرت فى حل لنقل الثرموستات من بعد تبريد المياة الى قبل التبريد
فقمت بعمل ذلك التعديل البسيط (بنفسى) وجربتة والحمد لله نجح بعد تجربة شاقة ونجح الموضوع والمؤشر لا يتخطى ال90 درجة باى حال من الاحوال والحمد لله
بالاضافة ان اصبح عندى عدد 2 ثرموستسات مروحة
احدهم القديم يعمل على درجة حرارة ميا ة 90 بعد تبريدها والاخر المعدل يعمل على درجة حرارة مياة 90 قبل التبريد(الثرموستاتين نفس النوع 90 على 80)

ولكنهم يعملو فى توقيتين مختلفين
فبذلك اصبح الثرموستسات القديم احتياطى يعمل عند عطب الثرموستسات المعدل
يعنى تنسى مشكلة انه يعطب فجأة عند سفرك مثلا واصبح الموضوع محمى تماما
(الثرموستاتين يعملوا بالتوازى كهربائيا )

التجربة نجحت والحمد لله وممكن اطور منها انى اعملها خراطة مثلا فيما بعد او اشترى شجرة الثرموستات اللى موجودة فى الابيزا كمثال
واكيد دى كانت سبب فى سخونة الفليشيا اللى مغلبة معظم الناس
لانى شفت كل السيارات الالمانى الثرموستات بيكون فى جهة دخول المياة للريداتيير وليس فى جهة خروجها منه ومش عارف ليه فى الفليشيا مغيرين موضعها

وكنت عرضت الفكرة على الاخ سبعاوى ووافقنى في الفكرة دى وله جزيل الشكر
ودا كان ردة على رسالتى

[QUOTE=sab3aawy][quote=MOHAMED ABD EL SHAFY][quote=sab3aawy]

الاخ العزيز خالد
فكرة تركيب الثرموستات على الماسورة فكرة عملية جدا والعربيات الحديثة كلها مراوح ردياتيراتها بتشتغل على حساس راكب فى وش السلندر مباشرة ، بس فى هذة الحالة ركب ثرموستات 90 -78

الادوات
خرطوم المياة 20 جنية
ربع متر ماسورة مياة من عند بائع الادوات الصحية بقطر واحد بوصة 2.5 جنية (تستخدم نصفها فقط)
ثرموستات 90 على 80 درجة 20 جنية
انبوبتين حديد 7 جنية
2 متر سلك 2 ملم 2 جنية
كلبسات 0.5 جنية
شيكارتون 1 جنية
2 كولية 2.5 جنية


واترككم مع اصور

[MOHAMED ABD EL SHAFY]

رد الاخ سبعاوى كالاتى بس اخذت الاقتباس بالخطأ

فكرة تركيب الثرموستات على الماسورة فكرة عملية جدا والعربيات الحديثة كلها مراوح ردياتيراتها بتشتغل على حساس راكب فى وش السلندر مباشرة ، بس فى هذة الحالة ركب ثرموستات 90 -78

[amir]

و الله برافو يا محمد
شد حيلك كمان و كمان في التعديلات و التحسينات و متنفضش لموضوع رش التابلوه اللي كنت بتكلم محمد ممدوح فيه, انا شايف الفيليشيا عربيه مظلومه جدا جدا في مصر و الموضوع اللي كنت عامله بتاع التعديلات بتاعتها بيثبت انها ممكن تتروق و تبقي عروسه شكلا
و انت ما شاء الله بتتعامل مع مشاكلها الميكانيكيه اهوه
ربنا يسهل و نظره الناس ليها تختلف

[l0new0lf]

ممتاز. بس لو كنت استعملت T بدل الماسوره و اللحامات دى هيكون شغل فيه احتراف . على الاقل لما تحب تغير الثرموستات هتفكه عادى و مش هتعمل كل الشغل ده تانى. و برده علشان الباشمهندز الميكانيكي (ايوه بال ز) ميفتيش ولا يتنطط
:k32:

[MOHAMED ABD EL SHAFY]

