قصة حب انتهت بالزواج (اشتريت ميجان 2008)

[momo10000]

صديقى أبو عبد الله

الموقع هو Carsurvey.org وليس .com
أنا دخلت على الموقع مخصوص عشان خاطرك واخترت ميجان 2005 عشان هو ده الموديل اللى المفروض فيه أكبر نسبة أعطال

ال reviews عددهم 26
منهم 22 بيشكروا فى العربية
1 بيقول أنها فيها بعض المشاكل منها مايكنة الزجاج و خزان مياه المساحات ومقابض الأبواب الداخلية و حاجة تانية أنا مش عارفها بالظبط أسمها Fron Lower arms
1 بيقول أن العربية مصاريفها المفروض متكونش بالحجم ده مع أنه أقر صراحةً فى أول الموضوع أنه لم يحدث معه أى أعطال تماماً وكتب كمان Touch Wood يعنى أمسكو الخشب :)
2 بيقولو أن العربية مش حلوة ( مع العلم أنى مقريتش ال posts بتاعتهم عشان مشغول شوية )

أيه رأى سعادتك فى الكلام ده ؟؟؟؟

PerFect...!!!!

[أبو عبدالله]

السلام عليكم.

يا جماعة الخير انا لي عتاب رقيق اتمنى يوصل صح زي ما انا اتمنى انه يوصل ومايزعلش حد .بخصوص الجدال الواقع دلوقتي في الموضوعين الموضوع ده والموضوع بتاع اخونا طارق اللي بيفكر يجيب ميجان ان شاء الله.

دلوقتي في وجهتين نظر عكس بعض تماماً ناس ملاك للميجان ومقتنعين بيها ومش هاقول حلوه ووحشه واكون طرف في الجدل القائم هاقول ان ربنا سبحانه وتعالى اراد ان ال 100 اللي من ملاك الميجان في المنتدى بس مايحصلش معاهم مشاكل من اللي بنسمعها دائما وابداً عن الميجان يعني باختصار الحمد لله مافيش مشاكل عند ملاك الميجان وبيزيدوا يوم عن يوم صحيح ده مالهوش فايده بعينها عشان كلامي مايتفهمش ان دفاعنا عن العربيه دي دعايه ليها .........كمان عشان ماحدش يفتكر ان الطرف الاخر الغير معجب بالعربيه يقوم بحملات دعايه ذات تأثير سلبي على سمعة العربيه ...انا عارف طولت في الدباجه اللي فوق بس برضه حرصاً مني ان ماحدش يزعل.........عاوز اقول ان الجدال ده مش مكانه ابداً موضوع راجل عامله بيقول باركولي جبت عربيه جديده والحمد لله فرحان وطاير بيها.........اقوم انا داخل فيه شمال ويتحول الموضوع من مباركه رقيقه لي نقاش حاد معدد سلبيات العربيه وانها وحشه ومش هاتعيش وغير اعتماديه وهاتطلع عين كل اللي اشتراها وكلام من ده

باختصار اخاطب اخواني اللي معجب بالميجان واللي مش معجب بيها ...... الجدال ده شبه يومي مش عارف ليه ومتأكد انه مش هايوصل لحاجه .......بلاش نكسر فرحة شخص كريم جايب عربيه جديده او بيحلم يمتلكها في يوم من الايام..صحيح واجب علينا نقول اللي للعربيه واللي عليها بأمانه ودي ربنا سبحانه وتعالى هايحاسبنا عليها لكن برضه نراعي شويه ان اللي جاب عربيه جديده ماينفعش احبطه كده وافضل اقوله اعتماديتها قليله والحق بيعها كمان المالك اللي زي حالة العبد الفقير الا الله اكيد اكيد اكيد مش هاكون مبسوط وانا كل يوم ابدأ يومي بنقاش حاد ان العربيه اللي ربنا قدرني وامتلكتها وراضي بيها الحمد لله وحشه وحشه وحشه سيئه سيئه سيئه......صحيح لا اقلل من اقتناعي الشديد بيها لكن برضه الجانب النفسي للموضوع ده غير مريح بالمره وعلى فكره هاستشهد براجل محترم لم يسعفني الوقت اني اتعرف عليه اسمه دكتور صلاح كان من ملاك الميجان ولظروف معينه تخلص منها ومع ذلك اعتقد انه بيحاول يرجعها تاني يعني الكلام ده مؤثر ......انا استشهدت بالعضو المحترم تأكيداً ان الكلام اللي حاصل ده والجدل اليومي ده ليه تأثير برضه واحنا بشر في الآخر مش ماركات اوربي ولا ياباني ولا الماني........رجاء خاص من اخوتي ويا رب الرساله توصل وماكنش زعلت حد مني سواء من المعجبين بالميجان او الغير معجبين بالميجان

والسلام عليكم.

شكرا لك أخي رامي وجزاك الله كل خير
وارجو ان أكون لم اجرح احد لأني لم اقلل من شأن السيارة لهذه الدرجه ولكن تكلمت على نقاط معينه فيها لا اكثر ولا اقل

ولكن انا أسف لصاحب الموضوع ان كنت ضايقته بأي شئ أقصده او لا اقصده

صديقى أبو عبد الله

الموقع هو Carsurvey.org وليس .com
أنا دخلت على الموقع مخصوص عشان خاطرك واخترت ميجان 2005 عشان هو ده الموديل اللى المفروض فيه أكبر نسبة أعطال

ال reviews عددهم 26
منهم 22 بيشكروا فى العربية
1 بيقول أنها فيها بعض المشاكل منها مايكنة الزجاج و خزان مياه المساحات ومقابض الأبواب الداخلية و حاجة تانية أنا مش عارفها بالظبط أسمها Fron Lower arms
1 بيقول أن العربية مصاريفها المفروض متكونش بالحجم ده مع أنه أقر صراحةً فى أول الموضوع أنه لم يحدث معه أى أعطال تماماً وكتب كمان Touch Wood يعنى أمسكو الخشب :)
2 بيقولو أن العربية مش حلوة ( مع العلم أنى مقريتش ال posts بتاعتهم عشان مشغول شوية )

أيه رأى سعادتك فى الكلام ده ؟؟؟؟

أولا انا اسف على موضوع الموقع الغلط وانا فعلا مأخدتش بالي خالص

ثانيا المشاكل اللي انت ذكرتها واللي مذكورة وتعبيرات الملاك على الموقع ده اللي انا بقوله وبرتضيه فعلا

يعني انا لم اقل اكتر من اللي هما قالوه ولا اقل

يعني عاوزك تقرأ تعبيراتهم حتى اللي بيقولو حلوه هتلاقيهم كاتبين حاجات برضه عن العربيه

وبعدين ما المشاكل اللي انت ذكرتها هيا اهه كهرباء ومصاريف وده اللي انا بقوله

وعاوز تعرف الفرق ادخل على مثلا كورولا وشوف التقييمات والكلام عامل ازاي

وفي النهاية خلاص علشان الناس متزعلشي وكل واحد له عيون يقرأ بها اللي مكتوب هناك وتقييم شخصي يقيم به الموضوع وما على الرسول الا البلاغ
ونراكم في جولا ت أخرى ان شاء الله والسلام ختام

[Ahmed Selim]

أيه ده ؟؟؟؟
هو الجولة دى خلصت كده

بهزر معاك طبعاً يا باشا

[ضيف]

أسف للتأخير

ايه هي المادة الشفافة دي

المادة تشبه المياه فى عبوة بلاستيك شبه الجلانس بس لون العبوة رصاصي.
اسم المنتج ده ANTI SCRATCH و هو منتج لبناني صديق لي كان في مأمورية بالرياض و جابه لي و هو سعره 90 ر.س.

[Ramy_Tantawi]

شكرا لك أخي رامي وجزاك الله كل خير
وارجو ان أكون لم اجرح احد لأني لم اقلل من شأن السيارة لهذه الدرجه ولكن تكلمت على نقاط معينه فيها لا اكثر ولا اقل

ولكن انا أسف لصاحب الموضوع ان كنت ضايقته بأي شئ أقصده او لا اقصده

جزاكم الله كل خير اخي ابو عبدالله ولك بالمثل يا أخي الكريم وأشكر تفهمك كلامي وتقديرك لي وجعله الله في ميزان حسناتكم ان شاء الله .

تحياتي الخالصه أخي الفاضل.