كلامك مظبوط
انا عملتها بالتخريم عشان
1- ضيق وقتى ومش فاضى ادور على حرف تى واجرب
2- انا عاوز اعرف الفكرة هتنفع ولا مش هتنفع اولا ثم بعد كدا احسنها على مهلى واعملها بصورة احسن
3- ممكن الاقى الوصلة دى جاهزة فى اى سيارة اخرى بس عاوزة شوية تدوير

فحبيت اعملها بابسط صورة واشوف النتيجة وبعد نجاحها هعملها باحتراف اكتر فى اى وقت
وانا بجربها كنت شايل خرطوم تانى احتياطى عشان لو فشلت اغيرة وانا على الطريق بسرعة
والحمد لله نجح الموضوع وفعلا الثرموستات دا لما بيكون على خرج مياة الموتور وهيا سخنة بيظبط الحرارة فعليا

انا شديت جامد فى التجربة وسقطت غيارات وعليت سرعة ال ار بى ام كتير فى عز الحر وشماوير متعبة
والحمد لله المؤشر لا يتعدى ال 90 درجة اطلاقا
وهيا درجة حرارة عمل المواتير الاوربية والالمانية 90 درجة (منتصف المؤشر)

[MMamdouh]

very very nice work indeed


بس فيه سؤال مزنوق فيه... ليه اصلا بتوع سكودا حطوا الثرموستات على الناحية اللى بعد الرادياتير؟؟؟؟؟؟... اصل كدة مش منطقى لان العبرة فى قياس السخونة هو المياه الخارجة من البلوك و هى دى الفيصل فى اتخاذ قرار تشغيل المراوح من عدمة

MMamdouh

[MOHAMED ABD EL SHAFY]

يا باشمهندس محمد محمود
ليه اصلا بتوع سكودا حطوا الثرموستات على الناحية اللى بعد الرادياتير؟؟؟؟؟؟
انا فعلا معرفش ايه الحكمة من الموضوع دا
بس ممكن تكون ليها ميزة عندهم فى اوربا عشان موضوع الثلوج
بس الفرق دا هوا اللى استوقفنى بشدة وحبيت اعدلة والحمد لله نجح الموضوع بقوة والعداد الان لا يتحرك فوق ال 90 ابدا ابدا
والحمد لله واف شكر على تشجيعك

[l0new0lf]

very very nice work indeed


بس فيه سؤال مزنوق فيه... ليه اصلا بتوع سكودا حطوا الثرموستات على الناحية اللى بعد الرادياتير؟؟؟؟؟؟... اصل كدة مش منطقى لان العبرة فى قياس السخونة هو المياه الخارجة من البلوك و هى دى الفيصل فى اتخاذ قرار تشغيل المراوح من عدمة

MMamdouh

same thing in old fiat, its to know if radiator is working properly or not. if it works properly, there will be variation between water temperature comming out from the engine-almost same as block temperature- and the cooler water out of radiator

[sab3aawy]

تهنئة على اداءك المتميز، والحمد لله ان المشكلة خلصت تماما

بالنسبة لسؤال اخونا محمد ممدوح عن سبب وجود الثرموستات فى قاع الردياتير فى الفيليشيا فالواقع ان دوائر تبريد كل السيارات القديمة كانت مصممة كدة ، والفكرة هى القياس فى ابرد نقطة فى دورة التبريد لضمان امتصاص تأثير الظروف الخارجية على دورة التبريد،و تشغيل المروحة حتى تمام وصول المياه المبردة الى درجة الحرارة المطلوبة لدخول المحرك وكان حجم دورة التبريد بيكون مصمم على هذا الأساس، وكل الفيات القديم والبيجو القديم كدة ولا تزال الشاهين كدة لحد النهاردة

السيارات الحديثة،وبعد ظهور سوق واسعة للسيارات فى المناطق الحارة ، ظهر ان تشغيل مروحة التبريد على درجة حرارة المياه فى اسخن نقطة فى دورة التبريد تكون استجابته اسرع وبالتالى يمكن الحفاظ على درجة حرارة المحرك ثابتة تقريبا مما يعطى اداء منتظم وثابت للمحرك ، ونجد دائما فى السيارات المبردة بوسطة حساس داخل المحرك ان مروحة الردياتير تعمل عدد كبير من المرات ولفترات قصيرة جدا ،