[gassour001]

لــ Ramy_Tantawi :

بارك الله فيك, لغتك بليغة و بسيطة و خففت التوتر

لــ أبو عبدالله :

يا اخى العزيز الى بيشترى عربية بيفكر بنظرية الــ package و ما هى بنظرية الــ package ؟ كل واحد بيحدد متطلباته من العربية الى هايشتريها فى شكل نقاط و بعدين بيدى وزن نسبى لكل نقطة و بعدين يجيب العربيات المقترحة و يديها درجة على كل نقطة و بالتالى كل عربية هتتمثل فى النهاية برقم واحد يمثل درجة تلبية العربية لاحتياجاتك و بالطريقة دى اخترت الميجان بفرق بعيد عن المنافسين. مش معنا كدا انها الافضل على الاطلاق و لكنها الافضل لى انا و بالمناسبة احب اقولك انى مديتش الميجان ال نقطة الاعتمادية اكثر من سبعة من عشرة و مع ذلك قع اختيارى عليها لان الــ package بتاعتها تقيلة قوى على المنافسين بالنسبة لاحتياجاتى

لــ Moustafa_Farouk :

انا متابع مواضيك لانك كنت حيران زيى ما بين الاسترا و الميجان

لــ Ahmed A.Maksoud و momo10000 :

واحدة واحدة يا نمور الرينو على أبو عبدالله دا راجل شكله طيب

لــلجميع :

شكرا للى قال مبروك و مش زعلان نهائيا من المناقشات الى دارت حول اعتمادية العربية لانى دايما من انصار الرأى و الرأى الاخر

[mohamed ibiza]

الف مليون مبروك:)

[Sharky]

ابو عبدالله يا حبيبى مش علشان واحد و لا إتنين قالوا إن مصاريفها كتير يبقى ا الصح عندك 24 واحد قالوا كلام كويس عليها

يبقى الأصل فى الأغلبية مش فى الفردية

أبو عبدالله لازم يا جبيبى تجرب العربية بنفسك لما أشوفك قريب إن شاء الله و صدقنى حتغير و حتحس بحب ملاك الميجان للعربية دى

و فى الأخر ربنا يبارك لجاسور و إن شاء الله تكون خير لك

[M_HaFeZ]

1 - الف شكر لكل من قال مبروك و شاركنى فرحتى

4 - اما بخصوص اعتمادية السيارة بشكل عام, فلابد ان نعترف انها ليست على مستوى الكورولا (تويوتا شركة حاصلة على سيكس سيجما, يعنى ناس بتدور على zero defect)

ده الكلام التمام السيكس سيجما ... زيرو ديفيكت ... وال Five zeroes اللى اساسا اخترعوها فى اليابان

اهو ده كلام العلم يارداله

[megane_man]

ياااااااااااااااه الحمد الله أن المناقشة أنتهت علي خير

[momo10000]

الف مبرووووووووووووووووك يا معلم gassour001 وربنا يكفيك شرها

وشرفت وحووووووووووووووووووش الميجان .....

[Abo_Lina]

والله انا زهقت من حوار الطرشان ده الي بنبات فيه و نصبح فيه ..
واعتقد برغم الكلام الغير منطقي الي عن الميجان فعدد ممتلكيها بيزيد يوم عن يوم رغم انف الجميع
وبتهيألي اغلب الناس عندها وعي وتقدر تفرق بين ناس بتقول تجربتها مع العربية و عيوبها قبل مزاياها و بين ناس تجربتها عبارةعن ابن خالتي حكالي و الطشت قالي و الكلام ده

[Ahmed Selim]

ابن خالتي حكالي و الطشت قالي و الكلام ده

حلوة الطشت قاللى دى يا معلم :)

بقالك فترة مش باين لعل المانع خير أن شاء الله

[Abo_Lina]

والله يا أحمد باشا كنت في العين السخنة وقرفان من ساعة ما رجعت من الزحمة والناس و المرور و الزفت..و بفكر اخطفلي يومين قبل رمضان ..
بس انت واحشني والله وكل شباب الميجان و الرينو و المنتدى و مصر و السودان

[Ahmed Selim]

بلاش السودان دى متفكرنيش بالخيبة بتاعت المنتخب أمبارح :)

أنا طالع السخنة بكرة أن شاء الله أنا والمدام وهارجع السبت بأذن الله :) :)