عموما يبدا ان الفليشيا حملت خطأ تصميمى هو الاعتماد على محرك صمم ليبرد بواسطة حساس فى اسخن نقطة، وتم تزويده بدورة تبريد تعمل بحساس فى ابرد نقطة، وهو الخطأ الذى كان اثره طفيفا فى بلاد التشيك الباردة، خاصة وان السيارة لم يتم تصديرها خارج اوروبا الشرقية بشكل واسع لأنها وبرغم نحاحها لم تحصل على النجاح الغير عادى الذى حصلت عليه شقيقتها الكبرى الأوكتافيا عالميا،وهذا بالتالى لم يعد بمعلومات تشغيل واضحة للمصنع عن مشاكل دورة التبريد، لكن يبدو اننا الدولة شبه الحارة الوحيدة التى استخدمت السيارة مما اظهر مشاكل تبريدها لدينا

عموما مجهود يستحق الاشادة وشكرا لك على الافادة

[mmolazem]

فكره ممتازه و مجهود موفق .
الحمد لله على حل المشكله.
وستعود بالفائده على الكثيرين ان شاء الله.

[MOHAMED ABD EL SHAFY]

احب ابلغكم بعد التجربة
الان بعد مرور حوالى 15 يوم (اسبوعين ) ومشاوير طويلة وقصيرة مختلفة بلغت حوالى 600 كيلومتر
ان الفكرة نجحت ولم تظهر منها اى مشاكل
والفكرة نجحت تماما والحمد لله

[ahmed_su]

الف مبروك نجاح التجربة

واحييك على جهدك - مبروك مرة تانية

[hanyalashkr]

فكرة ممتازة و لى تعليق و سؤال

أشكرك على هذه الفكرة العملية
و جارى تجربتها و تركيبها بالرغم من انى لا أعانى من مشكلة حرارة و لكنها تعتبر ضمان كافى و خط دفاع ثانى ضد سخونه المحرك
و لى سؤال
أعانى من مشكلة تناقص زيت المحرك
تم تغيير الزيت من حوالى شهرين من نوع موبيل xhp حوالى 4 لتر و شويه
من يومين لمبة الزيت بتنور بسرعه و تطفى فى الملفات
اخرجت مقياس الزيت لقيته نضيف ؟؟
معنى كده ان الموتور لا يوجد به زيت من اصله
الميكانيكى أكد لى انه لا يوجد زيت او يوجد حوالى 2 لتر او اقل و نصحنى بتغيير نوع الزيت الى توتال او شل عالى اللزوجه total 5000
بالفعل اضفت 2 لتر توتال و مقاس الزيت وصل حتى ثلث المقاس يعنى مازال فى حاجه الى لتر و شويه كمان
معنى كده ايه ؟؟ و بما ان الموتور كان فاضى كده ليه اللمبه ماكنتش بتنور غير فى الملفات
و إذا كان المحرك لا يسرب زيت بهذه الدرجه لأنى لا أجد تنقيط على الأرض
و لكن توجد ترشيحات بسيطه من الكارتيره وجوان الجنب
هل هذه الترشيحات تؤدى الى اختفاء 2 لتر زيت فى شهرين؟؟
أرجو المساعده و شكرا

[MOHAMED ABD EL SHAFY]

نقص زيت المحرك ليس له اى علاقة بدورة التبريد

نقص الزيت لسببين لا ثالث لهما :
1- تسريب شديد من الجوانات او طبة الكارتيرة اوالكارتيرة نفسها
2- الموتور به عطب فى طقم الشمبر ودا يبان لو العادم له لون ابيض مع القرص على الغيار

[hanyalashkr]

وضحت الرؤيا

شكرا على الرد و كده فعلا وضح العطل منين
لأن فعلا فيه دخان أبيض خفيف و ده معناه طقم الشنبر زى ماقولت حضرتك
السؤال دلوقتى و ياريت إجابه سريعا
هل اصلاح هذا العطل ضرورى السرعه فيه . يعنى اذا ترك كما هو لفتره هل يؤثر على الموتور بشكل او بأخر
و أيضا
أيه هو طقم الشنبر ؟ووظيفته ايه؟
و تغييره هل سهل أم مشكله ؟
و ما قيمه تكلفة تغييره ؟ أو إصلاحه؟
و لك جزيل الشكر